موضوعي موجه لبنات الفئه العمريه من 12الى ……..
أنا ام معصبه والله من الخاطر
اغلب الأمهات يمرن باللي أنا فيه وحاسه بهن وأكيد هن حاسات وفاهمات للي ابا
أوصل له
ليش الحين البنت ان منعتها من التلفون تعصب وتحشر البقعه
أنا ام متعلمه والحمدالله ومتفهمه ومريت باللي تمر بنتيه فيه حاليا
أنا ما منعتج يابنتيه من التلفون بشكل كلي بس التلفون مخترعينه للحايه والظروره
بتقولين مب كل الوقت بس للدراسه
اقولج ادري بس اختاري وقت صح تسولفين ويا ربيعاتج فيه يعني مش فوقت
أنا امج محتايتنج فيه تساعدينيه
اولا من ناحية الصحه أنا إنسانه حالي حالج ولي طاقه محدوده خواتج صغار
وابا من يساعدنيه فيهن
لا تقولين خلي الخدامه تساعدج!!!!!!
أنا ربيتج قبلهن بدون خدامه وما يهونون الصغار عليه حد غريب يصكهم او يهتم
فيهم أنا ربيتج قبلهم وتعبت عليج وقت التعب وتقصير ماقصرت فيج بشي
كل اللي فخاطرج سويته ع قد الحاله اللي تسمح لنا مافكرتي تساعدين ولو بالشي
البسيط!!!!؟؟؟
التلفون أخاف عليج منه من الضياع
بتقولين أنا واثقه من نفسيه بقولج أنا واثقه منج لكن مب واثقه فالبنات
والسمجه الخايسه تخيس السمج كله
وسالفة الكمبيوتر تحتشرين واتحججين بالواجبات والتقارير
وفرته لج وحرمت نفسيه وتنازلت عن اشياء عشان مايكون شي
فخاطرج وما أوفره لج
اتمين ويا ربيعاتج ع المسن بالساعات سوالف وأغاني وغيره
وآخر السنه بين فالشهايد ماشاء الله التقارير والواجبات اللي كنتي تسوينهن
واللبس كلتي فواديه ابا اللبس جي وجي وفرت لج اللي تبينه بس طبعا بحدود
تبين تلبسين بناطلين وليقنز قلت ماعليه احيد عمريه فسنكن اتمنى اللبس جيه
بس هلنا بيذبحونا ان بس فكرنا مجرد تفكير بهاللباس
مسموح لج تلبسينه فالبيت بس وبعد بالطريقه الحشيمه يعني مب شورتات
وبديهات مفصخه عندج خوان اولاد استحي شوي ع ويهج وخواتج الصغار تراهن
يتعلمن منج ويطالعن عليج ويقلدنج لانج الاكبر
تبين تطلعين حدايق او مولات اوديج حتى لو بس نتمشى لو ما نتشرى
بس انسي سالفة انج تروحين هالاماكن بدونيه أنا او خالاتج المعرسات
تحتشرين ع كل هالاشياء اللي قلتها و تأكلين فواديه ان قلتلج نحن فسنكن ما نسوي
جيه وما نقدر نسوي جيه ومحرومات من اللي موفرينه الكن
شو ردج !!!!!!!!!؟؟؟؟؟
والله زمنكم غير عن زمنا
هاي الجمله وهاي المواقف أغلبنا نحن الأمهات نمر بها ونتعب نوقف ونصمم
على موقفنا اللي لازم تفرضه عليكن يابناتنا
بس أنتن تفكرن انه يوم نتصرف بهالطريقه اننا عوفات ونكرهكن
وأننا متخلفات وأفكارنا مال اول او من بخل فينا او عقد
لا حشى فكرن باننا نخاف عليكن ونبأ الكن الزين
ولانكن غاليات ومحد يسواكن فهالدنيا نحاول قد مانقدر نحافظ عليكن
الحين الواحد يوم عنده جوهره او لولوه ما تنقاس بثمن من غلاها شو لازم يسوي
هالواحد عشان مايفرط فهالجوهره او اللولوه
يحاول قد ما يقدر يحميها ويحافظ عليها بكل الطرق
انتي يابنتيه بالنسبه اليه نفس هالجوهره الغاليه قد ماقدر احاول وبحاول باللي
اقدر عليه احميج من هالمجتمع اللي نحن عايشين فيه واللي انتي بعدج صغيره
انج تفهمينه فسنج هذا
يابناتنا فكرن اننا صدق نتعب نحن الأمهات وصحتنا تتعب من العصبيه من اساليب
اللا مبالاه من اتجاهكن
اتمنى قدرت أوصل للي كل ام تحاول تفهم بناتها عليه
نحن نحبكن وما نتمنى الكن الا السعاده والتوفيق فحياتكن
ملاحظة: أنا يوم كتبت الموضوع حبيت اشرح
اللي تمر به اغلب الأمهات بهالفتره مع بناتنا المراهقات وعن بنيتيه
ترا هذا مب طبعها فديت روحها الدائم بالعكس نحن شرات الخوات والصديقات
ومتفاهمات لابعد الحدود وأنا ماصبر بدونها وأحاول افهمها ان كل شي له حدود وله وقت
بس هالحوارات اللي كتبتها تمر بها خاصه انها في فترة مراهقه يعني مرحلة تكوين
شخصيتها الاغلبيه يطلع عليهن طبع العناد والتمرد في بعض الامور
مراهقيييييييين << يعني شي خارج عن السيطرة هع
الله ايعينج
وان شاء الله المعلومة اتكون وصلت للبنات الصغنوناات
أنآ لـآ أم ولـآ هم يحزنون بعدني قآعدهـ عند أمي وأبوي ربي يحفظهم – -> صغنونهـ هع . .
والله وأنآ فسن الـ 20 إني أخآف من كل شي آللي بترد وبتقول إن زمنكم غير عن زمنآ آلرد لـآزم يكون لهآ
زمنآ مآ كآن يخوف شرآت زمنكم والله آللي بتقعد تفرق بين زمن امهآتنآ وزمن الحينه ما تقدر توفيه بزمن امهآتنآ
والله إني لو سويت آلغلط أندم والله أندم من الخاطر قبل لـآ حد يزخني أندم ووأفكر فأمي وأبوي وأقول نحن ليش
جي نسوي شو آللي ناقصنهـ أهلنا ربونآ وعطونآ آلثقهـ ومآ قصروآ علينآ وتعبوآ علينآ ليش نجآزيهم بالغلط ومحد
يسوى عشآن نحن نبيع تربية أهلنآ لهم . .
أنآ مآ أقول غير آلله يحفظنآ ويهدينآ ويبعدنآ عن آلشر يآ رب . .
الله يعطيني الحكمة الكافية ويسترها مع عيال اليوم