كل هذا يطلع من تركيا !!! في الامارات

بسم الله الرحمن الرحيم

والله ما اعر ف من وين ابدا؟؟

نحن ان شاء الله مسافرين تركيا تاريخ 28_ 7 _ 2024 .. المهم أهل زوجي درو انا نحن مسافرين
وزوجي قال حق ربعه .. وبصرااحة محد مدحها لنا .. الكل قاعد يخوفنا منها سرقات تحت تهديد السلاح واختطاف وووو ….. وانا الحين ميته خوووف .. وزوجي متوتر ولا قادر يقول لي وويها متغير .. انزين قبل دقايق كنت قاعدة اقلب بصفحات السفر والسياحة واقرأ معاه علشاان اطمنه .. وكل البنات ذكرن طرابزون واونجول .. ومحد ذكر يلوا ونحن ان شاء الله ناوين نحجز فيها .. وكل شوي يقول لي ليش محد بيروح يلوا .. أهو يشك … وانا يزيد فيني الخوف من اسلوبه

نحن لما كنا مسافرين اوروبا نفس الشي الكل قال له كيف بتتصرف ؟ كيف بتتعامل معاهم؟؟ وكيف…؟ وكيف….؟ وكيف….؟ رحنا وردينا بالسلامة الحمد لله ..

والله محتارة يا بنات .. قبل شوي زوجة حماي تقول لي تركيا كلها عصابات .. اونه عصابة هجمت على فندق كلهم عرب سرقوا العرب كلهم عدا الاجانب .. هل هذا صحيح .. يعني وين الامن؟؟

والله ما احب الكتابة واايد .. لكن فيني خوف .. وحاسة انه زوجي كذلك خيفان علي وعلى بناته

نحن للحين ماحجزنا الفنادق .. كل هذا ونحن ندور فنادق آمنة ومريحة

معرف
بس انا تركيا ماحبها واخاف منها ومتشائمة منها وايد من ايام الزلازل

روحيح تايلند ابركلج

شوفيها شي مميز تركيا ..احسها عادي!

اناخااطري اروح تركيااا
ربيعتي زارتها واايد مدحتها و ما يابت طاري العصابات

تركيا حلووه و جنه من جنان الرحمان

يا اختي اسمحي لي انتوا أذا كل مره تسمعون عن البلد الي مسافرين لها هالكلام
اعرفي انهم يبون يسمعونكم مثل هالكلام
صديقتي صار لها شهر في تركيا
و في البدايه في مرمريز
و بعدها في انقرا
و الحين بسطانبول
و كل تنقلاتها بالسياره
توكلي على الله
انا زرت تركيا 7 مرات و اسكن في منطقة يلاوا في قريه اسمها كوك جدرا
رووووووعه
و لو غيرتي اكيد بيسمعونج نفس الكلام

اهلين اختي..

شوفي الغالية.. لا تحاتين ولا توسوسين… تركيا حلوة ومافيها شي..قوم عمو كانو كل سنة يسيرون ويقعدون فيها بالشهرين .. وفي عمرهم ماقالو عصابات وغيره.. وحتى ربيعتي سارت العام .. تقول ماشالله وااااااااايد حلوة تركيا.. لانه جوها نفس اوروبا.. وسارت يلاوا.. واااااااايد حلوة.. وراوتني الصور.. وبعد حمي سار الصيف اللي طاف.. يقول ماشالله واااايد استانس ويا حرمته.. يعني في حياتي ماشفت حد سار تركيا ومامدحها.. اصلا الاتراك مسلمين وفقارة واااااايد طيبيين..

وانا صراحة ما اقدر اقارن تركيا بتايلند.. انتي جنج تقارنين تفاحة ب برتقالة تايلند واااايد حارة ورطوبة مب طبيعيه.. ووواااااااايد خليجيين وخاصة اماراتيين.. والدنيا هناك كل سنة تغلى بزيادة.. وحتى لو شي مطر.. الجو بعده حار ورطوبة.

نصيحة من اخت.. استخيري ربنا وما خاب من استخار.. وربنا بيسر امورج لكل شي فيه خير لج ولزوجج وبناتج.

وسامحيني عالاطالة.

انا رحت تركيا زرت اسنطبول وكانت روعه الصراحه انتو تحملو ولا تروحون الاماكن الي فيها زحمه و مخيفه مثل الاسواق

روحو المراكز ….

و لاتطلعون فليل …..