بعرس وأحاتي التغيير الكبير في حياتي المومة و الطفل

السلام عليكم ورحمة الله وبركاته

حبيباتي بدش في الموضوع ان شاء لله عرسي بعد شهر ..وفي امور وايد مآرقتني …انا احب اطلع وااااااايد واحب Shopping. واحب اروح النادي والصوالين وأطول وايد لما اروح مكان بس سيراتي يوميييية ..ومتعودة من صغري اني اسير بروحي محد يرافقني وانا اسوووق…بم اني بسكن بيت اهل ريلي وايد احاتي هالموضوع ..احاتي:

– كيف اطلع بروحي وآخلص اشغالي ..؟ اكيد ريلي ما بيخليني لازم يرافقني بس ما احب الشوبينغ ويا ريلي ..ابغي اخذ راحتي ! وبنفس الوقت اخاف اذا سرت بروحي بيتعود على هالنظام وعقبها ما بيوديني مكان اذا ما ادل او بينشغل عني اذا تعود على طلعاتي …

– سالفة الوقت !! انا ساعات آتأخر وارد البيت متآخرة وخصوصا دوامي طوويل .فأمر مرات كم من مكان عسب اخلص كم من شغله مثلا صالون او سبا او الجمعيه ..وحتى لو قلت حق ريلي اني طالعه اخاف لما ارد البيت متأخر اهله بيشوفوني وبيتكلمووون عني من وراي …

– صديقاااتي ..وآهلي دايما انا معاااهم لما نروح الكوفي شوب بس عرفت ان ريلي مب من طبعه يخلي خواته يطلعون مع ربيعاتهم فاحاتي اني انا بعد اكون من ضمن قائمة ممنوعات عليهم طلعات الصديقات والاهل

بديت احاتي هالاشياء لاني ببتدي حياتي اليديدة وهالاشياء من ضمن اوليااااتي حاليا …فاحاتي ان عقب بيستوي من ممنوعات وما احصل شي اللي ابغيييه

ابغي تعليقكم على موضوع حد شراتي تحاتي هالسوالف ..انا يا دووووووب حصلت لي فرصه اتزهب ما فاتحت بهالموضوع مع ريلي لاني اخاف من ردة فعله …

هونيها و تهووون .. و مثل مايقولون الولد على ماتربيه و الزوج على ماتعوديه ..
وانتي تحكمي بنفسج وازني بين حياتج و بيتج و زوجج كلن له وقته ..
وحددي ايام تطلعين مع زوجج و ايام بروحج ..
و نصيحه لاتعودينه تخلصين شغلج برووحج .. بيعق عليج كل شي ..
صلي ركعتين كل يوم و ادعي الله يسر لج امووورج .. ( العبد في التفكير و الرب فالتدبير )

الله يوفقج و يسعدج

اختي، اول شي طلعي من بالج انه هالاشيا من الاولويات!
اولوياتج الحينه: بيتج وريلج، حتى لو انتي ما اقتنعتي بـ
هالشي، باجر بتحملين وبتيبين عيال وبتنشغلين وبتعرفين
انه فعلا هالاشيا مب من اولويات المتزوجه، كنتي بنت
ما وراج مسؤوليات ف بيت اهلج، لكن الحينه انتي مسؤوله
عن تصرفاتج واهتمامج ف ريلج وبيتج، ودامج بتسكنين ويا
اهل ريلج ف تعودي انج تطلعين ويا خواته تناقشي وياه ع
هالشي عقب العرس، اما بخصوص الشوبينق ف هالاشيا تعتمد
يعني لو هو عادي عنده تسيرين بروحج سيري بس يوم بتشوفينه
فاضي اطلعي وياه واشتري الاشيا الناقصه وياه عشان ما يحط
ف باله انج تسوين كل شي بروحج، بعدج اختي ما عشتي وياه
ولا تخيلتي عمرج انج تستغنين عن هالاشيا، وهني ما اقولج خلي
كل حياتج لريلج، لا استمتعي بحياتج وونسي عمرج لكن عقب ما
تتأكدين انج مب مقصره مع ريلج ويوم بيون العيال بتين وبتقولين
انه ما عندج وقت لنفسج

كل شي بالنقاش ينحل، واللي تبينه ناقشي ريلج فيه وتفاهمي
وياه واذا شفتيه معارض ع شي ف اعرفي انه لصالحج والله
يتمم امورج ع خير اختي . .

