مرحبا خواتي…
اشحالكم… ان شاء الله بخير….
هذه الكيكة خذيت طريقتها من وحدة عندنا بالدوام جزاها الله الف خير… كانت مسويتنها مرة وتذوقتها وعجبتني وطبقتها… قلت احطها لكم… وان شاء تعجبكم… بس في كم طريقة لكيكة الشكولاته بصوص الشكولاته في المدونة وما شاء الله كل طريقة احلى عن الثانية….
بصراحة الكيكة لذيذة ودسمة… حطوا عشرين خط تحت دسمة….وكميتها كبيرة….
مقادير الكيكة:
كوبين طحين + 2 ملعقة صغيرة بايكنج باودر
كوبين سكر
100 غرام زبدة
واحد روب (زبادي)
بيضتين + فانيليا
كوب ماء
6 ملاعق اكل كاكاو بودرة
مقادير الصوص:
8 ملاعق اكل حليب سائل
8 ملاعق كبيرة سكر بودرة
4 ملاعق اكل كاكاو بودرة
50 غرام زبدة
طريقة عمل الكيكة:
على جنب نضع الكاكاو والسكر والماء والزبدة في قدر على النار لغاية ما تغلي شوي…
نخلط البيض مع الفانيليا وبعدين نضيف الروب…. وبعدين نضيف خليط الشوكولاته على خليط البيض…
نبدأ بإضافة الطحين على الخليط مع التحريك….
نصب الخليط في القالب… او قوالب صغيرة.. او اللي يعجبكم…. انا حطيتهم في الالمنيوم الصغار اللي نحطهم في المداخن… بصراحة عجيبة….
وندخلهم في فرن حار…. ولانهم صغار اخذوا معاي بالضبط 20 دقيقة…
طريقة عمل الصوص:
نحط مقادير الصوص على النار ونخليه لين ما يغلي شوي ويتجانس ونصبه على الكيكة…
ملاحظة… في الصورة بتشوفون الحليب اللي انا حاطتنه حليب بودرة… انا بالغلط حطيت الحليب وبعدين اضفت الماي…. خذوا بالكم….
تتزين بالطريقة اللي تحبونه….
الطريقة واضحة بالصور…
ان شاء الله تعجبكم وبالعافية مقدماً…..
حياكم الله….
تسلمييين .. ربي يعطيج العافيه..
اتشهي
تسلم ايدج الغالية