منو منكن مرن عليها (الدكتوره والمتدربات) وهي في غرفة الولاده ؟ – مسألة يجب حلها – لصحة الجسم

سمعت الفتره الأخيره عن كذا وحده تفاجأت بدخول الدكتوره مع مجموعه من المتدربات عليها

وهي في مرحلة الطلق أو بعد الربى في غرفة الولادة

هل هالقانون مسموح به – عيل كيف الوحده يعطونها حرية اختيار شخص أو شخصين فقط يكونون وياها في غرفة الولادة

إذا كانت هالساعات حرجه في حياة الحرمه وخاصة في مجتمعنا اللي الوحده فيه ماتنكشف إلا على ريلها
وتنجبر إنها تطلب وحده من أهلها أوقات عشان تعينها في مرحلة المخاض رغم خجلها

فكيف ممكن تسمح لمجموعه من البنات بإنهن يجمعن حولها بدون سابق إنذار يتفرجن عليها وهي في حالة مايعلم بها إلا الله سبحانه

ومن الناحية الطبية إن كان هالشي واجب (يعني لابد إن بعض المتدربات يحضرن مرحلة الولادة) فليش مايكون هالشي رسمي وقانوني يعني لازم يكونن الحريم على علم
اللي بتقبل لهن الحق يدخلن عليها حزة رباها.. أما اللي بترفض فهذا حقها ومحد يقدر يجبرها إنها تتقبل موضوع حضور المتدربات وكشفهن عليها

لو هالشغله تستوي لجنسيات معينه جان رفعوا قضايا وتحولت الأمور للمحاكم

طرحت الموضوع عشان نلقى حل لهاي الظاهره اللي انتشرت مؤخراً دون وجود أي تعليمات واضحه تنص على إن هالجولات ممكن تستوي لأي مربي ولأي وحده في قسم الولاده
مع العلم بإن هالنقطه سببت أضرار نفسية وجسدية لبعض الخوات منهن الإخت اللي ذكرت إن الرحم نزل عندها وصابها نزيف بسبب المتدربات اللي دشن عليها عقب رباها واللي تمن يضغطن على بطنها بحجة التدريب

أشوف الحل إن الوحده تخلي الدكتوره تكتب في ملفها إنها تعارض وجود المتدربات أو أي شخص غير اللي تختارهم في غرفة الولاده
عشان لواستوى عكس هالشي تشتكي عليهم وتذكر موضوع إنها خبرتهم بإنها ماتبا حد يدش عليها في قسم الولادة

إنتن شو رايكن؟