السموحة لا تزعلون مني بنقطع لفترة عن المدونة/ mini cake من مطبخي من مطبخي

صباحكم محبة وعبادة وطاعة بإذن الله .
اشتقت لكم لاني من فترة ما نزلت موضوع بعد موضوع الكب كيك الغريب . عزيزاتي السموحة منكم بنقطع على المدونة حوالي أسبوعين . لكن بحاول أدخل كل فترة عسب أرد على الرسائل الخاصة وعلى الأسئلة الي في ملف الاستفسارت منعاً للتأخر عليكم . والسبب ظروف عسى إن شاء الله تنحل وتفرج من عند رب العالمين . محتاجة منك دعوة بظهر الغيب .

وصفة اليوم . هي وصفة وعدتكم أنزل طريقتها من فترة لكن كثرة الانشغال أخرتني شوي. بإسم الله نبدأ:

Mini Cake

في البداية راح نحتاج إلى عدد 1 شريحة سميكة من الكيك الإسفنجي . وسبق ونزلت أكثر من موضوع مفصل عن طريقة إعداده وعلى الرابط أدناه أحدث موضوع .
https://forum.uaewomen.net/showthread.php?t=872970

وراح نحتاج عزيزاتي إلى كريمة خفق للتزين . وبعد راح تلاقين طريقة عملها على الرابط أدناه .
https://forum.uaewomen.net/showthread.php?t=797387

في البداية راح نحتاج إلى قص شريحة الكيك إلى قسمين بشكل متساوي . ويفضل استخدام الكيك البايت أو الي سبق وسوينه قبل بيوم . لانه يكون سهل في التقطيع . وبعدين راح نحشي الكيك بكريمة بسيطة وندخلها الثلاجة واهني شكلها أدناه .

واهني شكل مقرب يوضح الكيك المحشي بالكريمة

والحين عزيزاتي عندكم خيار من اثنين ممكن تستمرين في الميني كيك عادي بالخطوات الي بتشوفينها . وممكن انج تقصين الحواف في حال حبيتي شكل الميني كيك النهائي يكون محترف وشكله مرتب . وبتشوفوني في بقية الموضوع اتبعت الطريقتين .

الخطوة الي بعدها راح تكون دهن السطح العلوي للميني كيك . ضعي كمية من الكريما على السطح وطبعاً كمية الكريما راجعه لكم عزيزاتي ممكن تخلونها سميكة أو خفيفي .

وبإستخدام الأدوات المختلفة للتزين نحاول نخلي سطح الكيكة مستوي على قد ما نقدر .

واهني النتيجة في الصور أدناه . اهني عزيزاتي ماقصتي الحواف لاني الكيكة حق البيت وكانت كسويت بعد العشاء.

نبدأ نقص الكيكة لاني مثل ما تعرفون الوصفة هذي اسمها ميني كيك . في البداية بشكل طولي والحجم حسب الرغبة .

ونرجع نقصهم بشكل أصغر . عزيزاتي راعو أثناء القص تقصون القطعة ثنتين وبعدين مرة ثنتين وهكذا لحد ما توصلين للحجم الي تبينه يعني دايما ابدأي من النص .

واهني بدأ الميني كيك يظهر

على فكرة بالنسبة لشوكلاتة هذا هو the best mini cake ليش (سألتوني ليش؟) لاني الكيك هش وبيذوب في الحلج . وتوجد طبقة بنية من أثر خبز الكيكة وهذي الطبقة تعطي نكهة غير طبيعية مع الكريما .

واهني بشكل مقرب تفضلوا . صراحة وأنا قاعدة أسوي ما قدرت أقاوم أبداً فكلت هذي القطعة

الحين الmini cake على أصولة . إهني كانت هدية حق وحده من الأهل . اتبعت نفس الطريقة السابقة بالظبط . والفرق اني قصيت حواف الكيكة الكبيرة قبل ما أبدأ أقص بشكل أصغر. بإستخدام سكين منشار قصي حواف الكيك بعد ما تطلعينها من الثلاجة . واهني شكل الحواف اللذيذة .

وبعدين اتبعي نفس الطريقة السابقة من خلال دهن سطح الكيكة بالكريمة . وبعدين قصها بشكل صغيرة . واهني بعد ما خلصت الخطوات السابقة . وبما إنها هدية غلفت كل حبة بنايلون التغليف وهذا شكله.

واهني شكل الmini cake قبل ما أغلفة

واهني صور ال mini cake بعد ما انتهينا من الكمية كلها.

ما شاء الله (بشروا الكلمة صح) طلعت كميرة كبيرة . كنت مسوية شريحتين من الكيك يعني دبل جزء رصيتيه بهذي الصور.

وجزء حطيت عليها لوز وفروالة وكيوي .

تخبلوا عليها اتوقوعها جاهزة . بس يعرفون شيف شوكلاتة . أترككم مع الصور

واهني سويتها في مناسبة ثانية . بس الاختلاف مثل ما تلاحظون في التزين . سيحت شوكلاتة وشكلتها بأشكال مختلفة . وزينت ال mini cake أتترككم مع الصور

وأهني اختي طلبت مني أسويلها نوعين من mini cake كضيافة حق ربعها وحده كيكة بيضاء وكريما بيضاء بس بطبقات اكثر لو تلاحظون أربع طبقات من الكيك وأربع من الكريما وفعلا كانت وايد لذيذة .

واهني صوره مقربة لل chocolate mini cake

السموحة من كل وحدة زعلتها بدون قصد . وأعتذر لأي أخت شاله في خاطرها علي بأي شي . .
لو ساعدتج شيف شوكلاتة بوصفة معينة أو شاركتج بفكرة أو بسر أوعطتج حلول ولو بسيطة . ترها في هذي الفترة العصيبة محتاجة جداً لدعواتكم بظهر الغيب . عسى أن تكون دعوتج مستجابة ولا تنسي هناك ملك يقول ولك بالمثل .