بخبركم السالفة من أولها لين يومكم هذا عشان تعرفون و لا تظلموني و لا تظلمونه. هو لما تزوجها ودر دراسته و اشتغل و تسلف من البنك عشان يتزوجها. و فوق سلفية الزواج طول السنتين اللي عاشهم وياها حياتهم كلها سلفيات كان يتسلف بس عسب يرضيها لأنها كانت حنانة و زنانة و دلوعة و ما تخلي شي ما تطلب و لو ما يسوي لها اللي تبغيه تعصب. و تمو على هلحال لين ما الريال ديونه تراكمت عليه و طافت النص مليون و في الفترة اللي علاقتهم كانت متأزمة أنا و هو تعرفنا على بعض و حبينا بعض بس أنا ما كنت أعرف أنه متزوج.
المهم مرت الأيام و هييج ما رامت تتحمل ظروفه فطلبت الطلاق و أصرت عليه يعني عقب ما خلته مديون من راسه لكرياسه قالت له طلقني ماروم أتحملك. و هي ما كانت تعرف أني موجودة فحياته و أنا بعد ما كنت أعرف أشيا وايد عن ريلي لما عرفنا بعض قبل لا نتزوج. المهم هو طلقها و بعدين اعترف لي بكل شي و حسيته وااااايد تعلق فيني و استمرينا مال ٣ سنين عقب ملجنا و طبعا هو لين أحين يدفع الديون اللي خسرها على طليقته لأن فوق النص مليون درهم.
بس أحسه لين أحين متأثر بها باين من معاملته معاي. يعني من الناحية المادية وايد شديد معاي و يحاسبني على كل فلس أطلبه منه. نحن الحمد لله متفقين أنه جيبنا واحد يعني ما في فرق بين راتبي و راتبه و كل واحد فينا يساعد الثاني بس طبعا هو بحكم ظروفه ما يروم دوم يعطيني يعني لما أطلب منه أحسه يتنرفز و يسوي معاي تحقيق كامل بعدين يعطيني البيزات و عقب ضرابة.
أنا أنقهر لأن هو دوم يقولي أنتي أحسن عنها بس بصراحة أحس بالغيرة لأن هي وايد كان يدلعها و يتسلف عشانها و أنا مسكينة يذلني على الأمية اللي أطلبها منه.
و أنا مب مقصره معاه يعني شاركته في العقار اللي شراه و يالسة أساعده في العرس بس بعد يحاسبني على البيزات أحسه هو اللي يبغي يكون المسيطر و صاحب السلطة.
بس مادري أحسه في الفترة الأخيرة متغير يعني صاير يهتم فيني شوي أكثر و مرات يقولي ناقصج شي فيمكن هالتغير البسيط يساعدني أني أخليه يتغير أكثر و يصير أحسن لأني ما أبي يتأثر بطليقته اللي سوا كل شي عشانها و في النهاية تخلت عنه.
لأن مرات لما نتضارب يقولي لو مب رايمة تتحمليني صارحيني أنا ريال و عندي كرامة بس أنا أسكت عنه و أدوس على عمري و أعطيه الحب و الحنان اللي كل زوج يحتاجه من زوجته عشان يحس أني صج أحبه و أبغيه حتى لو كان أفقر واحد في العالم يعني أحرجه بطيبتي.
بس كيف أخليه ينساها يعني باين أنه وايد متحسس منها و أكيد يقول أخاف هاي بعد تسوي فيني مثل ما الأولى سوت فيني.
هو شآرنج وما مقصر معـآج وهو الحين ف آزمه ومديون لآزم يكون شديد ع البيزآت والمصروف ..
يعني استحملي انتي وما شاء الله عليج فاااهمه من كتآبتج وانتي الحين لآزم توقفين معاه عشان تزيد غلاتج عنده ..
وبعدها الله بيفرجها وبتسددون الدين .. وبتعيشون احلى حيآه ,’ فآنتي لا تغضطين عليه وآآآيد ..
ولا تقاارنييييييين عمرج بمطلقته انتي رضيتي تتزوجييينه توقفين معاه وبصفه وتساعديييه
وهو مقدر انه مقصر عليييج لآزم انتي تحسسينه انه آبدآ ما مقصر .. ولآزم تشكريييينه يوم يعطييييييييج
عشآن يعرف انج مقدره وضعه مهما كان الشي اللي عطاج ايآآه ..
