موضوع مهم لكل متزوجه او مقبله على الزواج من تجارب الحياه لتربية طفلك

رحت للمشغل صادفت بنت شكلها توها متزوجه تكلم امها شكلها تبيها تزورها قالت ماقدر علشان رجلي ماعنده ارتباط وصعبه اخليه تمنيت اقولها واحكي لها بس دخلت للغرفه وانا مادري وشلون

بناااااااااااات وخاصه المتزوجات الام لاتخلينها علشان زوجك انتبهي الام ماتتعوض امي راحت وانا ماعطيتها حقها من تزوجت وانا منشغله بزوجي

بحكي لكم حكايتي علشان تفهمون علي

تزوجت وانا توي ناجحه من ثاني ثانوي كنت صغيره امي الله يغفر لها انت تقول لي انتبهي لرجلك هو جنتك ونارك مصلحته قبل مصلحة اهلك انا فهمت النصيحه وطبقتها لكن طبقتها على حساب نفسي وصحتي واهلي الي مايعوضهم احد

تزوجت قبل مايمر وانا انفذ ما انقاش كل شي سم وتم كاني شغاله عنده اذا قعدنا نتناقش رايه هو الصح عمري مانتقدت تقصيره الى دراستي تركته علشان اتفرغ له رفض لكن احسبه من السنع قلت له لا بتفرغ لك كنت لزقه بمعنى الكلمه تركت الدراسه حملت ببنتي وعمري 18 فرحت بها وحسيت ان مسؤليتي كبرت كنت اروح لاهلي مرتين او ثلاث بالاسبوع عقب ماجبت البنت قلة روحاتي لاهلي كانت امي تعتب علي كنت اقول لها ماقدر اترك زوجي اكله من يطبخ له اهله بديره ثانيه

هو كان يقول روحي لكن ارفض علشانه شفتو لا قلت اني لزقه

صرت اروح لاهلي العصر والمغرب يوم واحد بالاسبوع وارجع للبيت انحصرت حياتي لبنتي وزوجي كانت بنتي الحفيده لاولى لاهلي فرحتهم فيها كبر الدنيا امي عسى قبره روضه من رياض الجنه تدق علي تقول مشتاقه لبنتك اه يايمه ليت الايام تعود

بعه بسنه جبت الولد مشت حياتي اللحين معي بنت واربع اولاد الله يكتب لي البركه

جاء لمي زوجي قال بتزوج بكيت صرخت انهرت بنات تعرفون معنى شغاله انا كنت كذا اشتغل واتعب عمري ماشكيت احسب اني اذا شكيت بطيح من عينه

قلت ابو عبدالله وش قصرت فيه

قال ماقصرتي رايتك بيضاء بس ابي مرأة قلت انا وشي قال افهمي انتي عاد وطلع من عندي

تصدقون من طلع جفت دموعي احسن استاهل

بنات رجلى مو بخيل بس مايحب اصرف لاني عودته قبل اطلب السوق شوي واحب رجله ملابس عيالي ماتتخيلون كيف بس مايهمن اهم شي رضاه اذا قال ماقدر هالشهر خلاص ماطلب الى الموسم الجاي عيالي مايعرفون اللبس الجديد الا بالعيد واذا كان مايقدر مب لازم مانقاشه ابد

مانسافر ابد ماذكر انه سافر بنا مع انه راعي سفر مع الشباب

كنت اتمنى اشياء كثيره حارمه نفسي وعيالي منكل شي كنت حامل وقته يوم يعلمن عن زواجه بس صحيت عرفت اني اهدرت حياتي بنفسي

صحيت على نفسي وعمري الي راح وامي الي خليته وكانت تتمنى شوفتي انا وعيالي اروح زياره خفيفه بس كاني غريبه

عمري مامزحت معه احترمه احترام شديد اللبس عنده بالي قليل اغير لاني ماطلع للسوق وان طلعت لعيالي وانسى نفسي كنت فاهمه الزوج انه تشتغل تطبخ تنظف مايجي الليل الا وانا منهده مابي حيل له

من عرفت انه بيتزوج طابت نفسي منه كنت بالخامس وقته عشت ايام الله يعلم فيها بعد اسبوع من الصمت دخلت عليه مكتبه بكل قوه انا استغربته من نفسي قلت له يابو عبدالله بتتزوج كيفك

