انا يديده في هالمدونة ومن فتره قصيره مسجله فيه عشان اسوي شوي شوبينغ واجوف اليديد واختلط شوي معاكم .. المهم
وانا ألفلف جفت هالقسم وعيبني وايد لنه مخصص للسفر .. وانا الصراحه امووت عشي اسمه سفر وشوبينغ ههههه تبين تذبحيني امنعيني من هالاشياء هههههه
حبيت اعطي اشياء مهمه واايد للسفر عشان تفيدكم مستقبلا وتوصلونها لغيركم (بناتكم اهلكم ربيعاتكم الخ)
في اشياء وايد تعلمتها من السفر .. لني من كنت ياهل وانا اسافر .. تعودت عالسفر وكل مره اتعلم شي يديد واكتشف اشياء يديده
خلني اكتب من دون لف ودوران ههههه والله صدق ماتعرفون كيف مستانسه لاني بكتب ههههههه المهم
قبل السفر
هاي اهم فتره .. تخلي الوحده خايفه ومرتبكه ومب متأكده ومستانسه وكل شي هههه تعرفون احساس السفر وتجهيزاته صح انزين انا بقولكم شو اسوي
@الأغراض حق السفر
اييب ورقه قلم واكتب فيها شو اللي ابي اشله معاي حق السفر ولازم اكون موضحتنه وكل ما كان محدد يكون احسن عقب يوم بحطهم في الشنطه اشطب الغرض ولازم اسوي هالشي قبل السفر باسبوع عشان اضمن اني ما نسيت شي
يعني مثلا اللسته تكون جي
*قمصان ايدها طويله
*قمصان كت
*بناطلين
*جوتي رياضه
*نعال
*ساعه
*شغاب
وهكذا (كل شي ولازم بالتفصيل) مب تقولين مثلا (اكسسوارات) او (قمصان) لنها بتضيعج يوم بتيين اطلعينها وبعدين لازم تكونين محدده عشان تعرفين شو تبين وماتنسين بس لا تحطين ارقام معاهم يبين العدد مثلا 2 قميص 3 بناطلين عشان ما تتلعوزين وبعدين انتي مب متأكده .. المهم تبتدين simple وبطريقه عامه
الشنطه
انتي رايحه تسافرين صح ولا لا ؟ انزين بتروحين تتسوقين صح ولا لا ؟ ههههه اذا هي ليش عيل تترسين الشنطه وانتي رايحه؟؟ تبين تشحنين من هناك؟ ليش انزين ما تكونين خفيفه وتسهلين على عمرج وبالعكس بترومين تتشرين اشياء اكثر ولو زادت ترومين تشحنينها
الحين الاشياء اللي انا اسويها بخصوص شنطة السفر
•ما اشل اشياء مالها داعي وما بستخدمها في السفر (كلنا نسوي جي ترا ومانتوب هههه )
•الاغراض والثياب ماتعدي نص الشنطه (يعني الشنطه تكون بالكثير متروسه للنص)
•اشل شنطه شوي كبيره عشان تكفي الاغراض اللي بشتريها
•اخذ شنطه صلبه واعرف انها ما بتتكسر او تنفتح بسرعه
•الشنطه تكون فيها مخابي داخل عشان احط فيها الاغراض المهمه
•ما اخذ الشنطه الا وقت التنزيلات عشان اكون موفره على عمري (هاي قبل السفر من زمان)
•الشنطه تكون بلون مميز (يعني اخذ ورديه , صفرا , ذهبيه)
•واذا رايحه مع قروب احط علامه في شنطتي (شريطه مثلا او اخذ استكر كبير مال اليهال واللزقه عالشنطه من فوق ولازم تكون واضحه )
•واتذكر دااايما انه الشنطه ما تكون ثقيله وايد عشان ماتاخذ وزن
أغراض السفر
هني انا استخدم مخي شوي ولازم اكون عمليه شوي .. يوم اجهز الاغراض اللي احطها في الشنطه اكون وايد careful عشان اروم استانس في المكان اللي مسافرتله واتشرا عكيفي
مم يمكن بعضكم ما يعجبه كلامي او اللي اسويه بس عادي الكل عنده وجهة نظر .. انا قبل يوم كنت اسافر كانت شنطتي متروسه وشاله كل شي وكل يوم اطلع بشكل واستانس هههه كانوا يقولونلي ليش هالنشطه انتي وين مسافره ومن هالكلام بس كنت دوم ارد عليهم واقول العرب طول عمرهم كانوا كشيخين , لاتوقعون مني اكون سيمبل وايد ههههه واضحك بس عقب تعلمت ^_^
اغراض السفر لالالالالالازم تكون شوي يعني
*ما تشلين كريمات وايده ولوشنات ومن هالسواالف (خذي بس واحد لاتزيدين عن 2)
*خذي اللوازم بس وياريت تكون بحجم صغير او مستعمله (لا تشترين اشياء يديده حق السفر خذي اللي عندج) يعني مثلا خذي فرشاة اسنانج الحاليه ومعجونج وطبعا كلها بيكون فيه شوي وها اوكي لاتشترين يديد (تذكري شي معجون فحمام الفندق وشامبو الخ)
