الرضاعة والصيام في الامارات

أول شي بخصوص الرضاعة…..
الرضاعة الطبيعية مهمة لج انتي (تعدل جسمج وترده نفس ما كان قبل الحمل) وللياهل (تمده بكل اللي يحتاجه) وأكيد تعرفين هالسوالف بس حبيت اتفلسف شويه خخخخ
بس عشان تستمرين فـ رمضان لازم تحاسبين ع نفسج عدل لأن الرضاعة تاخذ من جسمج وبتحتاجين تعويض عشان ما تتعبين
** استمري عالحبوب اللي كنتي تاخذينهم عالحمل (فيتامينات وكالسيوم) لأنج بتحتاجينهم
(ولدي 8 شهور وما كنت آخذ الحبوب، ما حسيت بالتعب الا من فترة بسيطة والدكتورة نصحتني أتم عالفيتامينات)
** تسحري عدل .. مب لقمة وشربتين ماي لااااا اكلي وجبة كاملة …. لا تطنشين السحور لأنه بيعوضج عن فترة الصيام ( لا تنسين المرضع تحتاج تغذية أحسن لنفسها وعشان الحليب)
أنا ما أرضع ولدي نفس قبل لأنه صار ياكل بس بعد اذا ماتسحرت اتعب وأيوووع وايد !
** كثري من السوائل والماي قد ما تقدرين (عالسحور، عالفطور، قبل لا ترقدين، يوم تنشين ترضعين ولدج فليل) خلي عدالج غرش ماي صغيره واشربي قد ما تقدرين لأن السوائل مهمة
** اذا انتي مريضة الحين ومافيج حيل مب لازم تصومين واقضي عقب …. لكن عقب حاولي تصومين

هاللي فـ بالي الحين والله يعطيج العافية ^^

بخصوص رقاده….. كيف يعني وايد؟؟
طبيعي الياهل بو 3 شهور يرقد بمجموع 15-16 ساعة تقريبا (عادي لو أكثر أو أقل بشوي) موزعين فالليل والنهار
10 ساعات تقريبا فليل و5-6 ساعات فالنهار موزعين ع 3 رقدات تقريبا (المعلومة قريتها من كذا مكان يعني مب تأليف من عندي >.<)
هذا جدول صورته من كتاب :

((وطبعا مب شرط يكون نفسه بالضبط لأن كل ياهل غير))

وبرايي لو راقد لا توعينه عشان الأكل، متى ما ياع بينش يرضع ^^
خليه يتعود عالرقاد المتواصل لا تقطعين عليه (عن يتعود عالنشه كل شوي وتتلعوزين)

الا لو فالنهار (برايي وعن تجربة شخصية) لا تخلينه يكثر وايد، عشان يصير الرقاد المتواصل والطويل فليل

وعن الصابون …. اذا مسوي العوده أحسن بالصابون عشان يتنظف عدل
اما لو أشيا "بسيطة" خخخ ماله داعي الصابون
بس أهم شي نشفي المنطقة عدل عقب الغسيل عشان لا يلتهب
وما انصحج بالوايبس أحسها اتييب الالتهابات >.<