أولاً ربي يتمم لج على خير , ثانياً : الحياة الزوجية حياة جديدة تدخليها , لازم بيكون فيها تغيرات كثيرة , لأنج بتشاركي هذه الحياة ويا زوجج يعني شخص ثاني والحياة الزوجية شراكة ومشاركة , ولا تنسي أنه بيصير عندج أهل زيادة اللي هم أهل زوجج . كل هذه أكيد بيستدعي التغير , وأسمحني أختي ولا تزعلي مني الأشياء اللي ذكرتيها مب من الأولويات في الحياة , وأنت يوم تتزوجي المفروض ما بيكون عندج وقت كبير لهذه الأشياء , لأنه زوجج محتاج تهتمي به وبيتج محتاج إهتمام وبعدين بإذن الله الأطفال محتاجين إهتمام فمن نفسج ما بتلاقي وقت فراغ كبير لكل هذه الكماليات .طبعاً ما في زوجج بيرضى زوجته تطلع وتتأخر أو ترجع متأخر , شي طبيعي , وسالفة صديقاتج ’ لو زوجج ما بيرضى تطلعي معاهن , لا تطلعي معاهن ببساطة لأنه طاعة الزوج واجبة .أختي هذه حياة جديدة مشتركة مثل مافيها حقوق , فيها واجبات. أتمنى يكون كلامي هذا مفيد أو يحمل معنى .

حياتك لازم تتغير والتزاماتك ما بتصير مثل اول ,لازم في مسؤولية في البيت يعني لو كل يوم تطلعين اكثر من وقت الدوام متى ترتبين امورك؟ زوجك بتخليه لمنو بتخليه للتلفون واللابتوب ؟ ! انتي نفسك ما بتقدرين وبتجلسي في البيت بدون ما يقولك
بعدين الشوبينج والطلعات لا تستعجلي عليها شوي شوي بتطلعين لان المسؤوليات تطلعك غصبا عنك
بكرة عنك اغراض خاصة ومواعيد مستشفى واطفال ومدرسة ………الخ الخ الخ

وكله على ما تعوديه يعني روحي عند اهلك واطلعي معاهم دائما ,اخرجي معاه دائما وناقشيه بانك تحبين تطلعين دائما ,حاولي اغراض البيت انتي تجيبيها ,وبعض الاشياء اعرضي عليه انك تكمليها,
لكن في نساء يعلموا ازواجهم انهم يعملوا كل شيء لانهم يحبون الخروج وبعد فترة بعد الحمل والولادة والتعب بتتمني احد يشيل عنك ,وهو خلاص عودتيه انه ينشغل في نفسه وطلعاته واصدقاؤه بتدوريه وما بتحصليه

هلا حبوبة

أنا كنت أفكر نفسج في بعض النقاط قبل الزواج

الحياة بعد الزواج غير لكن صدقيني ما بتختفي هاذي الأشياء الي ذكرتيها خاصة إذا ريلج متفهم وليس متعصب

بعض الأزواج ما يمانع تطلعين شوبينق بدونه واذا خاف عليج بيقولج شلي معاج حد أمج أو أختج المهم مرافق

وعشان ما تردين البيت متأخر لا تخلين مشاويرج في يوم واحد، بدل ما تروحين الصالون مثلا تقدرين تييبين حريم البيت، أو بيت أهلج اذا تستحين، ومشوار الجمعية خلصيه مع ريلج، وممكن تخلصين أمورج في الأوقات الي يكون فيها الزوج مشغول وجي ما بيحس بغيابج

ومعظم الرياييل ما يحبون سالفة البنات يتولفون في الكوفي شوب، ممكن تلتقون في بيت وحدة منكم أو حديقة

طبعًا هالأشياء سهلة جدًا قبل العيال، لكن بعد العيال بترتبطين بالبيت أكثر
واذا طلعتي عنهم بتحاتينهم وبتتلومين فيهم اذا تأخرتي (غريزة الأمومة)

عادي فديتج تفائلي و مابيصير الا كل خير