حبيت اطرح هذا الموضوع لنسلط الضوء على المشكله المطروحة دائما وتلقينها أو تسمعينها طول السنه وهي ((( ما عندي شي !!! أو روحي مديون !!! )) والمشكله مش مقتصرة على الشباب للأسف بعد انتقلت العدوى للبنات ،،
ممكن توجد حاجه ملحه للدين مثل بناء بيت العمر أو شراء سيارة فارهه ( مع أني أشوفها مش ضرورية يعني سيارة ويكون سعرها معقول تأدي الغرض المطلوب إللي خلى العالم يخترعها وهي وسيلة الإنتقال )
او ممكن أسباب ثانية مش واضحه ..
مع أننا نعيش في دولة غنية ولكن نسبه عالية من سكانها مديونين ،،، ليش؟؟؟؟؟؟؟
السبب الإنقياد المش طبيعي وراء الرفاهيه ( وعدم القدرة على السيطرة على العواطف )… وتنافس البنوك لتسهيل القروض بأقل نسبه ربح أو فوائد مثل مايسمونها ..
ألحين أبغي أدخل الموضوع ::
انتي…
سواء كنتي موظفة أو ربة بيت …
كيف اديرين راتبج أو مدخول بيتج ؟؟؟
وخلونا نشوف الإحتياجات الشهرية والسنوية … وكيف يتوزع المدخول عليهم ..
وتتوزع الإحتياجات على :
الأشياء الأساسية ( اجباري دفعها او شراءها )
الأشياء الثانوية ( ممكن تأجيلها أو عدم شرائها )
اتمنى الموضوع يحصل على تفاعل علشان نقدر نوصل لحل لهذي المشكله أو ممكن أحد يهتدي لطريقة ممكن تساعده على إدارة أمواله ..
فيه الحمدالله امشي معاشي على قدي والامور طيبه والله..~
الله يوفق اليميع
كيف اديرين راتبج أو مدخول بيتج ؟؟؟
للاسف اصرفه كله بدون وعي ولا مراعااه جني عايشه ليومي هذا وبس ^^"
وكل شهر اقول هالشهر ببدا ادخر واعدل من صرفي ولكن لا حياة لمن تنادي مع اني اداوم من اربع سنين تقريبا الا اني للحين ما يمعت لي شي ,, واغلب اوقاتي متورطه وما عندي فلوس لي نص الشهر ><
ويا ريت لو حد من الخوات تفيدنا بطريقه ممكن نوفر منها
ببدأ أنا وبحط لكن خطة صرف ممكن تنفع وإن شاء الله تنفعكن :
بسم الله الرحمن الرحيم
الحاجات الأساسية ( سواء كنتي موظفة أو ربة منزل )
**مشتريات البيت ( المير ، الأكل ومواد التنظيف ):
وضع خطة أسبوعية لشراء أغراض البيت بمعنى تشترين إللي يكفيج ويكفي بيتج لمدة أسبوع ومن كل شي واحد أو اثنين بس لا تكثرين ولأنه ممكن شي اشتريتيه وماستخدمتيه أو بعده ما خلصتيه.. وبجذه لما تسيرين المره اليايه بتكون المصاريف أقل وهكذا….
من ناحية مواد التنظيف اشتري المواد المنظفة إللي تيج في العبوات الكبار وعلمي الخدامه أنها تاخذ قياسها بس… وعن اللعب!!!
**عطي عيالج مصروفهم الشهري وحطيلهم حصاله وتلقائيا الطفل بيتعلم كيف يدخر …
………………………………………….. ………………………………………….. ……………………………………….
بشكل عام مش معقوله الوحده منا كل شهر بتفصل عباه أو بتشتري عزكم الله نعال … في هذي الحاله تحطين لج مبلغ خاص لج وخلينا نقول 2000 درهم وبيكون توزيعها كالتالي :
مصروف الموبايل : من 200 إلى 300 ( لا تنسين تبين توفرين فما لها داعي الرمسه الزايده خخخخخ)
عبايـــــــــــــــــــــه : ب 100 ( هيه ليش مستغربه أنا بقولج كيف اشتري لج طاقة عبي وهذي بتكفيج تفصلين منها من 10 إلى 11 عباه وخذيلج كلف ووديها عند خياط عادي بيفصلها لج ب 50 درهم وبسسسسسسسس) هع شورياكن فيه …
نعـــــــــــــــــــــال : ب 200 إلى 250 درهم وممكن أقل بس بحط أعلى سعر
عطـــــــــــــــــــر : ب 250 درهم وتقدرين تحصلين أقل عند المحلات العادية
البتـــــــــــــــــرول : فولي سيارتج أول الشهر وحطي مبلغ معقول في درج السيارة وإن شاء الله مابتستهلكين وايد
هاه شو بعد ناقص ما اشتريتيه ؟؟؟؟؟؟؟؟
بمعنى حسبي إللي فوق وشوفي كم وفرتي من 2000 درهم ….
هذا إللي عندي حاليا .. بس بعد ما أشوف تفاعلكن يالله بناااااااااااااااات
راتبي الله يسلمكم 4700
2145 حق البنك عشان السياره
1000 مشتركه فجمعيه
300 حق دار البر
200 رصيد شهريا
250 بترول
هاي الالتزامات
يبجالي 800 افصل عباه او اشتري عطر او اروح الجمعيه او اي شي ومب كل شهر بيلس بفصل عباه من هالسوالف
وبس
شطووره فديتني صح ^_*