مرحبا خواتي
بما إني شاطرة في صنع الآجار المنزلي، وكل موسم همبة خضرا لازم أسوي آجار للبيت، قلت خل أعطي وصفتي السرية اللي محد يعرفها لبنات المدونة يستفيدون منها ويستغنون عن الآجار مال السوق اللي أحياناً يكون مب صحي، أو طعمه مش لذيذ وايد أو ما تقدرين تتحكمين بدرجة حرارته.
الآجار هذا غير إنه لذيذ فهو صحي جداً لأنه يحتوي على بذور أعشاب صحية مثل الينسون والشومر والحلبة والكمون وحبة البركة أو الحبة السوداء،وكلها أعشاب اتسهل عملية هضم الأكل بالذات إن الآجار غالباً ناكله ع الغدا ويا العيوش، وبالتالي هو تقريباً يقضي على كمية الغازات في البطن بوجود الكمون والينسون والشومر، هذا غير إن الزيت المستخدم للحفظ هو زيت الزيتون الصحي، وإذا ما توفر ممكن استبداله بزيت بذور العنب المفيد أيضاً والصحي والرخيص.
على فكرة، أنا ما أسوي بمقادير محددة، أخبص خبص، السموحة منكم عاد، بس ممكن من الصور بتعرفون كم مقدار الشي اللي بينحط 
أول شي تشترين همبة أو منجة أخضر من السوق، أنا شخصياً أفضل النوع العماني لأنه حامض أكثر من غيره، بس مع الأسف أنا استخدمت الهمبة المنزلي المتوفر من الشجر في بيتنا، وهو حموضته أقل شوي واضطريت أضيف عليه شوية خل، العماني ما يحتاي خل من قوة الحموضة اللي فيه.
الهمبة هذا مش موجود غير في العين، وهذا اللي خلاني أسمي الآجار العين، تخليداً لذكرى هذه المدينة الرائعة، عن اتغيرون اسمه عاد؟ خلنا انشجع على الاختراعات الوطنية اللي بتتحول في يوم لأكلة شعبية خاصة فينا
اللي حاب يضيف جزر ممكن إضافة الجزر بتقشيره وتقطيعه طولياً وعقب ينخلط مع الهمبة، والنقطة المهمة جداً، لاااازم اتغطين الهمبة بكيس نايلون وما تخلين الهواء يتسرب للداخل، لنه لو تسرب بيتغير لونه ويتبقع ببقع سودا.
والحين انروح للتوابل اللي تعطيه النكهة المميزة وهي كالتالي:
انروح للحلبة، الحلبة مهمة للآجار وهي اللي تعطيها الطعم الحاد والنكهة المميزة، إلى جانب الخردل.
لذلك انضيف الحلبة على مرتين، مرة مطحونة ويا التوابل، والمرة الثانية يتم وضع كمية قليلة منه في الماء ويترك لست ساعات، وكل ما تمددت الحبوب ونبتت، زادت قيمتها الغذائية وفوائدها وأعطاها شكل مميز أكثر.
والحين انروح للإضافات الأخرى واللي هي مخلل الفلفل الأخضر، ومخلل الكبر، هذيله أول مرة أستخدمهم للتنويع وإضفاء نكهة مختلفة، بتلقونهم في الكارفور في ركن المخللات إذا حابين تستخدمونهم.
مثل ما قلت من قبل، اللي يميز الآجار شيئين: الحلبة، والخردل
قبل كنت أكتفي بوضع حبوب الخردل، بس هالمرة جربت أضيف ملعقتين على ثلاث صلصة خردل، وطبعاً الطعم صار أطيب وألذ، أنصح باستخدام ماركة ديجون، متوفر في الكارفور أيضاً
انتبهوا زين، فيه منه نكهات، ركزوا على اللي في الصورة، خردل ديجون اكسترا هو المطلوووب
يتبع…….
قبل كل شي نطحن التوابل مع بعض، وهي كالتالي: حلبة، كمون، ينسون، شومر.
مع مراعاة أن تكون كمية الكمون أكثر شوي من البقية، والينسون أقل شي.
انحط كمية بسيطة جداً تكفي للتحمير من زيت الذرة.
انضيف عليهم حبوب الخردل حوالي ملعقتين كبار، وانضيف ابصلة صغيرة مفرومة.
