اليوم حابة أخبركم عن تجربتي في نزول 12 كيلو خلال شهرين وبس عن طريق هالمدونة الحلو
وهذا الريجيم بدون اشتراك في النادي ودفع مبلغ وقدره ، ولا اشتراك في شركة أغذية ودفع مبلغ وقدره
يعني ريجيم ببلاش وصحي
( وهذا الموضوع اللي انا عن طريقة نزلت )
https://forum.uaewomen.net/showthread.php?t=334892
لو بتقرون الموضوع بتشوفون كيف ان ما عندي إرادة أبداً واليوم وبفضل هالمدونة اتحمست ونزلت الحمدلله
لأن انا ماحب احس اني مخلوق فضائي في البيت وفي الدوام عشان امشي على جدول مثل نيوتريشن والا الكيميائي
واتذكروا ملاحظة واااايد مهمة :
اللي ينزل بسرعه يطلع بسرعة ، والنزول السريع يؤدي لأعراض مثل تساقط الشعر ولا قدر الله مشاكل في الكلية ، انا اللي صارلي اني نزلت في الشهر 6 كيلو ..
قبل : يوم كنت انزل بسرعه لو أخبص ازيد 3 او 4 كيلو من يوم واحد
الحين : يوم انزل شوي شوي … والله اني سرت عرس واكلت كل شي .. الخضر واليابس على قولتهم بدون بيبسي وحلويات .. والله والله والله اني ما زدت ولا شي بالعكس عقبها بيومين وزنت لقيتني نازلة كيلو
انا بكتب اللي صارلي ( أو بمعنى أصح جدول الريجيم مالي )
1- افتح موضوع في القسم واكتب يومياتي فيه عشان احس ان حد يراقبني ويشجعني
2- أسوي توقيع شريط الوزن لأنه يشجع وااايد
3- أمشي على الخطوات اللي انا كاتبتنها في موضوعي ( الرابط فوق )
4- ما احرم نفسي من شي أبدا ً وآكل كل شي بس بحدود ولو يوعانه وايد احاول اعوض بشي يشبع ويكون في نفس الوقت قليل السعرات الحرارية
مثال : اكل 3 خبز رقاق ( عاد اخذ 2 بيض بالجبن + 1 دبل جبن ) + 1 بيبسي دايت ، في هذي الاكلة المعده تنترس أكل وماي واشبع بسرعه وكل شي خفيف وصحي … ( واذا بتحاسبين وايد اشتري جبن مثلثات قليل الدسم وعطيه للإيراني خله يستخدمه ) واذا تسوونه في البيت فكيتوا اعماركم
5- احاول امشي لو نص ساعه 3 مرات في الاسبوع ( طبعا انا امشي شهر وشهر لا ما أضغط على عمري ) المهم ما اعطي مجال لجسمي يترهل
6- اشرب شاي اخضر صيني وشاي اخضر وشاي الريجيم
7- حلويات موووووووول قطعتها يعني يمكن اكلت في هالشهرين قطعتين باتشي عن خاطري وفي العرس اكلت لقمة كيك
8- اشرب ماي وايد
9- دايماً عندي توست اسمر وجبن وبيض وطماط .. يوم أيوع لو باكل 10 قطع توست مع الجبن والبيض بشبع وما اضطر اكل شي من بره او دسم
10- واللي الكل يحبه …. ماكدونالز وربعه … يوم اطلب اطلب بس السندويتش اللي في خاطري ومب الوجبه كامله … يعني لا بطاط ولا بيبسي … سندويتش وماي … والسعرات الحرارية في هالسندويتش ما بيتعدى 400 سعره
11- في البرياني والصالونه وهالسوالف ما استخدم زيوت نهائياً واكل منه ويكون صحي وخفيف ( يعني ماشي حرمان ابدا في هالريجيم )
12- اكتشفت ان السعرات الحرارية في الزبدة قليلة وااااااااااايد واقل من زيت الزيتون والزيوت العادية ، ويوم اقلي بيضه او ثنين اقليهم في 1/4 خاشوقة زبدة ، وحتى لو في الطبخات استخدم الزبدة وبكميات قليلة قد ما اقدر
