French Toast - Roll ups ما أطيبها من مطبخي

السلام عليكم .. والرحمه

اشحالكم خواتي؟
عساكم بخير

هالوصفه ماخذتنها من شيف – باليوتيوب جربتها الاسبوع اللي طاف وسويتها اليوم مره ثانيه
صدق خفيفه ولذيذه / وتنفع حق الريوق

هذا اللنك من اليوتيوب
https://www.youtube.com/watch?v=jxyv2tW2QZ8

وبكتب لكم طريقتي باختلافات بسيطه & الصور الخاصه من إنتاج اليوم / في الأخير

تقريباً مدة التحضير 40 – 45 دقيقة

اول شي نحتاج توست فريش يكون من النوع الطري
ولونه فاتح (في انواع وايد) منه مكتوب عليه بالحليب / عشان يسهل فرده ولا يتفتت ويانا
نقطع الحواف / ونحتفظ فيها وممكن نستفيد منها باشيا ثانيه لكن ما نعق النعمه
عن نفسي اغمسها بـ خلطة (زيت زيتون + ثوم + ريحان + فلفل أسود + جبن) ودخلها الفرن لين تتحمص

نرجع لموضوعنا عقب ما قطعنا الحواف..
نفرد شريحة التوست بالنشابه وعلى سطح نظيف واملس

الجبن ممكن فيلاديلفيا أو كيري
وانا افضل كيري طعمها اطيب نحتاج تقريبا 6 لـ 8 حبات
ودخلتهم المايكرويف مدة 60 ثانيه مقسمه 3 مرات كل مره 20 ثانيه اطلع واحرك وارد ادخلهم
عقب احط عليهم مقدار 1 أو 2 ملعقة صغيره سكر بودره حسب الرغبة
ونخلطهم عدل

نقطع الفواكه اللي نفضلها حجم صغير / استخدمت بوكس فراوله + 1 كيوي
ونرش عليهم مقدار 1 – 2 ملعقة طعام سكر حبيبات / ونحركهم

الحين نبتدي مرحلة الحشو
ونييب التوست وندهن خلطة الجبن من الطرف اللي تحت ومسحه خفيفه من الطرف اللي فوق
عسب يوم نلفه تمسك ويانا وما تفتح الحبة او تتفت
نضيف خلطة الفواكه بمقدار بسيط ونلف التوست ونحطه على الطرف الاخير تحت / لين ما نلف كل الكمية

نجهز خليط التغميس اللي طعمه عجيب
2 بيضا حجم وسط
1 ملعقة طعام حليب سائل
1 ملعقة صغيرة قرفه / ممكن أقل حسب الرغبة
2 ملعقة كبيرة سكر بني
1 ملعقة صغيرة فانيلا سائلة

ونخلطهم عدل

نجهز المقلاة والزبدة عالنار – ونبتدي نغمس حبة التوست بخليط البيض والقرفة
ونصفهم عدال بعض وكل شوي نلف من صوب واحد – ونتاكد انه كل حبة تعرضت للحرارة من كل صوب خطوة مهمة

لو ما فهمتو هالخطوة – شوفوا الفيديو كل شي واضح ^^

ومن نخلص
نحطهم بصحن تقديم – ونرش عليهم سكر بودرة

وعواااافي