كيكاتي الجزء الثاني و معلومات مفيدة عشان تبدعين في عمل الكب كيك

السلام عليكم و رحمة الله و بركاته

أخواتي

بصراحة ما توقعت هذا الاقبال على موضوع كيكاتي اللي هذا هو الرابط ماله
https://forum.uaewomen.net/showthread.php?t=764577

لاحظت انه وايد منكم استغرب كيف انا انتقلت من مرحلة الفشل الى مرحلة النجاح و الابداع في هذا المجال

و وردتني العديد من الاسئلة و الاستفسارات عن طرق العديد من كيكاتي و اعتذرت لكثير منكم لانه مثل ما تعرفون انا تاجرة و استخدم مجموعة من هاي الكيكات في تجارتي بس مش بهذا النك و مش بس في المدونة

صدقوني تعبت وايد لين وصلت لهذي الدقة في الشغل

ايلس بالساعات افكر في الشكل و طريقة التقديم و الفكرة مع انه الفكرة الاساسية تكون بسيطة لكن انا احب دايما اطلع اي فكرة بسيطة و عادية بصورة يديدة و جميلة و تسرق الانظار

ابغيكم تكونون مثلي

لازم تحبون الشي اللي تسوونه و تقدمونه بحب لاهلكم و قرايبكم و الناس اللي تعزونهم

يوم اسوي الكيك او اي نوع من الاكل افكر انه شغلي يطلع بكل دقة و تمر ساعات علي اسابيع ما ادخل فيهم المطبخ بس لانه ما عندي الوقت الكافي علشان اطبخ براحة و اخذ وقتي

بس هل هذا معناته اني ايلس بالساعات في المطبخ؟ الاجابة هي اذا اسوي اكثر من 3-4 انواع طبعا بايلس بالساعات و لكن اذا بسوي نوع واحد مع الوقت و التجهيز و الشغل بترتيب و نظام بتحسين انه امورج بإذن الله تتيسر

عموما انا في موضوعي السابق طرحت طريقة الكب كيك و الكريمة اللي الحين صاير موضة و الكل يحاول يسويه و يضبطه و غير عن كل التاجرات حبيت اني اتميز بتقديمي لوصفتي الاساسية في عمل الكب كيك و الكريمة و اللي من خلالها بافتح لكم الباب للابداع و التنويع و الاختراع

طريقة الكب كيك

في الخلاط
3 بيضات
1 كوب سكر
نص كوب زيت
1 كوب حليب سائل
1 ملعقة صغيرة فانيلا

و بعدين تضيفين عليهم:
2 كوب طحين
2 م ص بيكنج باودر

الحين افضل طريقة لعمل الكيك بدون أخطاء:
تجهيز جميع المواد
اتطلعين البيض و تخلينه في درجة حرارة الغرفة
تنخلين الطحين و يكون رقم 1 مرتين عقب ما تخلطينه ويا البيكنج باودر
طبعا تخلطين السوائل في الخلاط الجيك او الكاس و بعدين اتصبينه على الطحين و تخلطين الكل مع بعض و تستخدمينه
اتشغلين الفرن و اتخلينه يدفى لمدة عشر دقايق على الاقل قبل ما اتدخلين الكيك
اتجهزين القالب و الورق مال الكب كيك
اذا بتستخدمين الورق ماله داعي تدهنين القالب الا من فوق علشان لما ينتفخ الكيك الاطراف ما تلصق على القالب
الحين دخلي الكيك في الفرن و ان شاء الله ببيطلع لج باحسن شكل بس اهم شي ما تفتحين الفرن كل شوي عشان ما يدخل هوا و يخرب الكيك

طريقة الكريمة
طريقة الكريمة بسيطة
نص كوب زبدة + 3 كوب سكر بودرة + 1 م ك حليب سائل + نص ملعقة صغيرة فانيلا

الزبدة لازم تكون في درجة حرارة الغرفة
اذا حبة تضيفين اي لون لازم تخلطينه مع الحليب السائل و بعدين تضيفينه للزبدة و السكر
تبدين بإنج تخفقين الزبدة بالمضرب الكهربائي لين ما اتحسين انها انخفقت عدل
بعدين اتضيفين الفانيلا و الحليب
و اتمين اتضيفين السكر البودرة على دفعات و انتي تخفقين
كمية السكر هذي تقريبية لانه في ناس يحبون الكريمة ناشفة و ناس يحبونها شوي لينه طبعا انتي و ذوقج
بعد ما تجهز حطيها في الثلاجة حتى وقت الاستخدام

الحين
كيف تبدعين في الكيك؟؟؟؟

حبيبتي ممكن اتحطين لمساتج الابداعية في الكيكة و لكن بمقدار معين علشان ما تخرب عندج
مثلا بإمكانج اضافة التالي و لكن بمقدار نص كوب فقط:
فستق مطحون + نص م ص هال
جوز مدقوق + نص م ص قرفة
فواكه مجففة
سمسم
زعفران + ربع كوب ماء ورد
نوع من انواع الفواكه المبشورة مثل التفاح مثلا
نكهات مختلفة مثل الفراولة و الكاكاو البودرة بمقدار 2 م ك
انتي و ذوقج

الحين بالنسبة للكريمة نفس الشي
ابدعي اختي الكريمة
اضيفي الالوان المختلفة بنفس الطريقة اللي ذكرتها
و اضيفي انكهات اللي تحبينها بدال الفانيلا
ماي الورد
ماي الزهر
الهال
الفراولة
اللوز
الليمون
و اي شي يخطر على بالج

و باتريا اشوف ابداعاتكم و بصحح اخطاءكم و بحاول اعطيكم من خبرتي المتواضعة قد ما اقدر

و بالتوفيق لكم جميعا

الحين عاد اتفرجوا على اخر ابداعاتي في الكيك

لعشاق القهوة
كيكة القهوة

كب كيك بالتركش ديلايت او راحة الحلقوم (استخدمت نكهه الورد)

كيك البرتقال بالبوبي سيد او بذور الخشخاش

كيك النيدو المحمص و انا سميته يمي كيك من لذته

و اخيرا و ليش اخرا
كيك الفستق

انتظر ردودكم و تعليقاتكم

و انتظروني في المزيد قريبا

و ادعولي الله يتمم لي حملي و يرزقني بالذرية الصالحة

. . الَلهُمَ أرْزِقْنِيِ مِنْ خَيْرَيْ الْدُنْيَا وَالآخِرَة كَمَا أَطْلُبْ وَخَيْرَاً مِمَا أَطْلُبْ . .

Yummmmmy
thanks 7abebte

وووايد حلو ما شاء الله عليج صدق مبدعة وبالتوفيق

الله يخليج حبيبتي تسلمين

تسلمين الله يسلمج حبوبة

حبيبتي مشكورة مرورج يشرفني

الله يخليج حبوبة مشكورة و كلج ذوق