تجربتي والحل مع المناطق الداكنة بالجسم

مشكله اغلب البنات السمراوات والحنطيات وحتى البيضات

مشكلة تأرق البنت انا حاسه فكل وحده مقبله على زواج أو حتى مو مخطوبة

إلا وهي ((( اسمرار بعض المناطق فالجسم ))))
مثل المناطق الحساسه – الأكواع والركب – مفاصل الأصابع – أماكن أخرى

انا عانيت منها وجربت أشياء كثيره مرره لدرجه كانت تسبب لي إحراج وقللت ثقتي بنفسي شوي

رح اقولكم كيف تعاملت مع الموضوع وكيف انحل عندي .. وأتمنى من كل بنت عندها نفس مشكلتي تطبق اللي أقوله بدون تكاسل عشان انا أبي الخير لكم وأتمنى ان كل بنت تكون واثقه من نفسها وراضيه وجميلة أيضاً

أولا : لازم البنت الخليجية تقتنع أن لوننا اللي خلقنا ربي عليه لون جميل
( أقصد اللون الحنطي أو السماري ) لون جميل ولله والدليل أن البيضات والاجنبيات يموتون ويتمنون هاللون بس يسوون تانات
فلازم نحب لونا اول ونقتنع أنه حلو لان إحنا بثقافتنا مزروع فينا أن الجمال هو البياض وهذي فكرة خاطئة الجمال عمره ماكان لون
وللأسف الرجل الخليجي نفس الفكره يحب البياض رغم انه اسمر واللي حوله كلهم سمر بس مانلومه عشان هذي فكره فينا إحنا كمان
بقولكم بعدين كيف تغييرين فكره الرجل بان الجمال مو باللون

ثانيا : لازم نعرف أن منطقتنا الحاره وبالنسبة لي الجافه يعني عوامل البيئية لها سبب بتصبغ بشراتنا
وأيضاً طريقتنا بالغسيل بعد قضاء الحاجة من كنا صغار أيضاً سبب فاسمرار المنطقة الحساسه

هذي الاسباب تعطينا أمل أن لكل مشكله حل بما ان لها اسباب

ثالثا : لازم تعرفين أن مالك ذنب بالتصبغ حتى لو ما انحلت المشكلة مالك ذنب فانت جميله مهما كنت

رابعا : التطبيق العملي

متى بتحسين بالرضا عن نفسك ؟؟ إذا سويتي اللي عليك

فلازم تشدين حيلك وتشتغلين على نفسك عشان تكونين مبسوطة من النتائج

الاستمرار : بليز البنت العجازه تقفل الموضوع لانه الخطوات يبيلها بنت ترغب فعلا بالتغيير ورح تطبق الخطوات بدون ملل أو كلل

1- اول خطوه شيلي البانتي والبسي شورت قطني ابيض بالبيت ولا تلبسين ( برا ) ضيقه والأفضل شيليها كلها أو دوري شي مريح
ليش ؟؟ السبب ان الكلوت يسبب حزوز ومع الوقت تصير حزوز سمرا ويسبب احتكاك الفخذ وهذا أيضاً يسبب اسمرار وأيضاً تسبب كتم للمنطقة وتعرفون أنها رطبه فهذا الشي يسمر مع الوقت فلازم نهويها

2 – توقفي عن شيل الشعر بالموس للمناطق الحساسه والإبط شيلي بالنتف أو الليزر مع ان الليزر نفس الشي بس على الأقل تجلسين من مده لمده ماشلتي بالشفره
ليش ؟؟؟ الشفرة تسبب اسمرار للمنطقة

3- لمن تخلصني من قضاء الحاجه أعزكم الله. نشفي المنطقة بفوطه فاتحه أو مناديل مرررررره انتبهي لاتدخلين الحمام إلا وإنتي متأكده ان فيه منشفتك أو معاك مناديل تنشفين فيها :12
ليش ؟؟؟؟ الرطوبة مع الوقت تسبب اسمرار للمنطقة

4- الترطيب ثم الترطيب ثم الترطيب :

يوميا لازم يكون بدون تفويت يوم كانه مضاد اعتبروه

خلطه مكونه من
ملعقه فكس – علبه كريم جلسرين – فنجال زيت لوز الجسم – فنجال زيت جلسرين

https://alfaris.net/up/87/alfaris_net_1373688463.jpg

تخلطينهم بعلبه وتستخدمينها على جسمك كامل بدون الوجه
وتحطون معاها عصير ليمونه بس أثناء الاستخدام تعصرين آلِيمونه
ما تحطين عصير اليمون بعلبه الخلطه عشان ما تخرب
ويوميا حطيها واجلسي ساعتين أو أكثر وحممي جسمك بعدها لان رائحتها مو حلوه

وبعد السباحة حطي بجسمك زبده الشيا. أو لوشن الشيا من لوكستيان

التبييض للمناطق الداكنة :: أولا بعد السباحة بساعه أو ساعتين حطي بالمناطق السمرا ((زي التونيك )) اسمه laroche-posay
Sensi white
Lotion

هذا الشي يخلي بشرتك مستعده للتبييض

بعدها بشوي خمسه أو عشره دقائق
تحطين كريم التبييض eldoquin forte 4% cream

تحطينهم على المناطق السمراء زي الركب – أكواع – الابط -مناطق حساسه من الامام والخلف لكن كوني حذره

انا اقولكم كذا عشان إحنا بنات وهذي الأشياء مهمه لنا وأنوثتنا فما نستحي

التبييض لازم يضل اقل شي على جسمك 3 ساعات وما فوق ومرتين باليوم مره بعد السباحة ومره قبلها بوقت كثير
وانتبهي من الشمس فهذا الكورس حق العنايه لازم تحطين ببالك انو مأكو شمس ثلاث شهور مو عاد مره بس حاولي تبعدين عنها

الرجيم : إذا كان عندك شوي وزن زايد فحوالي التخلص منه لان السمنة تزيد السترتش مارك وتسوي سمار بالجانبين وبالركبة تغمقها أكثر
اتمنى من كل البنات يطبقونها بدون تعب

وانا من تجربه مبسوطه منها وكل مره اشوف الفرق والتغيير بس انقطعت عنها عشان شبكتي والسفر بس الحين فاضيه خلينا نرجع سوا ونسويها واي استفسار انا حاظره للغالين.