رحلة معاناتي … الحمدلله للصحة

السلام عليكم و الرحمه

بغيت اشاركم رحلة معاناه الولاده …
اولا: انا حمالي كان وايد وايد صعب و بخبركم شوي
انا حملت بعد 4 سنين و انا اتعالج و اسير دكاتر و مستشفيات … حد يقولي مافيييج شئ و حد يقولي الهرمونات و كل يقولي شئ غير … بعد ما خبرتني وحده الله يزاها خير عن وحده تمسح و سرت مسحت عندها و الحمدلله حملت ع طول … المهم نزيف اول 5 شهور و ابر تثبيت و حبوب تثبيت و نومه سرير لين الشهر السابع ….خوفوني بالولاده المبكره و مستحيل اتم لين التاسع … الحمدلله رب العالمين

الله يسلمكن كنت احس بألم فظيع في الظهر ما كنت اقدر امشى … قلت لا اذا ابا اربي والله يسهل علي لازم امشى… كنت اسير امشي ساعه على الكورنيش في الحر… ارد البيت كأني متسبحه… و الظهر وفتره المغرب اسير امشى في المولات…. بتاريخ 11-8 قمت من النوم نفسيتي تعبانه و كله اصيح من دون سبب … ايي ريلي يكلمني اتهازب وياه .. الساعه 4 العصر سرت اغسل البلكون و انا اغسل اقول يارب اني اربي و اخلص … الثقل فضيع … المهم خلصت الساعه 6 ( من زود النظافه خخخ) سرت اتسبح الا احس شئ ينزل شرات الماي اقول لا لا ها من ماي الغسيل … اتصل ع طول بكاميليا و احدد موعد طواري و ادش عليها … قالت لي لا انتي بتربين على تاريخ 19 -8 لانه البيبي باقي له نص سم وينزل في الرحم … وانا سايره البيت اقول حق ريلي نزلني في الوحده مول … و بالفعل نزلت وكانت الساعه 8 و نص تقريبا
يلست امشى نص ساعه الا الماي زااااااااااااااااد مع الم في الظهر … و تقلصات خفيفه …. قلت حق ريلي ( مسكين هو بروحه ما يفهم في سوالف الحريم ) قالي ياله الكورنيش يمكن ولاده قلت له لا مستحيل ع اساس كلام كاميليا …. سرت البيت احس بتعب يزيد …. المهم تميت الليله هاي و الماااي ينزل و انا ع ااساس كلام كاميليا انه بعده الولاده … و طول الليله هاي وانا اتعور و ريلي يقولي قومي بوديج وانا اقول ابدا هاي مب ولاده اسير شو اسوي
عرفت خالتي بثاني يوم اني تعبانه ( لاني لازمت غرفتي لا طلعت و لا كليت ولا شئ كل راقده و مالي خاطر على شئ) الساعه 11 بتاريخ 12-8 بعد ما تعشوا خالتي وعيالها … ازقرها و اقولها السالفه جيه جيه … قالت لي هاي ولاده خلاص قربتي … عاااد ساعتها انهرت ويلست اصيح … شليت اغراضي و شرات ما قالت لنا لمعه الماسه جهزت شنطتين وحده صغيره وحده كبيره
المهم وانا سايره المستشفى اقرا الزلزله ع بطني و ايه الكرسي
اتحرا بوصل المستشفى و بربي
دشيت الطواري … فحوصات و كشف و ما ادري شو … قالوا انتي بتربين باجر في الليل و او بعد باجر … الرحم مفتوح 4 سم
يسووون تخطيط الا نبض الياهل خفيف و تعبان … شو سوولي ولا شئ
نيموني عندهم في غرفه مشتركه ( اونه ماشئ غرف فاضيه)
وانا مقهوره تميت ساكته وريلي يرابع مسكين عشان حجره عاديه بس اكون بروحي …ماشئ الغرف فوووول
اتصل بأمي و اختي الين وصلوا كانت الساعه 1 و نص … تيلس اختي عندي و امي و خالتي رجعوا البيت … المهم كل ما كان ايييني ألم كانت اختي تحط ايدها و تقرا… و على هاي الحاله الين الساعه 3 الظهر وانا اصيح من ألم … مره امشي و مره ارقد مره امشي و مره ارقد … كنت امشي و امسك باليدار يوم تيني التقلصات اوقف اخذ النفس… و على هالحال الين وصلت حدي و قلت لهم خلاص انا بربي … قالوا لازم نفحص نشوف كم سم فتح… يدخلوووون ايديهم اقسم بالله احس روحي بتظهر وهي تقول تو الناس 5 سم … أصلا نحن ما عندنا غرف توليد جاهزه الحينه كلها فوووووول… انا كنت ماسكه عمري الا يوم قالت جيه يلست ابكي … قهر …مستشفى هااااك كبره ماشئ غرف توليد جاهزه

وانا اصارخ من القهر و الالم …. الا اسمع ( نميسالشمناليشلامينسال) يلست اتصوخ الا (تنسنمشيالمشنساي شيسمنالشمنيال) لغه مب مفهومه الا صوت ثاااااني لحرمه ( نيتالشنيتنةيبىاتل شنيالنشل) عرفت انه الحرمه الي عدالي بالغرفه ريلها زايرنها …. اصرخ صرخه وحده اووووووووووووووووووووووووووووووووووووووووووف ما ابالغ انه ان قلت سمعها هل المستشفى كلهم… من القهر انا استويع و الريال يالس عدالي ماشئ بيني وبينه الا هالستاره…..

