عندي لكم اليوم طريقة الكورما الهندية .. طبعا بتصرف مني ههههههه لنه ما اعرف اطبخ طبخه بدون تخبيص ..
المكونات :
دجاجة مقطعه ..
2 طماطم مقطع مكعبات
2 بصل مقطع شرايح
ملعقة معجون طماطم ( اختياري)
شوية كزبرة ( ضرورية نكهة الكزبرة )
للتتبيل :
علبة روب صغيرة
ملعقتين من بهارات الكورما ( بحط صورتها تحت)
ملعقة كزبرة مطحونة ( اختياري لأنه بنحط ورق كزبرة بس لزيادة النكهة)
ملعقة غرم مسالا ( موجود في الجمعيات )
ملعقة فلفل أحمر بودرة
الطـــــــــريقـــــــــــة:
أول شي نحضر الدجاج مع التتبيلة ماله …
– تحطين قطع الدجاج في وعاء عميق و تحطين كل مكونات التتبيل ( البهارات و الروب) و تحطين الطماطم المقطع و و الكزبرة الورق و تخلطينهم مع بعض و تخلينهم في الثلاجة شوي .. يعني ساعه او اقل عشان يتشرب النكهة …….. بس عادي ترومين بدون ما تحطينهم في الثلاجة لو كنتي مستعيلة 
هاي تتبيلة الكورما .. بتحصلينها في الجمعية او كارفور
– الحين عقب ما طلعتي الدجاج من الثلاجة .. تحطين البصل + قرفة + قرنفل + هيل في الجدر ويا الزيت و تخلينه لين يحمر
– يوم يحمر عدل ( احمر مب محترق) تحطين الخلطة كامله و تخلينها تطبخ على نار متوسطة + ملعقة صلصلة طماطم ( انا حطيتها لنه كنت زايدة البهار فكان شوي مالح فخففته بالصلصة)
– تقريبا يحتاج لنصف ساعة الى ساعة الا ربع عشان ينضج الدياي و يذوب الطماط …
عقب ما تشوفين انه خلاص ذاب الطماط و نضا الدياي شليه عن النار و اغرفيه ، أنا قليت بطاط و حطيته وياه .. و حطيت رز وياه ..
و طبعا ما نستغنى عن السالاد
و بالهناء و الشفاء
وسجلنا المقادير للتطبيق
تسلم إيدج وووو نتريااا يديدج ..
Copy – Paste للوصفه طبعااا هههههههههه