هذا موضوعي الاولي
https://forum.uaewomen.net/showthread.php?t=1199561
و اللحين التكملة
قبل الزواج :
كنت ادرس و اتعلم كل يوم شي يديد و احضر دورات و ورش عمل و ندوات و غيرها
اشياء تثقيفية
من غير الكورسات التعليمية و الدراسية شي منها يمتد سنة و سنتين
و كنت دوم الاولى ع المجموعة
كنت رشيقة و ستايل و حلوة
كنت منطلقه ف الحياة
الاهم من هذا كله كان وقتي نصه للدنيا و نصه لربي
اصلي النوافل كلها و السنن الرواتب و الوتر و اصوم الاثنين و الخميس و الايام البيض و كانت فيني طاقة كبيرة و وقتي كان مليء باالانشطة و كل ما هو جديد
و حفظت اجزاء من القرآن و كنت مجتهدة لدرجة رشحوني لتحفيظ القرآن
بعد الزواج :
ماشي وقت ابدا ابدا ابدا
يدوب اقوم من النوم و اجابل عيالي شوية اتريق معاهم و اللي يروحن المدارس، مدارس و اللي ف البيت ف البيت
ع طول ع المطبخ
لين يوصلون البقية من المدارس
دراسة و مذاكرة و مقاضي المدرسة و القرطاسية و البحوث و غيرها
اي دورة او كورس او حتى زيارة
ما اقدر اروح الا نادرا
عيالي الله يحفظهم ريلي ما يرضى اخليهم عند الشغالة
و اهلي بيتحملون مرة ف الشهر مب كل يوم لانهم مب مجبورين
الصالون ارروح بالشردة ااذا عندنا مناسبة او عيد
اقتصرت طلعاتي ع الاماكن اللي اقدر اخذ عيالي معاي
مثل العزايم و التجمعات و اغلبها عائلية يعني نفس الناس و مافي مجال اتعلم شي يديد
الحديقة
البحر
المول و ع الالعاب طبعا بس مافي مجال لشي ثاني غير المطاعم
و طول الوقت عيوني ع عيالي
تعال
انتبه لا تطيح
لا تروح بعيد
لا تضاربون
لاني امهم و بطبيعة الحال ملزومه فيهم ومافي مجال اتكل ع حد ثاني
الحمد لله ع النعمة
الحمد لله
قاعدة احاول استمتع بالمسؤولية
بس ما توقعت انه المسؤولية متعبه لها الدرجة
حياتي مستقرة نوعا ما الا من بعض المنغصات
و اللي ابغي اوصله
بعد هالسنين اكتشفت انه السعادة ليست ف الزواج فقط و ليست ف العزوبية فقط
السعادة فينا نحن
نحن اللي نخلقها
نصيحة للبنات
اذا كنتي ف بيت اهلج معززة مكرمة
لا تقتلين عمرج ع الزواج و لا تقبلين بزوج اي كلام و المهم اتزوج و خلاص
يا تاخذين واحد يستاهلج و يقدرج
يا تقعدين ف بيت اهلج معززة مكرمة
مب لازم يكون كامل ف الكامل الله سبحانه
و لكن واحد يستاهلج
محترم ع الاقل محافظ ع صلاته
بدل لا تاخذين واحد خربوط و يهينج و يكسر قلبج
خاصة لو كنتي صغيره ف الخيارات امامج كثيرة
هذا شي
و الشي الثاني
لو كنتي كبيرة ف العمر ف الرياييل يستغلون حاجتج للزواج و الاستقرار إلا من رحم ربي
بعطيكم مثال
يعني وحدة كبيرة ف العمر و تقدم لها واحد ما يستاهل ظفرها والله
اهلها رفضوه ما ينفع لها
ما يصلي و كذاب كل يوم له رمسه
و عارضت اهلها كلهم و خذته غصبن ع الكل بحجة انها كبيرة و محتاجة لزوج و اشباع عاطفي
تزوجت
تعرفون شو يقول لها عطيني بيزاتج و عطيني بطاقة البنك و احمدي ربج خذتج و انتي كبيره و شوفي شكلج و مدري شوه
لين دمر نفسيتها
و يوم رفضت تعطيه بيزاتها
طلقها و كسر قلبها
يعني لا حصلت الاشباع العاطفي و الاستقرار اللي تباه
و لا انها قادرة ترجع لحياتها الطبيعية ايام العزوبية
و اللحين ندمانه
