صناعة الصابون من الفنون الجميلة …. في عدة طرق لصناعة الصابون مثل التحضير على الساخن والتحضير على البارد … لكن هذي الطريقة ايسمونها التحضير بدرجة حرارة الغرفة وطبعا واااايد سهلة. الصابون المحضر يدويا تعرفين شو تحطين فيه ومعظم مكوناته طبيعية ومناسبة للبشرة.
الصابون يتكون من جزأين مهمين هم : الزيوت والصوديوم هيدروكسيد
في هذي الوصفة بنحتاج
– ميزان لقياس المكونات.
– كوب بايركس (pyrex ) مرقّم .
– خلاط يدوي
– فراش بلاستيك
– كوب بلاستيك عشان نذوب الهيدروكسيد
– قفازات .
– نظارات بلاستيك خاصة للحماية .
– قوالب للصابون
في التعامل مع هيدروكسيد الصوديوم لازم نتخذ إجراءات مشددة عشان نتجنب أي حروق لا سمح الله … وأكرر أهمية إرتداء القفازات والنظارة خلال الإعداد وإبعاد الأطفال عن مكان العمل…. ويفضل إنج تكونين بقرب مكان فيه حنفية عشان في حالة سقوط الهيدروكسيد المذاب إنج تتجهين بسرعة للحنفية وتغسلين المكان.
مقادير الوصفة
زيت جوز الهند 270 جرام Coconut oil
زيت زيتون315جرام Olive oil
زيت الخروع45جرام Castor Oil
زيت أولين النخيل180 جرام Palm oil
زبدة الشيا90 جرام Shea Butter
ماء مقطر 215 جرام Distilled water
حليب غنم100 جرام (Goat Milk)
هيدروكسيد الصوديوم128.2 جرام (lye)
نبدأ اول شي بتحضير كل المكونات عشان يكون شغلنا سهل ومرتب
يلا نبدأ ……
وين النظارات والقفازات؟؟؟؟ …. أهم خطوة في تحضير الصابون بمادة الصوديوم هيدروكسيد
نقيس حجم الزيوت والزبدة بالمقياس الإلكتروني
وبعدين نقيس حجم مادة الهيدروكسيد ويفضل إن نحط ورقة أو نايلون على الميزان عشان نرفعه عليها
نحط الماي في العلبة البيضة ونكتب عليها كلمة خطر أو نرسم عليها علامة تحذير وما نستخدمها الا لهذا الغرض
معلومة مهمة جدا جدا جدا … وخطيرة بعد
أبدا أبدا أبدا ما نصب الماي على الهيدروكسيد ولا بيستوي عندنا بركان
نحط الماي في العلبة أول بعدين إنضيف الهيدروكسيد ويفضل في مكان خارجي عشان ما نستنشق البخار ونحرك بالمضرب اليدوي
نحرك الخليط لين ما يذوب الصوديوم هيدروكسيد
بعدين إنضيف زبدة الشيا على محلول الهيدروكسيد عشان يذوب تماما
بعد ما نخلص نصب عليه الزيوت في وعاء ستينلس كبير عشان يكفي المكونات
.
وأقصد بالسمك المطلوب إنج يوم ترفعين المضرب يترك أثر على وجه الخليط
نكون جهزنا القالب … أنا خذته من دايسو وغلفته بورق الزبدة مال المطبخ عشان ما يلصق الصابون وتقدرين تشلينه من القالب بسهولة
خذت جزء بسيط وأضفت له بودرة الكركم الخاص بالجسم
بعدين لونت فيه الصابون من فوق
نحط عليه لوح خشب
نغطيه بفوطة عشان يحتفظ بالحرارة وتتم عملية التصبن بنجاح
ونتركه لين اليوم الثاني عشان يكتمل التصبن ونطلعه من القالب بعد 24 ساعة
ونقطعه
ونتركه لمدة أربع أسابيع على الأقل عشان تختفي منه مادة هيدروكسيد الصوديوم ويكون آمن للإستخدام
وهذي أشكال ثانية على شكل قلوب
وهذا بعد قالب ثاني بس حطيت فيه زبدة الشيا والكاكاو عشان يعطي نعومة أكثر
ولا تنسون تقيسون ال Ph للصابون عشان تعرفون إذا مناسب للبشرة أو لا …….إذا طلع عندكم القياس من 7-10 يعتبر ممتاز.
وايد حبيت الطريقة لأانها أسهل عن الطرق الثانية وما تحتاج تسخين أو فرن وإن شاء الله تعجبكم بعد
شرحج واااايد حلوووو ومرتب
مبدعه صرااااحة
بالتوفيج عزيزتي
المشاركة الأصلية كتبت بواسطة مندوبة جدة 
تسلمين الغالية على ردج
المشاركة الأصلية كتبت بواسطة عشق طاهر مشكورة الغالية … هو صح فيه مجازفة بس لازم تلتزمين بقواعد السلامة وان شاء الله النتيجة بتكون حلوة
المشاركة الأصلية كتبت بواسطة ام لطيفة 2024 مشكورة غناتي وتسلمين على الرد
المشاركة الأصلية كتبت بواسطة لؤلؤ Soap شرحج واااايد حلوووو ومرتب
مبدعه صرااااحة
بالتوفيج عزيزتي
الله يسلمج الغالية…. مشكورة فديتج ونورتي الموضوع