مشكلتي هي أمي لتربية الطفل

شحالكم خواتي .. مبارك عليكم الشهر .. أنا من زمان عندكم فالمدونة بس داخله بنيك نيم ثاني

مشكلتي الله يسلمكم أعاني منها من صغري .. مشكلتي هي أمي الله يحفظها

أنا أحبها وايد وهي عندي أغلى إنسانه بالكون وهي بعد تحبني وايد وراضيه عني الحمدلله

وين المشكله

المشكله فتصرفاتها فتهورها فحياتها

أمي الله يسلمكم أتزوجت أبوي فترة بسيطه وحملت فيني وأطلقت منه شو هي الأسباب الرئيسية الله أعلم لين الحين ما أعرفها

بعد كمن سنه أتزوجت مطلق وعنده عيال كان نعم الزوج مدين وحنون ووايد يحبها المهم ما بدخل فالتفاصيل بعد فتره من الزواج أتزوج عليها مب وحده 2 وقبل فتره أتزوج الرابعه

فالبدايه كانوا عايشين مرتاحين بعدين بدأت المشاكل ما بقول هو السبب فيها هم الأثنين كانوا السبب فيها وهم الأثنين ظلموا بعض وأذوا بعض

المهم أنا عشت مآساه من صوب لأسباب عديده أهمها عدم الإستقرار الأسري سواء كانت من المشاكل فالبيت أو مع أبوي

البيت ما كان فيه إستقرار كل يوم مشكله وكل يوم قضية ومحاكم وأمي تبا تطلق منه وكل يوم أطيح علينا ومرضت من الهم والغم اللي فيها

وأنا وأختي اللي أصغر مني تعبنا من مشاكلهم وهمومهم بدال ما كانوا هم اللي ينصحونا ويوجهونا أحنا اللي كنا نحاول نحل مشاكلهم ونآخذ همهم وهم أخواني الصغار

المهم فالنهايه أطلقوا بعد المآساه اللي أستوت وسبحان الله أتكررت نفس مآساتي العيال قاموا ما يحبون أبوهم ويتهمونه بالإهمال والتقصير معنه طول عمره ما قصر وياهم بشي إلا من كمن سنه تعب ومل

وأنا يوم أشوف هالموقف أذكر مأساتي مع أبوي وكيف عانيت طول هالسنين صراحه بعد ما أتزوجت عرفت قيمة وجود الأب فحياة البنت ما أحس أن عندي سند حد واقف وياي حد يهتم في

أمي دايما مشغوله بعمرها بمشاكلها بهمومها بمرضها تصدقون من كثر الإهمال من صوبها كنت أيلس مع البشاكير أسولف وياهم أسمعهم ويسمعوني ما كان عندي حد فالدنيا وتعودت عالإهمال من صوبهم

تعلمت كيف أعتمد على عمري وأكيف أحل مشاكلي بروحي بدون مسانده حقيقة من الأهل

تعلمت أشياء وااااايده من الحياه

اللي مضايجني الحين أن أمي ما تعلمت من أخطائها من ماضيها

أمي طيبه وايد بس وايد ساذجه ما تعرف مصلحتها متهوره فتصرفاها ما ترتب أولوياتها فالحياه

قبل فتره تقريبا كانت تكلم واحد هو إنسان زين بس اللي مضايجني فالموضوع أنها تخيلوا كانت بتتزوجه بالسر ومسيار بعد وكانت بتتنازل عن حقوقها من المسكن والمصروف وكل شي بس عشان العاطفه والعفه على قولتها

كنت في حالة صدمه أول شي كيف تكلم إنسان غريب مب محرم هالتصرف ما يجوز كانت تقولي أحبه ويحبني وتضحك على عمرها وتقول أنها أستوت مراهقه فالأربعين وتبا تعيش حياتها

اللي كان مضايجني أنها ربتنا على أن هالشي غلطططط وحرام بس الحين هي تسويه وتابنه نرضى فيه

واللي ضايجني أكثر كيف ما تعلمت من ماضيها ومستعده تتهور مره ثالثه وتتزوج أي كلام مسيار

