اول شي الحمدلله رب العالمين على كل بلاءه ونعيمه
واحب اكون هذا العبد اللي يقول عنه الحديث
عجبا لامر المؤمن ان امره كله خير وليس ذلك لاحد الا للمؤمن
ان اصابته سراء شكر فكان خيرا له وان اصابته ضراء صبر فكان خيرا له..
واتمنى اني اكون هذا العبد اللي يقول عن الحديث النبوي الشريف
اذا احب الله عبدا ابتلاه
والشكر لجميع خواتي في الله اللي شاركوني الدعاء ووقفوا معاي وقفه اخويه والله مابنساها
وكلامكم يمكن هو اللي خلاني اصبر واتحمل ..
واللي كانت قصتي مع بنتي في هذا الرابط
https://forum.uaewomen.net/showthread.php?t=380287
وكملت الاسبوعين ورحت وكنت في قمه الخوف والضيق وطلعت من البيت بعد صلاه الفجر وبعد الدعاء والتوسل الى الله بان يكون كل هذا مجرد اوهام وشكوك
لكن قدر الله ماشاء فعل ..
للاسف سووا لبنتي اختبار السمع وانا وريلي عشنا في خوف في هاللحظات الصعبه
ورحنا للدكتور بعد ماخلص اللاختبار
وشفت الدكتور يكلم النيرس بالايراني عسب اترجم لنا
وفجاه شفت النيرس مسحت دمعتها
هني حسيت برجفه
ووجهت كلامها لزوجي وقالت الدكتور يقول للاسف بنتكم ماتسمع ابدا
وتحتاج الى زراعه قوقعه .خلاص راجعوا مستشفى راشد بما انكم مواطنين فتقدرون تعالجونها هناك او تسفرونها
آآآآآه
لما سمعت هالعباره حسيت الدنيا اظلمت في عيوني
ماقدرت اتكلم لا انا ولا ريلي ولا قدرنا نسال ولا نستفسر عن شي
واول كلمه طلعت مني وهي الحمدلله
وبعدها حسيت بقلبي يدق بسرعه وبكيييت وقالت لي النيرس لاتصيحين هذا قضاء وقدر
وطلعنا من غرفه الدكتور وزوجي شايل بنتنا على صدره وهي نايمه
ومشينا الين السياره ونحن نصيح وكل من يمر ويشوفنا يستغرب
ودخلت السياره قعدت اصيح بصوت عالي وريلي يسوق ويمسح على راسي وهو يصيح معاي ويقولي لا تيئسين ان شاء الله خير ..
مروا هاليومين صعبين بس مصبره نفسي بقراءه القران
ماتحملت قلت بوديها مكان ثاني يمكن كلامهم يكون غلط
وديتها اليوم مستشفى راشد وسويت لها تخطيط سمع للمره الثانيه وقالولي نفس الكلام وخذت لها موعد في الزهراء بعد اسبوعين ..
واتصل في الدكتور الهاجري مايرد علي
..
الاسبوع الياي عندي موعد مع الدكتور في راشد وبطلب منه تقرير للسفر خارج الدوله وان شاء الله خير علشان ماتاخر في علاجها بما انهم قالولي ان هذا انسب عمر للعلاج..
هذا ردي لكل من شاركني همي ودعائي
ويزاكم الله خير واسمحولي تعبتكم وياي
واشكر الاخوات في الرسايل الخاصه بعد
بارك الله في الجميع
وشفى الله مرضانا ومرضى المسلمين
والحمدلله رب العالمين على كل شي ..
ودعواتكم لي ولبنتي بتيسير امورنا ..
تراج مأجووورة
الله يصبرج حبوبتي
دعواتي معااكم
لا اتحاتين فديتج.. واتوكلي على الله.. والله يصبركم يا رب…
رحمة الله فوق كل شي وعليج بالدعاء والإستغفار والصدقة ويارب الله يكتب لبنتج إنها تسمع مرة ثانية يارب العالمين .
بصراحة قلبي وياج أختي