اللحين تقدم لها واحد ثاني و مقتدر يعني مب طمعان ب فلوسها
و هي رافضة بحجة انها تعقدت من الزواج
بس المفروض ما ترفضه اذا هو زين
شفتو كيف
لا استانست بالزواج و لا حصلت الاستقرار و الاشباع العاطفي و بنفس الوقت خربت الفكرة الحلوة عن الزواج و الاستقرار
ف اقولها نصيحة لكل البنات
يا تاخذين واحد يستاهلج و الا
لا ترضين باي شي و السلام
مدري وصلت الفكرة و الا لاء
عن نفسي
اشوف الزواج حلو و استقرار
ريل و حب و وناسه
بس وين و وين يوم وناسة حلو و عشر نكد و الحمد لله
و تتكشخ ف المولات اوفر اوفر عشان تنخطب
و اللي تصور طباخها و غرفتها و نعالها و انتو بكرامة و ايدها و حناها و نشتها علشان تنشرهم ع الانستقرام
يعني يا ناس شوفوني انا سنعة
انتي قاعدة ترخصين ف عمرج يا الغالية
انا معاج انج تكونين سنعه و تبينين للناس هالشي بس بحدود
يعني عيب وحدة تصور نفسها و لبسها بس تغطي الوجه ف الانستقرام و حسابها مفتوح و تسال الناس شرايكم ف لبسي
و اذا حد غلط عليها تقول احترم نفسك
انزين انتي احترمي نفسج اول عقب الناس بتحترمج
انتي درة مكنونة لا ترخصي بنفسج
ف النهاية
الزواج سنة الحياة و شرع الله
و كل شي قسمة و نصيب
سامحوني كان كثرت عليكم
والله احبكم و حبيت افيدكم
الله يسعدج
ترا المراة مهمتها الاعتناء بالزوج والابناء والبيت
ليس شرطا ان تقوومي بالنوافل وووالخ يكفي ان تكون المراة محافظة على صلوات الخمس
وصيام رمضان وان تحفظ نفسها وزوجها وتهتم فالعيال
تكووون من اهل الجنة
باذن الله
لا الحياة العزوبية ولا الزوجية احلى من الثانية كلهم سواء
هي مجرد مراحل عابرة تمر علينا فالحياة
نسعد ونحزن الى ان نلقى الله
ومن تزوجت وابتليت فهذا امتحان من الله
ولابد ان ياتي يوم تسعد فيه
وهذه سنة الحياة
و بالنسبة للوقت فعلا قبل الزواج الوحدة تحس بحرية ما تكون مرتبطه بشي كل وقتج لج حتى سبحان الله من ناحية النشاط و العباده بس هذا مب عذر نحن في امتحان مستمر في هالدنيا الله يعينا و يرزق بنات المسلمين الازواج الصالحين ..
عجبني رد الاخت صنوبر ربي يوفقكم
واقعد ادرس على راحتي لا دورات ولا غيره كل واحد ومجهوده
ورجال مسويه لهم بلوك من زمان ماشوف حد يستاهل الا من رحم ربي الحين الناس ماديه
فاذا كان لي فايده فبخليها لي
وموضوع العيال والمسؤوليه والزوج حلو بس في حال الواحد حصل نصيب حقيقي يعني شخص يستاهل ويريد يتزوج ومعتمد على عمره وعنده اهل حقيقي يقدرونه ويقدرون اختياراته
ساعتها شي ثاني
وموضوع التعليم والدورات هذا يعتمد على الشخص في عندي ربيعات متزوجات ويشتغلن وياخذن دورات
عادي بس في تعب!
ولكن الحياه من كلها زوج وعيال ومع الوقت الواحد بينضح ويفهم عمره اكثر
بس المتوفقه مع الزوج الله يهنيها واحسن لها بيئة العمل في الاخير بيئه خطره وتحتاج حرمه تكون واعيه وقويه يعني مب كل الحريم يقدرن عليها الا ضمن حدود معينه
واذا عيالك كبروا شوي تقدرين تقدمين دورات وتشتغلين عادي الامل موجود
بس انتي بعد لازم دلعين نفسج وتخصصين وقت لعمرج بدون ريلج وعيالج
سيري الصالون ولا شوبنج ولا تشوفين ربيعاتج بتحسين انج كسرتي الروتين وسويتي شي يديد
حاولي تكسرين الروتين باي شي وعساج عالقوة فديتج