الإنسآن في طبعه مآ ينقرص مرتيـن ،
و هو شـآف انه الحرمه لمآ يعطيهآ تصرف بالهبل ، آخر شي هو الي يتبهدل ،
و كل انسآن يتعلم من غلطه آلغآليه ، ،
و هو مب قصده أكيد يكون مقصر ويـآج ،
الي يسويه مجرد حرص لآ أكثر ،
و وآضح انج انتي بعد عآقله و مب هآك الزود تطلبين منه ،
و مقدره ظروفه ،
،
مآ عليه اختيه ،
اتحملي ليـن آلله يسر أموركم و يسدد ديونه ،
لأن و آلله الديون تكسر الظهر . . .
و كل هالـ حسآسيآت الي اتصير بينج و بينه ، كلهآ مجرد نتيجه طلع فيهآ من زوآجه الأول . .
،
آلله يفرج همومكم ،
عليكم بالإستغفآر اختيه . .
قآل الله تعآلى : ((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا))
،
و آلله يوفقج . . . 
حبوبة ريلج يحبج ….وتصير من بينكم تشاات عشااانه هو في هالحاال…..ولا تتخلين عنه….حبوبة ريلج ما يفكر بالثانية بالعكس انتي لازم تفرحين يوم تقولج هالكلام..ويمكن هو حااس فيج مثل ما كانت تسوي حرمته الاولية…
وانا عندي لج فكرة ليش ما تخبري ريلج انج تبين تشتغلين مؤقت..لين ما يصفى حساااابة…حسسيه انج تبين تسااعدينه…وان البيزاات ما تهمج….اهم شي راااحته..صدقيني ذيج السااعة رااح يكبرين في عينه…
والله يوفقج حبوبة
ربي يسعدج ..
الريال شارينج ويحبج ،، ويالس يحاول قدر الامكان ما يضايقج
الغاليه اصبري عليه وانتي روحج اتقولين هو متاثر من العلاقة السابقة
فله الحق انه ما يكرر نفس الغلطة
عادي دوم اتضاربي لين تاخذين الفلوس منه ،، ههه
مثلي ويا ريلي ،،
انا بعد جي كل ما اطلب منه (بعد ما يخلص المصروف اللي يعطيني) يسالني الف سؤال وين مصروفج ؟؟وليش؟حق شنو؟بخصم منج الشهر الياي هههه؟،، احس عمري مسوية جريمة ههههه وريلي المحقق كونان
عادي الغاليه الموضوع احسه بسيط جدا ،، ظروف صعبة مر فيها ريلج ،، وصدقيني اذا عنده ومو مديون بيعطيج بدون ما تسالينه
لا تخلين هالشي ياثر على حياتكم ،،حافظي على ريلج وبيتج
حبيبتي… أنا أبيج انتي تقرين مواضيعج اللي نزلتيها… شوفي كذا موضوع منزلة انج متضايقه منه و من ظريقة معاملته من "الناحية المادية"…
اللي قهرني فيه.. انه حتى بعد كل التضحيات المادية اللي سويتها له…. يقول لج بكل بساطة "لأن مرات لما نتضارب يقولي لو مب رايمة تتحمليني صارحيني أنا ريال و عندي كرامة بس أنا أسكت عنه و أدوس على عمري و أعطيه الحب و الحنان اللي كل زوج يحتاجه من زوجته عشان يحس أني صج أحبه و أبغيه حتى لو كان أفقر واحد في العالم يعني أحرجه بطيبتي"… كيف بعد إذا مب رايمه تتحمليني!!!! ليش انتي شو كنتي تسوين طول هالوقت؟؟؟ مب متحملة؟؟؟ لازم تقعدين معا اختي…
بس في شغلة ما فهمتها… في موضوع سابق قلتي ان العقار باسمج….و انج اشتركتي معاه في البيزات…لازم تتـاكدين غن العقار باسمج… ودي الأوراق الرسمية إذا كنتي في دبي اظن اسمهم مجلس العقار… و الله ما أذكر… بس لازم تتأكدين من هالشي…. أنا مب قاعده أخون فيه… بس حبيبتي… في وااااااااااايد أشيا تصير في الدنيا… و أنا أحس في كل مواضيعج الحب هو اللي عامنج… و قهرج من طليقته بعد عامنج…
نصيحة من أخت… لالالالالالالالالالالالالالالازم أمج تعرف عن العقار… حبيبتي… انتي بعدج مب حاسبة حساب شي… هالأشياء لازم ما تنخش…
اتمنى تردين هالمرة… لأن في كذا موضوع لج كنتي تطرحينه و بعدين ما تردين… و ما نعرف شو قررتي أو شو سويتي؟