أنا و حاجات الثلاجه ساعدوني اعمال منزلية

يسعد لي صباحكم

أنا بختصر مشكلتي ،، أنا و أغراض الثلاجه

مااعرف كيف احافظ على الإجبان و الخضروات و الفواكه

مرات يوم اشتري إجبان اطلب يزيدون لي كمية المائ فالعلب ما يطيعون ماافهم ليش كله يقولون لي زيدي ماي من عندج فالبيت وأنا ماابئ اتجادل ويا الرياييل خص هالمصريين يجلطوني فالنهايه أنا اللي بدفع ليش هالاسلوب مااعرف يعني مره إشتريت مكدوس اقوله زيد الزيت قالي حطي من عندج فالبيت قلت له أقولك زيد الزيت وفي رياييل جريب مني وأنا ماابئ أعلي صوتي أطالعه واحس اني بفر العلبه في ويهه و بسير قالي أصلوا فيه فلفل شليت المكدوس لأني محتاجتنه و مشيت جلطني

المهم يوم أزيد المائ للجبن أحسه يخترب انتوا كيف تحفظون إجبانكم يااريت تعطوني طريقه و بليز بالتفاصيل ماابئ وحده تقولي حطي كذا و كذا وبدون ما تحدد وتخليني اتوهق إبئ استفيد

ني للخضروات يوم اشتريهم مرات يختربون عني وأنا ما لحقت أكلها

ومرات اسير أبات فبيت أهلي و يوم ارجع ألقاها مختربه مع اني ما أطول

بس لاحظت اللي اشتريه من سبينس يطول وياي ما يخترب شوه الحل

عموما أنا مااشتري بكميات كبيره لأني ساكنه في غرفة وعندي ثلاجه مب كبيره متوسطه فالكميه قليله

ساعدوني يزاكم الله خير

انا كان عندي الطماط بسرعة يخترب ، قالت لي الوالدة اني لازم لما اييب الخضار ، اغسلهم اول شي لانه يكون عليهم تراب ، وبعدين انشفهم عدل في كلينكس ، وبعدين اصفهم بالثلاجة .
وثلاجتي بعد خفيت على درجة برودتها ، يعني مب وايد بارده

أما بالنسبة للاجبان ، خذيلج شي بسيط ، مال ربع كيلو ، يخلص في يوم أو يومين

ووخلي مسئلة شراء الفواكه والخضرة أسبوعية . خاصة اذا كنتوا عائلة صغيرة

فيدونا خواتي انا بعد بسرعة تخترب علي الخضرة والفواكه ؟

بالنسبة للجبن أنا ما ازيد عليه ماي ولا شي…ويتم مثل ما هو لكن يجب استهلاكه خلال أسبوع..عقب أسبوع تحسين ريحته خاست..لا تكثرين..200-300 جرام…أول باول…المكدوس ترومين تزيدين عليه زيت زيتون من عندج…عادي..خذي كمية صغيرة وخصصيلها علبة واغمريها بزيت الزيتون..ولو إنه لو استهلكتيه بسرعة ما بيصير له شي..هم بعد مو معقول يحطون لكل الزباين ماي وزيت زيادة..ولا بيخيس اللي عندهم…بالنسبة للخضار والفواكه…جيبي اول بأول..لأنها أصلا يكون صار لها كم يوم في الشحن..وبعدين كم يوم تتوزع عالسوق…إنتي وحظج…جربي إغسليها بالماي…وجففيها…وحطي قطعة قماش تحتها حتى تمتص الرطوبة..وإنتبهي لازم تكون متهوية…في فتحة بدرج الثلاجة خليها مفتوحة..وإذا بتخليها في أكياسها..إفتحي الأكياس ولو فتحة صغيرة…حتى تتهوى ولا تخترب لأن الخضار والفواكه تصدر غازات إذا تمت حولها بتنضج بسرعة (بالنسبة للأشياء المب ناضجة) وبتخترب إذا أصلا ناضجة…أتمنى أكون أفدتك

انا اول ما اشتري الخضرة احطها في اكياس بلاستيك هاللي تتسكر من فوق مثل مال الساندويج و ماتخترب عندي اتم ١٠ ايام واستهلكها كلها

النعناع والبقدونس و الكزبره الفهن بقصدير و يتمن فتره زينة

الخضروات

طريقة امي الله يحفظها تحط الخضار مثل الكوسه والطماطم بكرتون صغير ويجلس شهر ماتغير
بس يشوه منظر الثلاجه
البقدونس والنعناع حطيهم بكاس فيه مويه بالثلاجه كانه مزهريه يعني الساق بالماء والاوراق برا طالعه من الكاس
الجبن حطيه بعلبه نظيفه وصبي عليه زيت زيتون واحكمي غلق العلبه
وادعي لامي