!! حياتي ولا الإنجاب !! المومة و الطفل

صراحه الموضوع ما فتحته على إنه سؤال..

بس كنت أبغي أعرف اذا في بنات تفكيرهن مثلي ولا أنا فاقده احساس الأمومه!!

بتستغربون من كلامي.. لأنه هذا ضد فطرة الحرمه..

لكني يا بنات ما أحس أبغي عيال … استغفر الله العظيم…

يعني ألعب ويا عيال أخواني وخواتي.. بس ما اتخيل يكونون عيالي معاهم..

يمكن لأني كنت الصغيره فالبيت.. وربيت على أني دومني بتم صغيره ومب حمل تربيه عيال..

حتى أميه اتقولي لتفكرين تيبين عيال انتي بعدج اصغيره.. وأنا عمري ٢٥!

الشي الثاني

إني وايد أحب الشغل..

يعني عندي طموح وايد كبير.. وأنا الحمدلله بعدني صغيره لكني ماسكه منصب وايد كبير…

والسبب الأهم من هذا كله.. ريلي!!

بتقولون ليش؟.. كملت سنه وشهرين الحين..

اصدقون شو يقولي..!

يقول أنا أبغي انعيش حياتنا أنا وانتي بس.. انسافر ونطلع بدون مانشل هم تربيه..

وانا رايي من رايه.. يعني منوه ما يبغي الوناسه وراحه البال!!

والتربيه هم هاي الأيام… يعني لو بتربين عيالج صح فالبيت الله يعلم شو بيتعلمون برع البيت..

…………………………..

اصدقون كل ربعي وربع ريلي اللي عرسوا عقبنا الحين ما شاء الله عندهم عيال..

وأنا وهو من يسألونا عن العيال انقول امأجلين الموضوع.. بعدني نبني حياتنا…

والبنات المعرسات يعرفن.. هذا السؤال المقرر.. ها حملتي!!
مليت منكثر ما أقول لا لا لا لا لا

اللي اتقولي بوديج يمسحونج.. واللي اتقولي شو تتحسبين عمرج بعدج اصغيره.. ههههه

يعني ما يستوي يكون هذا قرارنا إني ما أحمل الحين.. ههههه

…………………………..

والله وايد خايفه أني أتم أقول ما با الحين وبعدين الله يحرمني منهم..

واللي سمعته أنه الحرمه اذا منعت طبيعي أو غير طبيعي يضعفن البويضات عندها..

………………………..

أدري أنه العيال زينه الحياة الدنيا.. وأنه وناستي ما بتنقص بالعكس بتزيد..

بس أنا وريلي وايد عندنا مشاريع ومخططات في حياتنا..

أكيد بتتأثر اذا يبت واحد ولا اثنين.. لأني من النوع اللي أبدا ما أأجل على البشاكير في التربيه أبدا.. وما أبغي أتعب أميه لانها ربتنا ومب واجب عليها اتربي عيالنا…!
خصوصا أنه اذا فكرت أحمل معناتها إني لازم أودر شغلي..

………………………

بنات أنا فقدت احساس الأمومه!!..
لأني أحس إني فقدته!!..

ياريت أعرف اذا في بنات عندهم هذا التفكير..

واسمحولي اذا طولت عليكم..
احساس وحبيت أنقله لكم..

تحياتي

وربي يرزقج بالذريه الصالحه

والله يوفقج ويرزقج الذريه الصالحه

الله يهديكم يا رب ..