بسم الله الرحمن الرحيم
كيف الحال خواتي
الله يقومنا بالسلامة جميع ونفرح في اطفالنا ابا اخبركم عن تجهيزالمستشفى
وابا اقولكم شي
الحمدلله الاطفال نعمة من رب العالمين واكبر فرحة في الدنيا واكيد الكل عارف بمقدار فرحة اي ام واب بقدوم مولودهم طيب ليش نسوي الزينة في المستشفيات ؟؟؟
بنات انا ضد هالشي لاسباب وعشان كذا كتبت هالمووضوع
الشي الاول .. نفسي ,انساني :
في المستشفى يكون فيه كمن شخص مريض كمن شخص يائس كمن شخص حزين لفقدان عزيز كمن حرمة محرومة من الخلفة تخيلي اش شعورهم يوم يشوفون البالونات والزينااات معبية الممر !! اكيد هالشي بيحز في خاطرهم وبيتذكرون كيف انه هم يتالمون وفي نفس الوقت فيه ناس مبسوطين ومستانسين ومحد حاس فيهم
الشي الثاني ,, اتقاء للعين والحسد
فيه ناس مجرد ماتعرف انه ربيتي تحس بالحسد وش عاد ييوم تشوفج انتي والبيبي وبعد مزينة ومرتبة ومقتدرة تحس ان الله عاطيج كل شي
الشي الثالث ,,, اسراف في غير محله
يعني زينة المستشفى تقريبآ اغلبها تنعق وكلها بحدود يوم او يومين وابسط شي فيها مبلغ وقدره مثال البالونات الي تزين الابواب لاتقل عن خمسمية درهم ولو الخمسمية اشتريتي فيها شي لطفلك افضل
الشي الرابع … رضا الناس غاية لاتدرك
يعني مهما سويتي وجبتي وحطيتي الناس راح تنتقد ولو ماحصلو شي ناقص بينتقدون بالكمال بيقولون بطره وغييره وبالتالي مافي فايدة من الي سويتيه انتي فرحانة بولدج لو كنتي في خيمة واهلج فرحانين فيج وفي البيبي وسلامتكم يعني البالونات والزينة والقلاسات الطقم والمفارش مالها اي فايدة
الشي الخامس .. لله مافي ولشيطان كثير < مقولة
عقب مالوحدة تولد بدل ماتجيب بالونات وزينات بخمسمية درهم ولا حتى ثلاثمية تتصدقين فيها للهلال الاحمر
تاخذين بها ذبيحة تقسمينهها ع المساكين والمحتاجين يمكن يدعون لكم دعوة تسعدكم العمر كله
بتقولين انا تصدقت وهاذي غير الصدقات بقولج وشو يمنع كل ماحسيتي بتسوين شي تصدقيبه
واخيرآ انا مو ضد مظاهر الفرح انا مسوية مفارش طقم وزينة وتوزيعات …. الخ بس بعون الله بحطها في البيت اول شي لاني بستخدمها طول فترة نفاسي وبحطها داخل بيتنا
ييعني خلي تجهيزاتج للبيت واخذي لبس لولدج قد ماتبغين مابقولج اسراف لبسيه بس عقب مايكبر شوي وتصغر عليه تصدقيبها على صحة ولدج وصحتج
سوي توزيعات وهدايا بس لاتنسين الاطفال اليتامى والمحرومين فرحيهم ولو بشي بسيط وخلي توزيعاتج شي تكسبين من وراه اجر ولو كان بتعليق ورقة فيها ذكر او دعاء على علبة التوزيعات
اول ماتدخلين المستشفى بتربين بدل مايتمون يرتبون المفرش والزينة وياعالم شو بيستوي في الولادة خلي حد من اهلج ياخذ كيس ماي بارد وكيك ويوزعه على العمال في الشارع تكون دفعة بلاء عنج وعن ولدج وتيسر عليج في لحظة تكونين احوج ماتكونين الى الله وفضله ورضاه عليج
واخيرآ اقولكم الله يقومكم بالسلامة يارب وتفرحون في اطفالكم ياااارب سالمين معافين ويتمم عليكم وعلي وياكم ولاتنسونا بالدعاء
الواحد يفرح في بيته ابرك …
الله يسهل عليج وتشوفين ضناج بين ايدج بصحه وسلامه
والمقصود بالبائس هني افرضى وحده توفى ضناها وهي تولد وبالغرفه اللي احدالها وحده مسويه زيطه وزنبليطه شو بتكون نفسيتها وحليلها
الوحده تفرح بس الفرحه مب بالزينه الفرحه بالقلب
الحمد لله نحن شعب مرتاح ودولتنا مامخليه علينا قاصر فاتحه الحكومي والخاص لكل الطبقات
في شعب وحليلهم يولدون تحت قصف الدبابات
عيوون حبوش فديتج انا قلت يائس يعني قالوله مافي امل تجيب اطفال قالوله مافي امل تنجح عمليتك او اي سبب غيره
انا والله ماخذة كل شي انا مستحيل اسوي شي في المستشفى مابعيش هناك ولو سويت بيكون بس مفرش بسيط على سرير في المستشفى واي شي بيكون داخل الغرفة
ومن قاللج انها ماتكلف ؟؟ الظاهر ماجهزتي انا احس ان تجهيز الولادة كلفني نفس تجهيز عرسي
اذا مفرش النفاس بس حول اربعة الاف هاذذا لو كان عادي
ع العموم كل واحد حر وله قناعته والنصيحة لوجه الله لو حبيتي تاخذين فيها جزاج الله خير مابغيتي لج مطلق الحرية
بس اعتقد هاي حريه شخصيه يعني الي يحب المظاهر والمبالغة فهالامور يسوي عادي
والي مايحب مايسوي
يعني اولا واخيرا حريه شخصيه
وتنتي حبيتي تطرحين رايج وانا معاج