مرحبا خواتي اليوم يبت لكم طريقة عمل الانك شير وهو نوع من البيسكويت وهذي اول مره اسويها والحمدلله ضبطت وطبعا المقادير ما ازيد فيها ولا انقص مضبوطه وانا سويتها حق العيد ما نزلتها تعايزت واليوم نزلت طريقتها
المقادير:-
نصف كوب السمن "استخدم سمن اصيل" العلبة لونها ذهبي
نص كوب سكر الناعم
كوب من الدقيق
رشة فانيليا
بيضتان
ورشة ملح
ملعقة البكينج باودر
كوب من النشا
التزين :-
مربى او شوكلاتا نوتيلا
مكسرات مجروشة
جوز الهند
طريقة التحضير:-
نشغل الفرن ونخليه يسخن
تيبي طاسه واضربي" بالمضرب الكهربائي" السكر مع السمن مثل اللي بالصورة
اخلطي البيض مع الفانيليا
وبعدها نضع فوق الخلطه السابقة "السكر والسمن " ونخلطه عدل
شوفو كيف صار
ونضع الملح والبيكنج باودر
والنشا والطحين ونخلطه بخاشوقة
ونحطه فوق الخلطه السابقة وحركها عدل لين ما تتجانس المكونات كلها نحركها باليد طبعا مب بالمضرب الكهربائي
شوفو كيف صارت العجين متجانسه
نقطع العجينه ونكور كور صغار
وتكون الصينية مدهونه
حاولي تسوي الكور نفس الحجم وشوفو الصورة بعد ما خلصت الكرات
ندخلها الفرن تقريبا عشر دقايق كل شوي انتي شوفيها
بعد ما تطلعينها من الفرن خليها تبرد
وبعدها يبي حبه وحطي مربى وصكريها بالثانية حاولي تضغطي شوي لين ما تطلع الحشوة من الجوانب ويبي صحن حطي فيه مكسرات المجروشه وصحن ثاني النارجيل وحطي الانكشير فيه المكسرات وقلبي لين ما يتغط المربى اللي بالوسط بالمكسرات المجروشه مره سوي مكسرات والمره الثانية حطي النارجيل
اسفه ما صورت الطريقة
وحطيها في مله او صحن التقدم
طبعا طريقة المربى على حسب انتي ما تحبي انا حطيت مربى الفرولة يبت طاسه فيها ماي وخليت العلبة فيها وحطيت علبة الفرولة على النار لين ما يذوب المربى لانه ما بيستوي اذا المربى جامده
واسفه ما صورت الطريقة
وبالعافية على قلوبكم انا ما صورت يوم رتبته وحطيته في صحن التقديم
ودعواتكم لي ولعيالي بالصحة والعافية
ام راشد
تريوني
ما شاء الله عليج,,,رووووووووعة ..تسلم ايدج 
ماشاءالله شكلها تشهي يمي! يعطيج العافية وعقبالي اتعلم المعجنات ههه…الله يحفظج وعيالج
تسلم ايدج… ما شاء الله روعة..
ماشالله تسلم ايدج
يعطيج العافيه
تسلم يمناج والله يعافيج ويعافي عيالج ما شاء الله شكله حلو