وبالسر وبدون حقوق كله هذا عشان شهوتها وعاطفتها

أنا كنت مصدومه ومكتئبه بس ما قلت شي بس أرد البيت وأصيييييح

نصيحتي الوحيده تجاها قلتلها لازم تدخلين حد من الأهل (( أخوها )) ولازم تتزوجين زواج عادي مب بالسر ولازم يعطيج حقوقج مثل أي وحده ثانيه

أحنا من عايله كبيييره ومحترمه مب أي كلام المفروض أنها ما ترضى على عمرها هالمستوى من الزواج عشان شي ما يستاهل

المهم الحين بتتزوج زواج عادي الحمدلله وبيكون كل شي تمام بس اللي مضايجني لين الحين

إهماااااااااااالها

أنا الحين حامل وقريب أربي وهذا أول حمل لي

مرات يوم أقرى كلام الحريم عن أهاليهم أمهاتهم كيف يهتمون فيهم أقول ياربي أتمنى لوعندي حد يهتم فيه مثلهم يخاف عليه يحاتيني يسأل عني أغلب كلامها عن خطيبها وعن الزواج وعن حياتها ناااااادرا ما تسأل عني وعن الحمل وإذا سألت عالسريع

هو بالنسبه لها أهم عنا أحنا عيالها وهالشي مب يديد هي من زمان جي تحبنا بس أحنا عمرنا ما كنا رقم 1 فحياتها كنا دايما رقم 2 3 4

هذا اللي مضايجني فيها أتمنى أشوفها كأي أم ثانيه

تهتم فينا وأدارينا وتهتم بحياتنا وتساندنا

الحين هي مشغوووووله خلاص بتعرس هالشهر أنا مب مضايجه لأنها تعيش حياتها بس مضايجه من إهمالها يعني أنا الحين حامل وقريب أربي مب كل الأمهات فهالوقت يجهزون غرفة النفاس لبناتهم ويساعدونهم فالتجهيز للولاده ويتابعون بناتهم أول بأول

أنا ما محصله هالشي إذا كلمتني بتتكلم عن خطيبها عن ترتيب عرسها

شو أقول غير أدعولي بنات أكون قويه وأعرف أتعايش مع هالتغيرات السريعه والكثيره فحياة أهلي

ويزاكم الله خيييير

الله يوفقج يااختي وانتي قبل كنتي قوية وتعتمدين على نفسج

الحين بعد اعتمدي على نفسج صعب الحل بس هذا الي اشوفه

او انج تكلمينهاا وتقوليلها عن الي بخاطرج قوليلها ابا حالي يكون حال اي وحده تنتظر مولودهاالاول

الله يوفقج يارب ويسهل عليج بدعيلج من قلبي والله

ولاتنسينااا عاد تبشرينا عن البيبي ^^

حبيبتي هذي امج مهما سوت فيج واكيد تحس فيج بس يمكن طبعها جي

وانتي ما بتقدرين اتغيرينها لان هي من كانت صغيرة وهذا طبعها وما بتتغير الا اذا هي بغت تتغير

قال تعالى (( إن الله لا يغيِّر ما بقوم حتى يغيِّروا ما بأنفسهم.))

حبيبتي عليج بالصلاة والدعااء لها والله يحنن قلبها عليج ياارب

الله ييسر لج الامور

واتربين بالسلامة وتهتمين بالياهل واتعوضين عن اللي فقدتيه ويسخر لج زوجج ويكون لج سند والاب والام والزوج والصديق وحتى الاخت ….. ربي يوفقج

الله المستعان يالغاليه

يزاكم الله خير خواتي

ترى هذا اللي أنا أسويه أنا اللي أساندها دوووووم وطول عمري ما أتكلم عن مشاكلي دايما أحل مشاكلي بروحي

ومعتمده على نفسي على الرغم من صغر سني

عمري ما طلبت المساعده والمسانده من حد لا من أبوي ولا من أمي ولا من أهلي

دايما معتمده على عمري وأنا اللي دايما أساند ما أحصل حد يساندني

ما أعتقد طلبت شي مب من حقي بس على قولتكم أحنا ما نقدر نتحكم فظروف حياتنا وفالناس بس نقدر نتحكم فردة فعلنا من الموضوع

أنا أحاول على قدر الإمكان أني أساندها وبالعكس ما قصرت وأحاول أركز على حياتي ومستقبلي