صباح/مساء الخير
من زمان ما طرحت موضوع بس مازال نفس الموقف يتكرر جدامي عسب هالشي قلت اتناقش وياكم فيه.
أكيد كل حرمة تغار على ريلها وما تباه يطالع حد غيرها لكن تصرفات بعض الحريم تقهر وتضحك في نفس الوقت ما أدري ليش جي يسون؟!
المهم بقولكم الموقف, كنت أمس في المستشفى سايرة عشان الموعد مالي ومب متفيجة حق اي شي ثاني لأن الموعد هذا كان وايد مهم
يلست عالكرسي اتريا فدشت وحدة وريلها, شي طبيعي او عادي يوم حد يدش من الباب الواحد يرفع راسه او يلتفت ويطالع منو دش
ما نقدر نتحكم في هالتصرف, المهم انا رفعت راسي وجفتهم وعقب نزلت راسي عادي ويلست اطالع في التيلفون, وهم كانوا جدام الغرفة اللي عند الرسبشن يوم رفعت راسي مرة ثانية احصل الحرمة نفسها اللي ويا ريلها تخزني بعيونها وكل شوي تلتفت اطالعني وعقب اتلف اطالع ريلها!!
نعم خير اختي شو عندج تخزيني؟ حسيتها شوي وتيي لين عندي عسب تسألني, ما اهتميت الها ولفيت ويهي.
الحين سؤالي ليش الحريم جي؟ كل وحدة تتحرى البنات يطالعن ريلها ولا معجبات ولا أي شي!!! شو مشكلتهن؟
ليش الوحدة ما تكون واثقة من نفسها ومن ريلها, كله يفكرن اذا الوحدة صدت بالغلط وجافت ريلها يعني بتم اطالعه طول الوقت
وبتسوي حركات وانها تباه, شو هالتفكير صدق خاطري اعرف؟!
حد يقدر يجاوبني على هالسؤال يا حريم وهل فيه وحدة فيكن تفكر جذي؟
بس قبل لا تجاوبن مابا وحدة تقول لو كنتي معرسة ولو كنتي مكانها…الخ لأنه هذا مب منطق ابدا.
هذا الموضوع كنت اعاني منه قبل لا اتزوج وعقب ما تزوجت اطلع ويا عيالي وتخزني وحده بعينها نعم نعم يعني واضح اني ام ليش تخزيني
حتى انا متزوجه وسوري ع هالكلمه ( عندي ريال ) شو أبا في ريلج
عزيزتي صاحبة الموضوع ما عليج منهن وادري الحركة جدا مزعجه وتوتر بس هذا دليل عدم الثقه
الله يعافيهن
تخيلت الموقف قعدت اضحك
الله يهدي الجميع
فالنهاية كل واحد عليه يغض بصره عن الثاني
وجهة نظر لا اكثر ..
مع اني ماشوف لها لزمه هالحركات الحرمه لازم تثق بنفسها وبزوجها …
ضحكتيني والله ترا الكل يعاني من هالشي ،،
ولا اذا عطيتي نظره بالغلط تيود ايد ريلها
سلامات ؟ ترا مابناكله
على قولتج والله النظرات تكون عفويه من غير قصد !
بس بيني وبينج ترا من حقها الحرمه تخاف خاصة هالوقت ،،
لان الحين موضة البنات يتصيدن المعرسين ،،
و مانعمم عالكل لان في بعضهن بنات حلال والنعم فيهن ،،
بس شو تقولين خلاص ( الخير يخص والشر يعم ) ياختيه