وانا يالسه مع نفسي تميت شوي افكر واستنتجت انا نحن الحريم شغلنا الشاغل بس الرياييل وكيف نرضيهم وكيف نخليهم يحبونا الخ لدرجة ننسى اعمارنا ومرات اقول ليش هم مب مثلنا؟ يعني لو في مدونة رجال الامارات مثلا بتكون مواضيعهم شرات اللي نشوفه هني؟ ما اظن
انا عن نفسي مب معرسه وبمكن الاغلبيه بتقول انتي تتفلسفين في شي بعدج ما جربيته بس انا كانثى مول مب مستعده انسى نفسي واتغير كشكل او كطبع وشخصيتي بس عشان زوج المستقبل يكون مستانس مستحيل ادا بكشخ بكشخ لنفسي اول قبل ما اكشخ له مقتنعه في نفسي لدرجه مب مستعده اتغير عشانه وليش اصلا؟ هم جي ولا جي ما يترس عينهم شي واذا بتكلم على الشخصيه انا وجده وايد صريحه دفشه مرات اقول الشي في الويه كاش الخ يعني عيوبي وايد محد بيتحملني بس بدال ما اغير في نفسي اشوف انه كزوج لازم يتقبلني بزيني وشيني في حدود المعقول
ليش نحن لازم نتقبلهم بكل عيوبهم اللي ما لها اول ولا اخر وهم يتروونا نكون ملائكة؟ اي شي يسوونه نتقبله ونمشي ونطوف ونحن بالمقابل لازم نكون اووووكي في كل شي؟
ما ادري بس الدنيا فيها وايد اشياء حلوه اطوفنا بس لان البال كله 24 ساعه مع الزوج
احس اني وايد هذرت بس كلام في خاطري وحبيت اطلع والاخوات اللي مب موافقات على كلامي ارحب بانتقاداتهن والسموحه
عزيزتي رضا الزوج واجبه لكن من ناحيه صح كلامك
دائما انادي بمبدأ ان الوحده بأيدها سعادتها
وانها تكشخ لنفسها وتريح نفسها وتسعد نفسها لا تنتظر الكثير
لأن شخصيات الرجال مختلفه واغلب الرجال بمجتمعنا العربي ما يعبر عن حبه
فنلقى كثير من البنات تشتكي من ريلها
حلو الاهتمام ببعض ولكن مو لدرجة أني اربط سعاتي فيه وحزني
لابد ان المرأه تهتم لنفسها اكثر
ومع ذلك ماتهمل زوجها
ومن اسرار نجاح الزواج هو ان المرأه تحاول تتأقلم مع الحياه الزوجيه
ولا بد من تنازلات ترجع بالأيجابيه لكلا الزوجين عشان تستمر الحياه
يعني مثلا وحده عنيده جدا لابد انها اتقلل من عنادها عشان تقدر تستمر ويا زوجها
ومثلا انتي اسلوبج دفش بالصراحه ما اؤيد هالصفه
الصراحه شيء جميل جدا
ولكن بأسلوب
وانا اعطيج نصيحه اختي بالله
اهم شيء في الصراحه هو الاسلوب عشان ما نخسر الي حولينا
ولا نكون بنظر الناس دفشين او وقحين
اؤيدك إلى حد ما والله يوفقج
اتمنى ان وصلتج نقطتي
ارضي نفسي و عقب ارضيه ..
مو اركض وراه و انا ما عطيت نفسي حقوقها ف كل شي
و رضا الزوج سبب من اسباب استقرار الحياه الزوجيه ..
هالشي لا مفر منه
( انا و هو) و ثم الابناء = حياه زوجيه
و المرأه مثل المفتاح هيه العضو الفعال فهالعلاقه
*
وكلامج صح يوم بتسوين شي لنفسج اولا ثم للزوج في المرتبة الثانيية