حبيت أحط الرد هني عشان الكل يستفيد ان شاء الله..
هلا حبوبة..
أنا بقولج من تجريبتي المريرة مع البق الله لاعاده.. وأنا مثلج في شقة..
قبل ما أبدأ .. كحل مؤقت البق ما يحب العطر ممكن ترشين عطر مكان النوم.. وفي في الصيدليات كريم للجسم وللأطفال لإبعاد لدغات البق.. وممكن تستخدمي كواية البخار إللي لها انبوب طويل لتعقيم فرشة النوم والمراتب والبطانيات والمخدات.. لأن البق يموت بالحرارة العالية.
والحين نبدأ على بركة الله:
أولا: مصدر العدوى : البق مب موجود أصلا في بلادنا.. منتشر في الدول الأسيوية وأمريكا والدول الباردة.. ولا ينولد بروحه في البيت ولا يخص النظافة.. لكنه يجي من عدوى.. شغالة اسيوية مثلا جاية من بلادها وحاملتنه في أغراضها.. أو إذا كنتي تغسلين البطانيات في اللاوندري مرات يغسلون كل شي مع بعض.. أطلبي منه دراي كلين ومايخلطهم مع بطانيات ناس ثانيين.. إذا في حد من جيرانج عندهم بق صبي غاز عند باب الشقة وأطراف الباب الخشبية وتجنبي زيارتهم.. لأن البق حشرة رحالة من الدرجة الأولى.. الله يحرقهم..
ثانيا: لازم تحاولين ترتبين هجرة من البيت لمدة أسبوعين متواليين.. ومادام أهلج هني ان شاءالله تكون سهلة.. نادي شركة مختصة بالبق.. وخليهم يرشون البيت كله ما عدا المطبخ.. ويركزون بعد على الجدران لأن البق اللعين يهرب لفوق الجدران وفوق الستاير..
خليه يرش أول يوم وصكري كل الأبواب والشبابيك .. وخلي البيت مصكر لأسبوع.. وبعد الأسبوع خلي نفس الشركة ترش مرة ثانية ونفس الشي صكري البيت لمدة أسبوع اخر.. بها الطريقة البيوض إللي ماتموت بالرش أول مرة تكون فقست وماتت في المرة الثانية..
بعدين شوفي الأشياء إللي ممكن تستغني عنها وإللي إنتي شاكة انه معشش فيها وايد بق واتخلصي منها في الزبالة.. بطلي الشبابيك وهوي البيت..
أخيرا التنظيف.. هاتي لج حد يساعدج ونظفي كل شي والحيطان بالماي والكلوركس .. والبطانيات وديها عند لاوندري ثقة.. ومايكون في منطقة شقق وبنايات مليانة هنود وآسيويين.
وبعد ممكن تردين تستخدمين كواية البخار لإزالة الروائح والتعقيم والتعطير.. بأن تخلطي أي عطر مركز أودهني عندج مع الماي.. ينفع للستاير والكنبات والمراتب وفرشات النوم.. حتى خشب السرير..
أخيرا بخري البيت كله باللبان لأنه يطير الروايح.. وعليج بسورة البقرة يوميا.. شغليها بالمسجل.. لأنه الحشرات مرات تكون مثل البلا وعين حسد.. وأقرئي الأذكار صباح مساء.. واقرئي ع الأولاد قبل النوم..
والله يحفظج ويحفظ جميع المسلمين ويحفظ بيوتهم من كل شر..