..::×× قصة معاناتي والحمل الكاذب ××::..:mad: لحياة صحية

تأخرت علي الدورة 5 أيام وانا شكيت انه يكون حمل لان دورتي منتظمة وبوقتها اتي وعمرها ما تأخرت يوم من هديت الحبوب … انا صار لي 4 شهور موقفة حبوب منع الحمل لاني أبي أحمل وايين نونو حق بنتي فديتها …

اول شي رحت عيادة المفرق الخاصة ويت الممرضة تسحب لي دم ودخلت الابرة واتقول مو مبين العرق وتمت دور فيها داخل ايدي لين ما حصلت العرق وسحبت الدم… بعد 10 دقايق رجعت الممرضة اتقول لي تعالي بسحب منج دم ثاني … انا قلت لها حق شو قالت عسب انشوف كريات الدم الحمرا ونسبة الكالسيوم وتمت اتخربط هذا عسب يعرفون اذا في حمل شو يوصوفون لي من ادوية… وتميت اتريا ولا مال المختبر ياي بعد 15 دقيقة يقول لي مو امبين شي في التحليل وما نقدر نأكد شي تعالي بعد اسبوع وبنسوي فحص ثاني …

عصبت وقلت لهم بعد ما تعبتوني وسحبتوا مني دم مرتين .. ما راح ارجع ولا شي وبروح عيادة ثانية أبرك لي..

السبب اللي خلاني أصمم أسوي الفحص اني أداوم في مكان يلزمني أمر تحت جهاز وهذا شي مب زين للحامل…وكنت أبي أتأكد عسب ما أضر البيبي لو كان في حمل..

رحت عيادة الأمل عسب أسوي فحص الحمل وخذوا مني دم وقالت لي الممرضة تعالي بعد ساعة بتكون النتايج جاهزة… كنت تعبانة وريلي قال خليني أرجعج البيت وانا بعدين بمر أخذ النتيجة.. وبعد ما رد ريلي من الدوام فاجئني بالخبر واني حامل وطرت من الفرحة وهو كان مستانس وعطاني أدوية وقال لي هاي الدكتورة وصفتلج اياها عسب الحمل…
وتمينا طول اليوم نقول في ضيف رابع بيي وأقول حق بنتي يلا استانسي بييج أخو ولا أخت… وطبعا بشرت أمي وعمتي وكلهم استانسوا..

ثاني يوم وانا بالدوام نزل مني دم .. خفت ودقيت حق ريلي ويا خذني الطواري لاني ما كنت أعرف شو بلاني وانا كل اللي يدور في راسي اني طيحت.. وبعد ما دخلوني عند الدكتورة سوت لي سونار وهني كانت المفاجئة اللي كسرت لي قلبي.. قالت لي " رحمج فاضي ما فيه شي "حسيت بالدنيا اتدور فيني وانا أقولها كيف وامس فحصت وقالولي انج حامل طبعا هاي كانت مستشفى ثانية.. قالت لي " الرجم فاضي ويمكن يكون صدق في حمل ويمكن لا .. انا ما أبي ابسق الأحداث بس ان كان حمل ممكن يكون كيس الحمل صغير ويمكن يكون حمل خارج الرحم واذا كان جي لازم اتمين عندنا ما تروحين..لذا سوي فحص دم وارجعي لي" طبعا ما كنت حاسة بألم ولا شي بس وترني كلام الدكتورة وسويت الفحص .. انهرت ايدي من الفحوصات 3 أيام ورا بعض سحب دم..

تمييت انا وريلي نتريا وهو يهديني ان شاء الله خير وان كان ما في حمل ترا الله كاتب ومن هالكلام… لين ما يابوا النتيجة وكانت الصدمة الاكبر الدكتورة قالت لي " ترا مافي حمل والرحم نظيف واللي فيج احين ( تقصد الدم ) تراها الدورة، وانا ما أدري ليش الدكتورة قالت لج ان هذا حمل "…

زعلت وفي نفس الوقت حمدت ربي وقلت الحمدلله على كل شي على الأقل مني محرومة من العيال عندي بنت فديتها … بس قهري الأكبر الكذبة اللي عشت وعيشت أهلي واهل ريلي وياي والفرحة اللي كانت على ويههم…

زبدة الكلام اتصلت للعيادة اللي سوت لي الفحص واتهازبت ويا الدكتورة اللي عطت ريلي النتيجة والدوا.. وقالت لي ان هذا اللي امبين عندي انج حامل واذا ما اتصدقيني تعالي خذي النتيجة من قهري قلت لها خليها حقج بيلها واشربي مايها ..