اللي تقول انه الطلاق مب حل… تعالي بغيتج شويه لتربية طفلك

الشخصيات :
أختي
ريلها
حبيبة ريلها اللي هي من اهل ريل اختي
اخت ريلها الصغيرة (ربيعة حبيبة ريل اختي)
اخت ريلها الكبيرة ومتزوجة من أخو حبيبة ريل اختي
أخوان حبيبته

السلام عليكم ورحمة الله وبركاته…

أختي سلمكم الله متزوجة من 6 سنوات … ما عندها عيال… السبب عقم فالزوج… الدكتور قاله تحتاج لعلاج …

المهم… من سنه تقريبا اختي كانت مسافرة ويا خواتي وامايه ويوم ردت من السفر … ريلها متغير عليها … انزين شو فيك شو صاير؟؟؟ ما يرمس… اختي اتقول يوم سافرت هو ولا مرة كلف عمره انه يتصل فيها .. كله هي كانت تتصل…

اختي مووول ما كانت مقصرة لا وياه ولا اهله … والكل يشهد… المهم.. يوم عن يوم قام يبتعد عنها .. هو يداوم بالجيش.. يومين دوام واربعة ايام اجازة.. كان اول ما يرد من الدوام يرقد لين المغرب ينش ويتسبح ويتعطر ويظهر … وما يرد لج الا رابع يوم الفير (يوم الدوام)… اختي تتصل فيه وهو ما يرد … يوم من الايام رد من الدوام اختي اتجاتلت معاه .. وعصبت .. وهو موول مو مسوي لها سالفة … اختي حليلها كانت خاشة السالفة عن امي وابوي… وخبرتني انا لأني اختها الكبيرة .. وكنت اوجهها… بس بالأخير ما عرفت بشو انصحها.. وكنت اخذ بشور ريلي … وهو طبعا انصدم كيف نسيبنا فجأة جي استوى … المهم آخر شي ريلي قالي .. لا سمح الله صار شي من بين اختج وريلها منو بيتحمل المسؤلية … انتي .. لانج انتي اللي كنتي تنصحينها .. كان من راي ريلي انه انخبر ابوي …

وهذا اللي سويناه…. أبوي قال لآختي اصبري هاي فترة وبتعدي… اختي كانت اتصيح واتقول محد حاس فيني انا عايشة بعذاب…

ريل اختي ما كان يقفل موبايلة قبل .. بس اختي يوم بغت اتجيك موبايلة لقته مقفول. ويوم يرقد يحط الموبايل ف سدة المخدة … بالله عليكم منو ما بيشك؟؟؟!!!!!

المهم اختي خذت مفتاح سيارته وتوجهت للسيارة وجان اتحصل ادوية ممنوعة بالدوله .. هي ما عرفت انها ممنوعة … يوم سألته قالها راسي يعورني وها مهدئ ومسكن للألم… المهم طرشت لي الاسم وسويت سيرج وطلع ممنوع … وخبرتها … راحت وحلفته انه ما ياخذ هالادوية … وهو بس عشان يسكتها قالها اوكي… ومن ذاك اليوم قام يخش مفتاح السيارة …

وبعد فترة اختي دورت عالمفتاح وحصلته وراحت فتشت السيارة ابكبرها … حصلت ميموري كارد والادوية طبعا … و فواتير رصيد 100 درهم وفواتير مطاعم … للعلم انه اختي كل ما تطلب منه مبلغ بسيط 100 درهم يقول انا ما عندي كله البنك يسحبه …

هو مديون ب مليون ونص… مبذر البيزات عالسياير والفسق .. استغفر الله …

المهم اختي خذت الميموري واهني الصاعقة … صوره هو و وحدة من اهله فالشقة … بوس و حضن .. وتتوقعون الساعة كم الساعة 3 فالليل… والله والله والله …. اختي اتصلت فبيني وهي اتصييييييح .. وانا احاول اهديها بس ماشي فايده …

الله يسلمكم أخت ريلها الصغيرة ورا هاه كله … هي والبنت ربع … البنت قصت عليها وخذت رقم اخوها اللي كان يجمعهم علاقة حب بس اهله ما رضوا لأنه اولريدي اخته الكبيرة (حمية أختي) ماخذه اخو البنت واهل ريل اختي قايلين ما نبا اندمر حياه اربع اشخاص ف حال كان ف خلاف بين احد الزوجين…

