انا مشكلتي مع عيالي .. كل ماصبغنا صبغ شخبطو على اليدار .. ومرة سوينا ورق جدران جلعوه كامل ..
و ابوهم عصب قال مابصبغ مرة ثانية .. المشكلة الحين العيد ياي .. ومايستوي نتم جيه
قلتله يمكن شي صبغ مايتاثر بالالوان والاقلام
حد عنده فكرة يفيدني .. ؟؟
ويزاكن الله خير
صج الصغاريه ما يودرون شي قبل مايخربونه الله يصلحهم ويهديهم ويبارك فيهم .
اختاري الاصباغ الزيتيه مهما شخبطوا عليها ما بتخترب ترومين تغسلينه بالماي والصابون .
حبوبه أظني اسم الصبغ اللي أبا اقولج عنه صبغ الماسي، ما اتذكر إذا الاسم هو او لا بس إن شاء الله يكون هو ههههه
لوتحطيين صبغ سياير بعد بيشخبطونه بس انصحج بالزيتي مايرمون يخربون وبعد فيه ورق جدران ينصبغ جربي
وسمحيلي
نحن الحين صابغين زيتي .. بس بعد مشخبطين عليه بالالوان
ابغي شي مضمون واكيد ضد هالسوالف
حد مجرب ؟؟
الله يخليلك الاولاد .. والاطفال يحبون يرسمون ويعبرون .. ومره جت بنت خالتي الصغيرة بيتنا .. وعند باب غرفتي لصقت لصقات كل الشخصيات الكرتونية اللي تحبهم ..وجلسنا بعد ماراحت 3 ايام نشيلهم بدون ما نمخش الباب الخشب .. وبعض اللصقات اصلي وتعبنا ..
بس انا لي حلين ..
الحل الاول :
فيه اصباغ جوتن اذا تعرفينها .. عندهم اصباغ ( زيتي مطفي)يكون اللون بخصائص زيتيه لكنه ما يلمع ونفس تاثير الاصباغ ذات الاساس المائي .. وعندهم فوق ال 300 درجة لونيه ..من خصائصها انها تنغسل بالماء والصابون .. وما تتغير ولا تطفي .. وتستحمل حتي البقع الدهنية والاحبار ..
الحل الثاني :
عند محلات الديكور وبعض محلات التعليم المبكر ومحلات الالعاب عنهم ورق رول حجمة من متر الي 5 امتار .. يتعلق بسقف الغرفة .. ويصير الالولاد يشخبطون عليه براحتهم .. وكل ما شخبطو اسحبي الرول ويطلع ورق جديد لاصق بالجدار وكانهم يشخبطون علي الجدار .. واذا جو ضيوف مجرد انك ترفعين الورق يطلع الجدار الاصلي نطيف وجميل ..
وتحياتي القلبية لك
أمواج الفن