الساعه 5 اضرب الزر ع النيرسات … واقولهم انا بربي خلاص … ترا بربي في الغرفه هنيه و اصيح و ريلي وامي و خالتي و اختي عدالي وتقولهم هي تتدلع ما بتربي احينه بس بوديها غرفه ولاده تريوا الين اشوف في غرفه فضت او لا… الساعه 5 و 10 الا يقولون غرفه فضت بسرعه بسرعه قبل ما حد يشلها … شو نحن وين قاعدين … الساعه 5 وربع الا انا في الغرفه … شرات ما تعرفون تبديل و ما ادري شو الا احس شئ يطلع اخبر النيرس تقولي لا لا بعدج انتي
جان تشوف النبض تصارخ تقول بيبي تعبان بيبي تعبان … تضغط ع الزر الي يم راسي تيي نيرسيتين راووووني الويل قالوا هاي فاتح 10 خلاص ولاده … و البيبي نبضه خفيف لانه الماي الي ع البيبي خلص ماشئ واذا تم بيختنق

خلاص احس مافيني حيل وفيني لوووعه الا تقولي بيدج انتى حياة بيبيج تبينه يعيش بوش….وانا اصيح واحس انى في عااالم ثاني.. واقول في بالى خساره تعبيه في الحمل .. و حاطه في بالي انه خلاص مابيحيى .. وانا يالسه ادفع .. الا تقووول مبرووك ولد ولد … والله اني نسيت التعب و الالم الي مريت فيه …شليت راسي و شفته جان يحطونه ع صدري ( حسيت اني ملكت الدنيا و مافيها) الا ريلي يشل الكاميرا و يقولي مبروووك يلست اطالع ابغي اتأكد انا صاحيه والا لا هاي كاميرا والا يتخيلي (خخخخخ اشياء محرجه طلعت في التصوير ) الا انه كان يصور… و هو مستانس يقولي الحمدلله ع السلامه …

طلعوني بعد ساعه ونص لغرفه عاديه لانه غرف الفي اي بي زحمه…. زحمه؟؟ هيه جيه يقولون … يلست في غرفه عاااديه يوووم كامل … وهم لايخلون الواحد يرتاح يضربون بالباب يوم ينظفون والا يسولف عند بابج وانتي راقده … ماشي مراعاه

الله يسلمكن خذوا البيبي … سووا فحوصات الا يقولون يمكن يضربه التهاب في الدم لان الماي يومين ينزل.. غلطه يوم يتي ما المفروض يحطون لج طلق صناعي لازم توليد ع طول… قلت منوه غلطته هاي …قالوا لي انتي انتي ما نبهتينا انه الماي لازم ماينزل اكثر عن 21 ساعه وانا نازل اكثر … قلت لهم مكتوب في التقرير الطواري … اخر شئ قالوا ما انبهنا انه في التقرير …بناخذ البيبي بنسحب من الحبل الشوكي و بنسوي مزرعه … وانا احس عمري مب فاهمه شئ …اعرف انه الي يسحبون من الحبل الشوكي يييله شلل … قالوا لا الدكتور شاطر و الاطفال وايد ساحبين منهم …. توكلت على الله … وقلت الله الي معطني اياه وهو الي يقدر ياخذه مني … المهم خذوه عندهم

و ساعتها حصلولي غرفه في اي بي وياليت هم ما حصلوا …. بنات الغرف العاديه والله انظف ع الاقل مافيها نمل … او الكراسي مافيها حشرات شرات الكنب… ما ادري نظفوا و بعده يطلع و كنت خايف لو ايبون ولدي عندي يدخل في اذنه او خشمه .. وع ليتني يلست في الغرفه العاديه جان احسن

ولدي الحينه في الشيشه … ما يخلوني المسه … الا بعد موت … ارضعه 5 دقايق ويقولون لي خلاص… و المفروض ييلس اكثر …عشان ماييه الاصفرار

بعد 5 أيام طلعوا ولدي من الشيشه مافيه شئ الحمدلله … اشوف ويه الا اقول حق خالتي ولدي اصفر … قالت ها الاصفرار … ونادينا النيرس وخبرناها فحصوا الدم الا حصلوه فيه … ( لو انا ما قلت لهم ما يفحصون؟؟؟) يابوا الليت و ماكينه حاره وحطوه عليه يومين … و عشان التهاب الدم … عطوه انتي بايتكس (مضاد حيوي و هو صغير و مافيه شئ) كل ما ابا ارمس الدكتور يتهربون يقولون الدكتور عنده عمليات عمليات ( قصاب ها مب دكتور)

و ع فكره نزل وزن ولدي 200 غرام وهو عندهم…

وقبل مااطلع بيوم قالوا لي ياله طلعي نبا الفي اي بي .. في مرضى ثانيين
قلت مابا اطلع الين يطلع ولدي وياي… وتراني دافعه دافعه
(في اي بي النمل و الحشرات )

والحمدلله … ولدي الحينه عندي و بصحه والحمدلله رب العالمين

مبروك عليج البيبي ويتربى في عزكم ان شاءالله
والحمدلله ع سلامتج يالغاليه وماتشوفون شر ان شاءالله

حبيبتي الف حمدالله ع سلامتج وسلامة البيبي قصتج صدق معاناه عقبال ما تفرحين به ان شاء الله وهو معرس

االحمـــــــــــــد لله علي الســـــــلامه

و يتربــــــي في عزج حبيبتـــــي

والله يحفظــــــه لج من كــــل مكرووه

الله يبارك في حياتج…. والله يسلمج من كل شر ان شاء الله

الله يسلمج ….
أميــــــــــــــــــــــــــــــــــــــــــن

مشكوره الغاليه

ألــــــــــــــــــــــــــــــــــــ مبرووووووووووووووك ـــــــــــــــــــــــــــــــــــــــــف
مبروك ما يااج ..

و يتربى في عزكم .. أهم شي ان ولدج في حظنج الحين و الا الباقي ما يهم ..