نداء الى كل ام عندها بيت وموظفة في نفس الوقت.. ابغي خبراتكم

الله يجازيكم خير لا تطنشوني محتاجة تجاربكم في هذا الموضوع والله محتاسة من التفكير خصوصا اني على وشك ولادة وعندي طفلة تروح المدرسة والولد صغير عمره سنتين …..تجاربكم يا امهات يا موظفات

المشاركة الأصلية كتبت بواسطة مرت الوزير

عزيزتى انا بالنسبه لى يوم كنت اشتغل كانت عندى خدامتين واعيالى يبتهم ورا بعض وكبروا مع بعض الصراحه كنت اتركهم عند الخدامه وكانت تشرف عليهم وهذا طبعا كان خطأ كبير منى لكن شو اسوى ما اقدر اوعيهم كل صبح وآخذهم عند اهلى لانهم فى منطقه ابعيده بس يوم ساروا المدرسه انحلت المشكله وكان الفطور عادى حليب وسندويشات وكورن فلكس وهذا ما يباله شئ
والغدا علمت الخدامه طريقة الطبخ وسويتلها لسته بالايام واصناف الغداء اليومى بس الصراحه الحياه تكون احلى يوم صاحبة البيت تكون موجوده فى بيتها وتشرف على عيالها وبيتها وجهز لزوجها اصناف الاكل وهذا الشئ ما حسيت فيه الا بعد ما قدمت استقالتى وقررت ما اترك عيالى الصغار عند الخدامات وحسيت ان اهتمامى ببيتى وعيالى وزوجى افضل واغلى من اى شئ لكن عيالى الى يبتهم فى بداية زواجى هم دفعوا الثمن لانه الله واعلم كيف كانت الخدامه تتعامل وياهم بس الله ستر والحياه مرت بس سبحان الله المرأه مخلوقه للبيت وهذا الشئ ما اتحس فيه الوحده الالما تشتغل وبعدين تعرف قيمة وجودها فى البيت بس شو انسوى الحياه اصبحت تفرض الكثير على الانسان
بس نصيحتى لج حاولى ترتبين حياتج وتعطين كل شئ حقه علشان ما تشعريين ان حياتج ملخبطه والسموحه

اشكرج اختي على ردج الحلو والله اني اتريا اقدم استقالتي اليوم قبل باجر بس شسوي الحياه صعبة وايد

انا بخبرج بس ترى الموضوع هب هين

الغاليه المطلوب منج تنظمين وقتج وعشان جي اتبعي الخطوات التاليه

خلي عندج مذكرة يوميه Diary

اكتبي فيها وقت الاستيقاظ وضبطي المنبه على هالشي

حطي وقت لتحضير الفطور يعني نص ساعه او ساعه الا ربع

تقدري تسلقي البيض وانتي تسوين ساندويجات او تحضرين الكورن فليكس للعيال وصندوق الغداء لبنتج

رتبي شنطة ولدج الصغير وغياراته من الليل

رتبي اغراضج انتي واللي بتلبسبنه وان عباتج وملابسج مكويه من الليل

الغداء اطبخي الاكل اللي تبينه لو نص سوى وحطيه في الثلاجه

وبس ترجعين تكملينه وصدقيني خلاص نص ساعه الاكل يكون جاهز

واذا على السلط خلي الخدامه تزهبها وانتي تطبخين

والعشاء ممكن تمشين حالج بخفايف

ممكن تعلمين الخدامه تسوي الفطور لحد ما انتي تجهزين وتجهزين العيال

وبجيه بتوفقين ان شاء الله ما بين بيتج وشغلج وعيالج

وتقدري مثلا في الويكند طبعا لو انتي مزاجك رايق وهب تعبانه ومستثقله من الحمل

تسوين سمبوسه او كبه او اقراص الدجاج بالجبن والبقسماط وتجمديهن في اكياس التجميد

وكل يوم اطلعين منه وتسوينه حق اليهال ولج بالليل وبجيه وفرتي وقت كبير تقضينه في التجهيز لليوم الثاني والغداء

وايضا عشان اليهال وانتي ما تملين من الكورن فليكس والبيض والساندويشات كل يوم

سوي فطاير او كب كيك من الليل وبجيه تقدري تريقين عيالج بشي مفيد وسريع

ادري كثير بيقول صعب بس كل شي في بدايته صعب وعقب بتصير سهله وايد

بس نظمي وقتج وخلج على المذكرة مالتج عشان ما تتلخبط امورج وتختبص مواعيدج

وتقدري تسوي يوم في الاسبوع فري من الطباخ

يعني تاكلون من برع او في بيت اهلج او تطلبون من مطعم

والله يخليلج عيالج ويحميلج اللي في بطنج ويقويج يا الغاليه