13- شوربة ماجي بالحروف … كانت ونيسي في هالريجيم ومن تجربتي مازادت وزني وكنت اشربها اوقات بين الوجبات
14- الريوق في الدوام … قبل لو كنت اكل سندويش من هذا ومن هذاك .. صرت اكل نص من هذا ونص من هذاك
15- اشرب سوائل وايد يعني عصاير فرش وربعه
16- لا لا لا لا لأدوية الريجيم وكريماتها .. لا فايتوشيب ولا بارتنر لايف وغيره ، هالسوالف لو يقولون انها طبيعيه 100 % صح ما بيبن تأثيرها الحين لكن عقب سنين شوفي البلاوي … انزلي واضعفي طبيعي وعلى راحتج
17- لازم أوزن نفسي كل اسبوع ، عني انا اوزن كل اثنين وحاطه لعمري اني انزل 2 كيلو في الاسبوع ، وأرد اوزن يوم الخميس يعني في نص الاسبوع عشان اشوف عمري لو مخبصه بيكون عندي فرصه 3 ايام اني اعوض واوصل للهدف اللي هو 2 كيلو في الاسبوع .
18- يوم يكون خاطري في كتكات مثلا أقول في بالي :
1 كتكات = 8 خواشيق مجبوس = 3 سنتدويتشات توست اسمر مع جبن او بيض ( او وجبه تحبينها )
اقول يعني هالكتكاته ما بتشبعني لكن ببدلها بهالأكل اللي في خاطري وبشبع .. هني انا اقتنع من خاطري
19- دعوات اخواتي الحلوات وردهم في موضوعي ان الله يثبتني وااااااايد فادتني وشجعتي واحس ان الله يستجيب للدعوات لانها من القلب وما يتريون مني شي حليلهم … بالعكس يبون لي الخير
وقبل عفانا الله ارقد في الجدر عقب احس اني شبعت ..
يعني صارت مسألة تعود والمعدة صارت تاكل على قدها
ادري طولت عليكم لكن هذا كان ريجيمي وهاي الاساسيات اللي اعتمدت عليها ..
والله لو مشيتوا عليها بتضعفون وطبيعي
و ان شاء الله توصلين للوزن اللي تتمنينه
بالتوفيق يالغالية و عقبالي
.gif "12 (42)")
حمستيني و الله ان شاء الله انزل انا بعد
صراحه حمستيني بعد ما اتكاسلت لاني قبل نزلت من 78 الى 69 بعدين وقفت رياضه و رديت اكل وزاد وزني الى 74 وهذا بسبب اجازة الصيف من وقته وقفت
وللحين امارس الرياضه بشكل مقطع
المشاركة الأصلية كتبت بواسطة أم_سواف 
و ان شاء الله توصلين للوزن اللي تتمنينه
الله يسمع منج يالغاليه …
المشاركة الأصلية كتبت بواسطة ميسون_26 بالتوفيق يالغالية و عقبالي
حمستيني و الله ان شاء الله انزل انا بعد
يلا شدي حيلج وخلي عندج الارادة .. وانشالله يتحقق اللي في بالج
المشاركة الأصلية كتبت بواسطة ام السنافر صراحه حمستيني بعد ما اتكاسلت لاني قبل نزلت من 78 الى 69 بعدين وقفت رياضه و رديت اكل وزاد وزني الى 74 وهذا بسبب اجازة الصيف من وقته وقفت
وللحين امارس الرياضه بشكل مقطع
انا من سنتين سرت النادي ونزلت قياساتي وما نزل وزني وعقب احبطت ووقفت ، ورد وزني دبل
الحين هالطريقه احسن وأوفر وصحية أكثر .. يلا كملي حبيبتي المشوار والله يوفقج
المشاركة الأصلية كتبت بواسطة طير الود ان شالله يالغاليه بتشجيعكم