المهم ريل اختي قام يطلع اخته الصغيرة وكل يوم يمشيها … واختي مستغربه .. هو اصلا ما يداني اخته كيف فجأه جي استوى ؟؟؟؟؟

المهم مرة اخته الصغيرة اتجهزت وظهرت … واختي من جامة حجرتها اتراقب .. شافت ريلها امبركن السيارة عند الدكان وهي راحت له مشي…. !!! متخيلين الوضع … كيف جي .. هذا اخوها مو حد غريب… ليش بالخش والدس؟؟؟؟ ويوم اتصلت فيها وسألتها عن مكانها.. هاه كان ردها :" رايحة لندن … شو تبين"

عقب اختي اكتشفت انها طالعة ويا اخوها وحبيبته….

المهم عقب فترة رجع البيت ومعاه ورقة لا مانع من الجيش انه يتزوج البنت… البنت بدون … وهي اصلا تبا مواطن لأنه مثل ما تقول عشان مستقبلها…

والاسباب اللي ذكرها فالطلب… انه حرمته (أختي ) من 9 شهور ف بيت اهلها… وما تباني واحن امورنا وصلت للطلاق.. وانا ما عندي امكانية اخذ مواطنه بسبب غلاء المهور…
المهم اختي سحبت الورقة … قام ضرب اختي وشد شعرها يدام امه واخوه واخته … وسحب الورقة منها…

وعقب اخته الصغيرة حست بالذنب واعترفت بكل شي لأختي… أختي خططت ويا حميتها الصغيرة انها اتسجل كل مكالمات البنت … المهم بعطيكم نبذه عن الكلام اللي قالته …

" انا لو "فلان" طلب مني اني ارقد وياه والله لاسويها عشان احمل وبعدين غصبا عن ويهم بعرس"
" انا امي اصلا تعرف السالفة … وهي مساندتني"…
"اخوج يمر علي عقب الدوام ونروح العيادة عشان يتعالج "

المهم هاه كله مسجل والادله كلها عندي فالميموري كارد …

المهم اخته الصغيرة اعترفت انه هو مأجر شقة بالشارقة ويروح اهناك … البنت اتداوم بدبي وساكنه بالذيد … يعني مكان الشقة استراتيجي…

المهم اخوان البنت عرفوا بالسالفة بدال ما يلعنون خيرها … قاموا يقولون حق اهل ريل اختي … انتوا لا تضغطون عليهم انخاف يشردون ويتزوجون بالسر…

ماتوا الريايل… شو هالكلام ؟؟؟ انتوا اذا مب رايمين اتيودون اختكم فاحن كيف انيود الريال؟؟؟؟؟؟
المفروض .. يسحبون موبايلها ويخلونها تنثبر بالبيت … ويهزبون امهم اللي ساعدتها…

المهم عقب فترة

أختي قالتله انها تعبت من هالحال وبتخبر الاهل … هو رد عليها : "انا لو اذبحج انتي ما بترمسين"

هاي غلطة اختي انها مووول ما ترمس وتخبر حد… بس ابوي يعرف كل التفاصيل

ابوي طفر منه … وعزمه عندنا عالغدا … واهني فاتحه بالموضوع … ريلي يقول كان وايد بارد … ومول مب مستحي ع ويهه… ريلي قال انا اشك انه ها بيتعدل….

عطيناه بعد فرصة .. بس هم ما تعدل… ومرة اختي قالتله انا خلاص طفرت ودني بيت اهلي ويوم تباني تعال مر علي … قالها اوكي .. نزل اختي وهي كملت شهر عند اهلي ومايا وما خذاها … لين ما امه يت وترجت امي وردت اختي بيتها…

اول ما رجع البيت شاف اختي فالحجرة … قام وشل كل اغراضه .. حطي تحت كل اغراضة مليون خط… وطلع من البيت … محد يعرف وين يروح … اكيد شاري له شقة … ويسوي المعاصي اهناك….

احين اختي كملت شهر وهي على هالحال… من فترة بس مخبرتنا انه ريلها طلع من البيت وما رد لين يومج هذا …

لاتسألون وين اخوانه …. كل اخوانه نفس الشي … فسق وكفر.. اللي يرقد مع بنات … واللي يشرب لج الخمر … بس اوكيه ويا حريمهم

انا ابا اختي تفتك منه لنها بعدها صغيرة … وهم حياتهم كلها فسق في فسق .. الله يهديهم …

واختي تحمد ربها انها ما عندها عيال منه