وأول ما تبتدي حبوب الخردل اتفرقع، انضيف عليهم قطع المنجة اللي سبق وخلطناها مع كمية من الملح عسب تنزل العصارة، نحتفظ بالعصارة أو الماي اللي نزل منها جانباً، وانحط الهمبة في الجدر ونبدا انحرك الأكل.
والحين انضيف الكركم، يستحسن إضافة الكركم البرتقالي، لنه فيه نوع لونه أصفر، بس البرتقالي يعطيه لون أغمق شوي، حوالي ملعقتين، وبعدين انضيف التوابل المطحونة واللي عبارة عن الكمون والشومر والحلبة والينسون، تقدرين تتحكمين بدرجة حرارة الفلفل حسب الكمية اللي انتي تبينها، إذا تبينها حارة زيدي الكمية واذا تبينها متوسطة أو أقل خففي من الفلفل.
انضيف الحين بذور الأعشاب غير المطحونة، حوالي ملعقة كبيرة من كل شي، ممكن إضافة حبة البركة الآن أو لاحقاً.
والحين انضيف قليل من البابريكا، اللي هو الفلفل الحلو لإعطاءه لون أغمج قليلاً، بس إذا مش متوفر مب ضروري ترى.
الحين انضيف خل الهمبة، واللي هو السائل اللي طلع منه بعد خلطه بالملح، بعد إضافة السائل، انذوق الطعم إذا الملح شوي انضيف كمية أخرى من الملح، وإذا الحموضة عادية أو مش حامضة، انضيف كمية قليلة من الخل حوالي فنجان قهوة صغير.
ممكن إضافة قليل من ماء الشرب، حوالي كوب، إذا كان ماء الهمبة قليل ولا يكفي للطبخ.
نقطة مهمة: لازم الآجار يكون مالح شوي شرات اللي في السوق، الملح بعد يحافظ عليه لأطول فترة ممكنة في الثلاجة من غير ما يخترب.
ثم انغطي القدر، واخليه يطبخ على نار هااااااادية جداً لمدة ساعة تقريباً أو حتى تصبح الهمبة لينة وطرية جداً، وكل عشر دقايق انحركه عسب ما يحترق من الأسفل.
والحين انضيف مخلل الفلفل الأخضر ومخلل الكبر.
والمخللات ممكن الاستغناء عنها لمن لا تريد، أو غير متوفر عندها.
والحين تقريباً قربنا ننتهي
انضيف الحلبة المستنبتة وأول ما انضيفها انحرك شوي وانطفي على النار،لا تطبخين وايد، لنها لو انطبخت وايد تفقد قيمتها الغذائية بالحرارة، بس إذا كانت مب مستنبتة وايد شرات اللي في الصورة ، يعني ما طلعت النبتة، ممكن اتضيفينها قبل
وصلنا لآخر خطوة تقريباً
ضيفي عليهم زيت الزيتون، كمية كبيرة لو حبيتي، ما بيضر لنه صحي، ولنه بيحافظ عليه من العفونة، ولنه لذيذ بعد.
وحركي وخليه ينخلط مع الباقي، الهدف من وضعه آخر شي، لنه زيت الزيتون يفقد كثير من فوائده بالحرارة العالية.
ممكن استبدال زيت الزيتون بزيت بذور العنب فقط، ولا أنصح بزيت الذرة أو زيوت أخرى أبداً!
بعد ما يبرد الآجار، حطيه في مرطبان أو أي علبة محكمة الإغلاق، وارجعي ضيفي من فوق شوية زيت زيتون عسب يكون طبقة عازلة يمنع تسرب الهواء وإفساده.
وخليه أسبوع في الثلاجة، وبعدين بالعافية، ممكن يقدم فوراً لكن كل ما تركتيه أكثر كل ما كان ألذ.
وطبعاً ممكن يقعد عندج سنة في الثلاجة لو طبقتي الطريقة صح من غير ما يخترب، لكن من كثر ما هو لذيذ ما أعتقد بيقعد أكثر من شهر
على فكرة، أنا عندي بهار خاص بالآجار بس ما حطيت منه إلا في كمية بسيطة وفي علبة صغيرة، لنه ما يحتاي لأي نوع من البهارات، اللي في الشرح يكفي وزياااادة
وبالعافية عليكم
شكراً لكل من مر وعلق.
تحياتي