مدرسة الشويفات – الشارقة – ولية امر يديدة للطلاب

السلام عليكم ورحمة الله وبركاته

انا اخت صاحبة النيك النيم

ولدي الكبير فديته بيسير كي جي ون هالسنة.. وسجلته في مدرسة الشويفات

البارحة ريلي سار يشتري اللبس وكنت ابى استفيد من تجارب الامهات اللي عيالهم في نفس المدرسة

بالنسبة لللبس ، الللبس الاحتياط الي بيوديه معاه المدرسة بيكون لبس المدرسة؟ والا لبس البيت عادي؟
شو لون جوتي الرياضة ابيض والا كحلي شرات اللبس
شو نصايحكم عن اللبس عموما

وبالنسبة للشنطة.. الي عرفته انه هو ما بيعطونه كتب اييبها معاه البيت غير كتاب القصة.. شو حجم الشنط الي تشترونها؟ والا كفاية لانش بوكس وشنطة صغيرى حق اللبس الاحتياط؟ والفايل اللي بييبه اخر الاسبوع وفيه شغل الاسبوع كله..بيكون من عندي انا اشتريه والا من المدرسة؟

وشو عن اللانش بوكس والاكل…قالو لي حطيله وجبتين.. ريوق وغدا.. هل ينفع اني احط له ريوق والغدا يكون من الكانتين؟ والا انا احط له غدا احسن؟ وشو تحطون لهم؟ احس الاكل بيكون بارد الظهر واذا حطيت له عصير وماي بيحرون.. شو نصايحكم عموما بالنسبة للاكل واللانش بوكس؟

من سجلته وانا احاتي كيف بيتعود عالمدرسة واذا بيحبها والا لا…ممكن تجاربكم اشكثر خذوا عيالكم لين تعودو عالمدرسة.. وهل يحبونها الحين.؟ كيف اهتمام المدرسة باليهال في اول اسبوع؟

وايد سالت بس اول تجربة لي..وولية أمر يديدة وادعو لولدي يتقبل المدرسة ويحبها وما يتعب ويتعبني وياه

وموفقين جميعا وان شاء الله تكون سنة دراسية ناجحة وموفقة للكل

ڷآ آڷهُ آڷآ آڷڷهُ وحڍهُ ڷآ شُريڲ ڷهُ ڷهُ آڷمًڷڲ وڷهُ آڷحمًڍ وهُو عڷۓ ڲڷ شُي قڍير

ودي ارد عليج الحين على كل استفساراتج لكن حدي دايخه
ان شاءالله اول ما اقوم مصحصحه من النوم برد على كل اسئلتج من عيوني الثنتين يا الغاليه و ان نسيت دكريني برساله خاصه.
بس كل اللي بقوله لا تحاتين بيتعود على المدرسه و يحبها ان شاءالله.

وينج طيبة؟

السلام عليكم الغاليه و اسفه على التاخير ترى نسيت
بجاوب على استفساراتج و ان شاءالله تلقين الجواب اللي يريحج.

بالنسبه للسبير كلوث, عادي براحتج حطي اي شي ما يلزمونج بشي معين. و حطيهم في اي شنطه صغيره ولا تنسين تكتبين اسمه على الملابس و الشنطه لانهم بيتمون في المدرسه.

و الجوتي مال الرياضه بعد اي لون ابيض او اسود او كحلي عادي, لو احمر ما قولون شي . و هالشغله كلش ما حبيتها بالمدرسه لان الالتزام بلون معين وايد احسن للمدرسه مو كل من بكيفه.

اللبس مالهم انصحج تشترينه كل شي من الحين علشان تحصلين المقاسات اللي تبينها و ما يقولون لج مخلص شي و تنطرين وايد لين يوصل. يعني اشتري الصيفي و الجاكيتات مره وحده من الحين. و نصيحه ان كنتي مسجله ولدج الله يحفظه في فرع الشارقه لبسيه جاكيت لانه الصفوف ماشاءالله وايد بارده. ميزة ملابسهم انه فيها مكان من داخل ينكتب اسم الظالب. الافضل انج تكتبين الاسم في حالة انه نسى الجاكيت سهل تلقينه ثاني يوم.

الشنطه الله يسلمج لا تشترين حجم كبير, كافي حجم الصغير و ممكن تحطين له الاكل فيها.و الفايلات تكون من المدرسه انتي مول ما تعطينه لا اقلام ولا الوان ولا اي شي. كله من عندهم. بنهاية كل اسبوع يدزون ويا العيال فايلين. واحد للعربي و الثاني انجليزي. و بداية من التيرم الثاني يبعثون وياه فايل كل يوم فيه كتاب القراءه و قصه. و القصه تتبدل مرتين في الاسبوع

الاكل عاد هدا قصه ثانيه. لانه ماشاءالله العيال يملون من كل شي ما تدرين شنو تسوي ولا شنو تحطين. شوفي وايد شغلات ممكن نحطها لليهال و فيه امهات ماشاءالله يدزون الغدا للعيال المدرسه. بس بالنسبه لي احب اشوفهم يتغدون جدام عيني و اعرف كلوا عدل ولا لأ.
ادز وياهم المدرسه صمون جبن او بيتزا, فطاير. مرات كورن فليكس. و طبعا فواكه اي نوع يحبونه العيال. و الخضروات مثل الخيار او الجزر الحبات الصغيره. ادز وياهم ماي طبعا بمطاره صغيره تحفظ البروده و عصير او حليب كاكاو ولا فراوله. كنوع من التغيير مرات نطلب اكل من الكافتيريا مالت المدرسه. لما اوديهم الصبح اروح الكافتيريا و اطلب اللي يبونه العيال و اهمه يوصلونه لهم بالوقت اللي احدده سواء البريك الاول او الثاني.
المهم من كل اللي طاف اني ادز ويا العيال اكل او خفايف تشبعهم لين يوصلون البيت و علطول يغيرون ملابسهم و نتغدى ويا بعض. و ضروري الغاليه تعودين ولدج الله يحفظه قبل ما يروح المدرسه يتريق بالبيت. لو يشرب حليب المهم ياكل شي قبل ما يطلع من البيت.

بالنسبه للتعود تفرق من ياهل لي ياهل. يعني ولدي الكبير كنت مسجلته قبل المدرسه بحضانه. و تم اسبوع صياح و صراخ لين فجاه قالي ماما روحي خلاص انا ريال بدش بروحي. صدمني بصراحه. و لما بدا عاد بالمدرسه خلاص كان عارف انه مافيه مهرب و اني ماراح اخليه يسوي اللي يبيه.
و الصغير اسم الله عليه لانه كان يروح و يرد معاي كل يوم الصبح و يشوف اخوه فالحمدلله تعود.
و فيه شي ثاني اسويه ويا عيالي من و اهمه في الكي جي ليما الحين. قبل بدية الدراسه بكمن يوم نروح المدرسه و نشوف توزيع الطلبه على الفصول و نروح صف كل واحد من عيالي و ان كانوا المدرسات هناك خير و بركه اخلي عيالي يتعرفون على مدرساتهم و يتاقلمون على صفهم و يعرفون مكانهم.

لا تحاتينه بيحب المدرسه ان شاءالله و بيتعود عليها خصوصا ان انتي شجعتيه و عودتيه انه ينام بدري قبل الساعه 8 علشان لما يقوم الصبح يكون مرتاح و ما يستعسر معاج.
اي استفسار الغاليه انا بالخدمه و حاضره اي وقت

الله يوفق عيالنا يارب و يحفظهم ان شاءالله