شخباركم.. عساكم بخير؟؟…
مممممم.. حبيت اخذ رايكم فـحفلة الحنه..
بما ان حنتي بتكون الشهر الياي ان شا الله يعني شهر 6 بأذن الله وبتكون قبل العرس بثلاث ايام ….
بغيت آخذ رايكم فبعض الامور مثل المسكه .. والمكياج وجي يعني ابا اكشخ شوي واسوي حركات حلووه وغريبه شوي…. انا فستاني عباره عن موديل هندي (تنوره وقميص) حبيته يكون خفيف..
فالحين شو؟؟ ابا رايكم فالمسكه احس انه مب شي هندي على مسكه احسه مب راكب.. ابا اسوي حركه اتكون راكبه ع الموديل اللي بلبسه وتكون حلووه وغريبه شوي.. وبالنسبه للمكياج افكر اني اسوي مكياج هندي بس خفيف عشان ما يخرب على طلتي يوم العرس وما اعرف وين اسوي..
فياريت اللي اتعرف صالون يمكج حلوو واسعاره تكون معقوله وفالعين تقولي …
يلااااا بنات فديــــتكم شدوووو حيلكم وياي وعطوني من افكاركم الحلوووه.. ابا اشوف ابداعاتكم..
ما عليكم امر……….
تقدرين تسوين عقود من الياسمين ((حركة هندية))
بوكسات ذهبية وملفوفة بلون فستانج..
يعني اذا احمر الشرايط حمر واذا اخضر طبعا شرايط خضر
داخل البوكس:
جحال كاجل
معصار حنا صغير ((قد الصبع)) تقدرين تطلبين من الصالونات يسوونهم لج
شويه ملبس ومكسرات
تقدرين تسوين مداخن صغار وعليهم قرص دخون
ان شاء الله افدتج بالرد^^
وإن شاء الله يفيدونج بنات العين
اكيد بيكون ثجيل من حيل ومريه ومرتشعة والطاسه روحها اتكون امغطية الراس الين الخصر ..
ممكن اتسوين صينية واتلبسينها بقطعة خضراء واتزينين الصينية بزينه واتحطين فيها مله تترسينها حنه ومله حطي
فيها مثلا بيض ملون .. هذا اللي عندي وان شاء الله البنات ايفيدونج اكثر …
وبعد اذا امسوية كوشة بسيطة خضراء افضل المخدات اتكون ملبسة باللون الاخضر وفيها زري ذهبي واتخلين كم وحده من البنات الصغار وقت طلعتج ايكونون جدامج وكل وحدة منهن شاله مخده …
مره شفت وحده مسوية حركة حلوه و عيبتني 
مسويه شرات معصار الحنا بس داخلة نسكافيه و شكر
و ربي يتمم لج على خير