بس شف انا بعيش معك علشان عيالي وابي شغاله وسواق انا تعبت من البيت وانا حامل

وثاني شي من بكره ابروح افتح لي حساب وابيك تحول لي فلوس راتب كل شهر

لاول مره اطلب منه بدون ذل

قال وش دعوه انابقصر عليكم قلت محشوم بس ابي آمن على مستقبلي وعيالي ماعاد حسيت بالامان معك وطلعت بكيت بكل قهر الدينا الله انزل بقلبي كثر محبة كره له

مرت الايام نفذ جميع الي قلت له صار مابيننا الا السلام. اشترى فيز سواق وشغاله طلعت انا وبنتي للسوق خليت تشتري الي خاطره فيه وجهزت لمولودي وسيم ماقصرت على عيالي بشي مابي يعيشون قهر امهم

ولدت وطلعت بالسلامه رحت للمشغل غيرت من شكلي انا انبهرت من نفسي وطلعت للسوق وشريت كل شي نفسي به وتستغربون ان عرس رجلي صار قبل نهاية نفاسي بعشرين يوم بس انا قصصت لنفسي وابي انسى شخصيتي الاولى وشريت لي سير كهربائي واهتميت بالتمرين تغير جسمي ماكنت سمينه مره بس مع الاهتمام طلعت وحده ثانيه ماتصدقن لو اقولكن عن ردك فعل زوجي انبهرطارن عيونه بس خلاص ماعاد له بالقلب شي قال لي صراحه ماتوقعت ان عرسي بيسوي فيك كذا قلت تدري الحمدلله صحيت اللحين ماتندمت الا على شي واحد امي الي راحت

اسمع يابو عبدالله مابيننا الا الاحترام تبي حقك خذه بس ماعاد بالنفس لك مثل قبل وعيال خلاص مابي الله يبارك لي فيهم قال ميخالف انتي توك اخذه بخاطرك وقعد يمزح بس والله صادقه بنات خلاص ماصار له بالقلب طاري

وقلت له محلل مابي ليلتي خله له بس بقعد لعيالي بنات لاول مره احس بحاجته لي كنت دايم لزقه فيه اللحين يتمنى قربي بس والله غصب علي

صار يشتاق لي ودايم ينادي علي اذا صار قاعد مع عياله وكنت مشغوله

عشت معه بس مو مثل قبل كان لي اللحين وحده تشاركن فيه صح انه مثل اختي وطيب قلبه الله يرزقها وصار ياخذ حقوقه خفت من غضب ربي علي بس بشرط بدون عيال والحمدلله اهم شي صحيت الشي الوحيد الي اتمناهاكمل دراستي بس احس صعبه والله ودي بس الكل يقول فاضيه عندك اولاد صحيح كلهم كبار ماعندي طفل الا وسيم بس الكل مصعب علي

بنات لاحد يفهم اني اقول اعصي زوجك لا بس لاتذلين نفسك وتتنازلين عن حقوقك وحقوق عيالك من النفقه والترفيه والكسوه طعيه بس بحدود فارقيه شوا لاهلك لصديقاتك بس لاتكونين لزقه اربع وعشرين ساعه قدامه اكله فيه مطاعم..

ناقشيه مو لازم معه بكل شي حتى لو كان عكس وجهة نظرك

تزيني له غيري شكلك كل فتره ملابسك اهتمي فيها لاتقولين رجلي مايحب اللوك هذا ولا تقولين بصلح لك غيري من نفسك وخليه مفأجاه

اهتماماتك ادراستك لاتتنازلين عنه ماينفعك الاشهادتك

امك ،،امك ،،امك لاتقصرين بحقه علشان زوجك ربي اغفر لهما وعوضني باالبر بأبي

اطفالك تنازلي عن كل الم وكل جرح بس مايعيشون بعيدين عن ابوهم

وختاما الدنيا لاتخلو من الم اللهم نسألك الجنه هناك حيث الراحه

الحمدلله اعيش مع ضرتي بكل راحه ساكنه فوقي ام ثانيه لاولادي عسى ربي يفرح قلبه ويرزقه

انشرو قصتي بكل مدونة بكل مواقع التواصل الاجتماعي