*ادوات النظافه .. لالالالالازم تشلين ديتول المعقم معاج وكلنكس للضروره .. مناديل معقمه,رش,علبه سائله اي شي المهم خليه معاج ترا العالم وصخ وانتوا ادرى بهالشي صح ولا لا ؟
*الثياب اللي بتشلينها خليها شوي وتتماشى مع بعض .. يعني مثلا جينزين واحد فاتح وواحد غامج و 6 قمصان يركبون عالثنين
* شلي جوتي واحد بس واللي اهوه مال الرياضه (ها اهم شي) الكعوب والنعول المفتوحه انسوها لنها بتخيسكم وبتعور ريلكم من كثرة المشي
*الفوط اليوميه ( وااايد مهمه خذي صندوق ذو الحجم الكبير اللي فيه 40 حبه مثلا وكل ما تطلعين استخدميه )
*شيلتين او 3 بالكثير والمفضل يكونن ملونات او شيله سودا قطعتها زينه ماتسود ثيابج ورقبتج
*وشنطه توتي او صغيره اذا تبين بس تكون وااااااااااااايد زينه عشان تخشين فيها الجوازات والفلوس والتذاكر وكل شي مهم
خلال السفر
بنات انا هني والله وااايد اهتم في هالسالفه لنه هني تبتدي المخاوف .. احنا نروح بلدان مافيها امان مثل بلادنا (الحمدالله) فدايما حطوا هالشي في بالكم
*رمسوا اهاليكم او ناس ثقه انكم بتسافرون ويدقون عليكم كل يومين عشان يطمنون عليكم
*تاخذون رقم من البلاد اللي رايحينها طبعا عشان ماتصرفون وايد ويودوها يوم تردون عشان تستفيدون منها مستقبلا
*قبل لا تروحون خذوا ارقام الشرطه والسفاره والاماكن المهم اللي يمكن تساعدكم اذا طحتوا في مشكله لا سمح الله
*لا تأمنون على اي حد برع البلاد .. المحتالين والحراميه وايده ترا ويودوا عيالكم عدل واغراضكم وممتلكاتكم
*داااايما ابتسموا تراها تفتح دروب وايده وخلج دايما خلوقه ولاتكشرين وتسبين الغريب تراج ماتضمنينه
*لاتلبسون وتتكشخون وايد لنه الباعه يعرفون الزبون من لبسه اذا كاشخ معناته راهي واذا عادي معناته عقد حاله
*لاتتحرشون في حد برع ولا تتضاربون مع حد .. مثل ما قلتلكم ماتضمنونهم وخاصه انه اغلب البلدان فيها عصابات ومن هالكلام الليه يبعدنا عنهم ان شالله
*لاتلبسون اكسسوارات واشياء ممكن تنصرق منكم في السوق لنه مثل ما قلت عندهم عصابات تسرق وانت مب داريه عالدنيا
*امزحي واضحكي مع الباعه ترا ها سبب التنزيلات الحلوه وتنزيل الاسعار وينبهونج عشغلات ويعاملونج اوكي
*دايمن روحي المحلات نفسها .. نوعي بس خلج دايمن في محلات معينه عشان تكونين زبونتهم ويوفرونلج او يمشون امورج ويسون لج اشياء مايسوونها عند اي حد
*خذي الفلوس كاش بس بعد ايبي معاج الفيزا .. مره سافرنا والمنطقه اللي رحنالها ماكان فيها مكان نسحب منه وتبهدلنا
*حق الاسوالق .. دايما اسالي قبل لا تروحي ودوري عنهم .. مره كنا نبي نروح سوق ماندري انه الفليل يقلب دعاره هههه وتبهدلنا طبعا
*لاتشلون خدامات لنهم مضيعه للوقت وتعب وهم .. الشغل ما بيكون وايد الفندق اهمه ينظفون الغرف والاكل تاكلونه برع والغرفه بس حق النوم الفليل ^_^ تصرفون عليها ليش؟
*داااااايما يودي فلوس حق الضروره .. وهاي بتنقذج في حال المطارات عند الاوزان
*اذا بتسافرين المكان لأول مره اسالي الناس اللي كانوا مسافرين لها قبل لنه عندهم خبره اكثر وبيقولولج
*خذي فكه معاج ووزعيها عالمحتاجين .. صح بعضهم حراميه .. بس الصدقه تراها تسوي
*واخر شي بقولج اياه .. توكلي على الله ولا تنسون الصلاه والدعاء برع
*اووه نسيت اقولكم شي .. الناس اللي بيروحون تايلند .. روحي الاسواق البعيده (البوثات) هذيل الباعه اللي يبيعون في الشوارع لنه كل ما كنتي قريبه من منطقة العرب اعرفي انه الاسعار بتكون غاليه
مشكورة حبوبه ما قصرتي
و اللسته مالتج اللي حق السفر نفس اللي اسويها حتى بطاريات مال الكاميرا و الجراجات اكتب ههههههه عشان ما فيه أنسى و اتوهق
ناديـن ^.^
وعلى طاري الشنط المتروسه كل ماانقول مابنترسها ابروحها تنترس هههههههههههههههههههههههههه