انا سايرة ميونيخ وتركيا شهر 6 ان شاء الله
ابا اعرف احلى الاماكن في ميونيخ بالتفصيل بليز وشو رايكم بفندق هوليدي ان لاني حجزت فيه؟؟
كم احتاج تقريبا مصروف انا وريلي؟؟؟؟
يزاها الله خير الي بتساعدني…..
انا سرتلها
بخبرج ابــ شي ماكنت اعرفه لوول … يوم الاحد كل مكاااااااااان امصكر يعني حطو احطيااتكم في يلسة في بيت .. المفتوح بس ماكدولنلز ..
واحلا الاماكن : المارين وهو عباره عن ساحه كبيييره وفيها محلاات واايد
و شارع ماكسيميلين كله ماركااااااات.. و اولومبيا مول بتحصلين مسلمـــين وايد اهنااك
وشي حديقه اسمها اولمبك بارك
اتمنى اني افدتج 
بلي اعرفه
الهوليدي إن أي واحد لأنه فيه أكثر من واحد في ميونخ إذا اللي
في الستي سنتر أوكي لأنه قريب من المارين بلاتز واللي هي ساحة وسط
المدينة، والفندق مجددينه من سنتين وفي تحته سوبرماركت صغير والأندر قراوند
تحت الفندق يعني التنقل بيكون سهل محطة وحده عن المارين
ومحطتين عن المحطة الرئيسية.. وإذا طلعتي من الفندق وتوجهتي يسار
فيه مطاعم مثل البيتزا هت والبرجر كنج.. وفي قاعة سينما .. رهيب البوب
كورن بالزبدة.. وغير محلات الأيس كريم (أنصحج بأمرينا) أسم الأيسكريم
كنت مدمنة عليه..
في المحطة الرئيسية واللي هي قريبة من فندق المريديان (مبنى كبير
ولونه أصفر مميز) من الخارج في مبنى المحطة.. من جهة اليمين في
مركزالمعلومات مكتوب عليه حرف i فيه الموظفين يتكلمون لغات عادي
تدشين تسمعين واحد ألماني من الموظفين يقول يا مرحبا الساع حي من زارنا
(الإماراتيين معلمينه الترحيب) وممكن يعطونكم ملخص عن الرحلات السياحية
واللي تنطلق العادة من المحطة الرئيسية بباصات..
وبعد ومن عندهم مكتب المعلومات نفسهم تقدرون تقصون تذاكر
للتنقل داخل ميونخ في حال ما كنتو مستأجرين سيارة
مثال بدال مب كل مره تقصون تذكره تركبون الأندرقراوند..
أو الترام أو غيره تقصون حق شخصين لأأربع أيام أو حسب مدة قعدتكم تطلع
عليكم أرخص وبعد تكون في إيدكم على طول بدال ما تتعطلون واتمون تقصون كل مره
أغلب الأحيان محد يفتش بس ماشاءالله اخوانا الخليجين مسوين سمعه من كثر
ما يركبون الأندرقراوند بدون ما يقصون لذلك عادي تتفاجئين بأنه المفتش يخلي
الكل وإيي عندكم أنتو بالذات يطلب التذاكر.
في رحلات تطلع لجارمش وهي قرية حلوة وفيها تلفريك تصعدون الجبل وتشوفون الثلج
هاي بروحها يبالها يوم لأنها شوي بعيده حول الساعة إلا ربع طريق واحسبي ساعه لفوق
الجبل.. فيه كوفي فوق وكيكهم لذيذ
الأولمبيك بارك حلوة فيها مثل متحف لسيارات البي أم حلو حق التصوير وإذا ريلج عنده اهتمامات فاتحين هالسنة أكبر معرض لسيارات البي أم وأسمه عالم بي أم دبليو فيه كوفيات وكل منتجات البي ام من سيارات وغيرها .. رائع ومايتفوت وهو بالمرررره عدال الألومبك.. وعموماً الأولمبك والتمشي فيها حلو بس أرجعو أطلعو من نفس الجهة اللي دشيتو منها لأنه من الخلف تكون المحطات بعيده عليكم
إذا بعدكم ما سويتو الفيزا.. لا تسونها بس لألمانيا خلوها شنقن عشان تزورون الريف النمساوي لأنه واااااايد قريب من ميونخ وما يتفوت.. حتى أقرب من فيينا نفسها .. واللي يزور ميونخ لازم يزور سالزبرج أو زلامسي وهالقريتين في الجانب النمساوي بس خيال وبالقطار ما تبعد أكثر من ساعه يعني ممكن تروحون وترجعون في نفس اليوم في حال انه حجزتو الفندق خلاص (مع اني انصح انكم تحجزون في وحدة من القريتين على الأقل
ثلاث أيام)
التسوق عندج من أكبر المتاجر Galeria Kaufhof وهو بين المارين بلاتز والمحطة الرئيسية يعني لو طلعتي من المارين من جهة النافورة … مش من جهة فندقكم!! ومشيتي شوي بيكون على يسارج.. وهو على شاكلة دبنهامز.. وبعد في المارين بلاتز نفسها لو تدشين من ورا الكنيسة وفي السكيك في محلات مثل زارا وغيرها .. يعني تعمقي شوي ورا لا تمشين بس في المارين
مسألة المصروف أنا أبداً ما عندي فكرة عن تركيا .. بس لألمانيا يعتمد
ناس ممكن تصرف 50 يورو في اليوم وناس تصرف 500!! يعني
هذا شي يعتمد عليكم ..
لا تنسون تشترون كرز من الباعة اللي يبسطون في المارينز.. حلو طعمه