مجبوس بالعرايين .. طبخ الامارات

عقب ما يطيح المطر باسبوع ,,
ترتفع رووس بيضا امبين رمال وصخور ونباتات الصحرا وتبدا رحلتنا لقطاف هذه الرووس ..>> ما اعرف اعبر هههه ?

المهم …

حبيت اليوم ارويكم مجبوس بالعراايين.. اللي هو شرات ما اتعرفون نوع من انواع الفطر

اول شي طبعا عقب الداوره والحواطه والتعب حصلنا العرايين نلقطهن ف لازم ننظفها من التراب
نجهز السجين .. نقشر الجزء السفلي من العريون وبالخفيف نقشر الساق والراس لازم ننتبه للراس لانه مرات يكون خفيف ..فمرات يخترب..

هنيه عقب ما قشرناهم

خلاف لازم نحطهم في الماي .. اتيبون طاسه كبيرة متروسه ماي وتحطون العراايين فيها
عسب بقايا الرمل تنزل في الماي ( ما صورت الخطوه نسيت )

بعدين نقطعهم شرات الخضره عاادي

منو منا ما يعرف يسوي مجبوس سهل …

تحمسون البصل شوي وبعدين تحطون العرايين عليه وتقلبونه شوي ..

اتضيفون الملح والبزار والطماط واللي تبونه واتخلطونهم زين ..

وبعدين اتصبون الماي الحار.. وتغطون الجدر ..

وعقب ساعه تقريبا بينضجن العراايين ..انضيف العيش ونخلط شوي ..

وعقب ما يستوي العيش طبعا اتغرفونه

.. وتقولون بسم الله ..

وعليكم بالعافيه