طريقة حمامي المغربي بدون خسارت ماي ع الفاضي و لــ نتيجة أفضل هنا الحل

اليوم يبتلكم طريقة الحمام المغربي بدون ما تسرفون الماي الحار ع الفاضي ونتايجه أحسن من انج تفتحين الماي الحار وبيكون تركيزه أقوى ع الجسم

المتطلبات:

1- صابون مغربي وهذا اشتريته من شركة نزيه بـ 15 درهم بس

2- ليفة مغربية بـ 10 دراهم

3- جهاز بخار الويه

4- كيس من عند الدوبي (المغسلة) هذي اللي يوم تييبين ملابسج من الدوبي تكون مغطايه ب هالكيس

الطريقة:

1- توصلين الكهرباء لين باب الحمام (عزج الله) بس من برع وتركبين جهاز البخار وتدخلينه الحمام (عزج الله) وبعدين تخلينه شغال لمدة 5 دقايق وانتي شغلي نفسج بأي شي برع الحمام (عزج الله) أو داخله كيفج.

2- وبعد الـ 5 دقايق تدخلين الحمام (عزج الله) وتدهنين جسمج كامل بالصابون المغربي وتلبيسن الكيس.

3- وبعدين خلي الجهاز تحتج جنج يالسه (تتدخنين أو تتبخرين) وتمي 15 دقيقة.

4- وبعد الـ 15 دقيقة شيلي الكيس وبندي الجهاز وغسلي جسمج عدل.

5- وبعدين ييبي الليفة وبلليها ب ماي دافي وفركي جسمج كامل جزء جزء.

وشوفي الجلد الميت كيف بيطلع وفي وايد بنات يقولون ما يطلع لا جلد ميت ولا شي بس أنا أقولهم سووا هالطريقة وبعدين احكموا وهالطريقة أسويها كل جمعه.

وهالطريقة بعد حلوة حق سنفرة كريم كاب أو أي سنفرة تبييض وهي اقتصادية وتناسب اللي ما عندها خيمة البخار وبدله الساونا

والسموحه ع القصور ^_^