بما إني فاضية وأتريا نهاية الدوام .. قلت بكتب لكم قصة ولادتي بدلوعتي بنتي الحبيبة الوحيدة ..
أنا من بوظبي
في أول وثاني مواعيد الحمل راجعت عند سوسن في مركز ناديا .. ما شاء الله عليها من الموعد الأول قالتي شكلها بنوتة ..
بعدين غيرت عند نادية لأن مواعيد دوام سوسن ما تلاءم دوامي
كان كل شيء طبيعي وفحوصاتي طبيعية ومافيه أي شيء غريب اللهم لك الحمد لين الاسبوع الثاني من الشهر الثامن
هنيه ياتني الصدمة .. المشيمة نازلة وغالبا ولادتي بعملية!!!!
هذا كلام نادية في نفس الوقت اللي سوت لي الفحص، سألتها ممكن ترتفع قالت لا ما ترتفع وماعليه حبيبتي نصيبك عملية <<<< هي كانت تبا تولدني!! وهالشيء خلاني أحس إنها تخاف على سمعتها وراحتها أكثر مما تخاف على الحامل والبيبي .. يعني زينة للمواعيد بس الولادة أحس ما ينوثق فيها
…..
بعد 3 أيام راحة راجعت مركز مزيد عند الدكتورة أماني واكدت كلام نادية مع فرق انها عطتني وقت تشرح لي وتخبرني إن مافيه شيء صعب على الله ..
وهذا السبب اللي خلاني اترك نادية وأراجع أماني في باقي الحمل .. ( الكلمة الطيبة اللي تريح النفس تساهم وايد في راحة الحامل)
….
كنت من البداية رافضة الولادة بالكورنيش لأني ما أحب نظامهم وعلى مشكلة المشيمة راجعتهم ولقيت انهم ما اهتموا فيني نهائيا واللي سوو لي كل شيء كانوا الممرضات غير إن أجهزة الكورنيش تعيسة ..
…
راجعت برجيل لأني كنت خلاص مقررة الولادة عندهم ولأني كنت حابة أشوف الاستشارية أرونا .. وبالفعل أكدت كلام نادية لكن مع فرق إن حجم بعد المشيمة عن عنق الرحم أبعد من اللي قالته نادية ..
….
حسيت إن الراحة والماي المقري والرقية والهدوء النفسي لعب دور في حركة المشيمة فكملت باقي الحمل إجازة وكنت مرتاحة أغلب الوقت..
….
في الاسبوع الثاني من التاسع أكدت أرونا إن المشيمة بعدت وأكدت أخصائية الأجنة في بارجيل نفس الكلام وإني بدخل الولادة الطبيعية ..
….
الاسبوع الأخير من التاسع (بحسبتهم وفي حسبتي كان الاسبوع 39) مر بدون أي أعراض ولادة ..
….
كأي بنت بجر كنت أقوم من النوم وأقول مافيه شيء يعورني 
أدور أي علامة ممكنة وأراقب ثيابي وفراشي ..
….
الحر ما خلاني أمشي عدل وبعد نقص الكالسيوم خلاني أشعر بارهاق وكسل وسالفة المشيمة .. بس كنت أمشي 20 دقيقة كل ليلة ويا ريلي في الفريج ..
….
كان يوم الجمعة وأمي رايحة عند هلي في العين .. بدا الطلق شيء محسوس بس موب مؤلم وايد .. أختي كانت عندي وكنت أقول لها ظهري يعورني ويخف .. فقالت شكله طلق ..
….
يوم السبت الصبح اتصلت بأمي لأني بديت أميز الطلق وقلت لها ما تتأخر المسا لأن أحس فين الطلق ..
….
أمي وصلت بالليل وقضيناها سوالف وجهزت شنطتها وقالت لو تعبانة بوديج الطواري فأنا قلت لا لأن كان عندي موعد يوم الاحد الظهر ..
….
الاحد الظهر رحنا الموعد الدكتورة تقول تحسبتج ربيتي قلت لها لا بعدني .. بس عندي ألم .. دخلتني غرفة الفحص وساعتها شكلها سوت لي توسيع وقالت الرحم رطب لكن موب مفتوح ..
شفت سدادة الرحم في ذيج اللحظة.. وقالت لي بنومج قلت لا دام الرحم موب مفتوح بطلع ..
….
رحت مع أمي المول يبنا سرير بنتي كنا طالبينه من قبل .. وخذنا نواقص البقالة وتمشينا والطلق كان يزيد ويخف ..
خذنا عشا وروحنا ..
تعشيت وراح الطلق نهائيا!!!!!!!
…..
قالت لي الوالدة إنها بوحدة من خواتي صار لها نفس الشيء تعشت وراح الطلق ونامت وياتها طلقة قوية وفي الثانية ربت في البيت !!!!!!!!!!
فانا قلت يارب ما أتعب بالولادة لكن أربي في الدختر 
…..
رحت توضيت ودعيت دعاء الولادة وتجهزت للنوم .. وطبعا نمت ..
….
على صلاة الفجر قمت بالطلقة القوية … يوم قمت واللا الاذان .. قلت بتوضى وبرد أنسدح..
توضيت وانسدحت وأقول يارب يكون فيني قوة أقوم أبا أصلي ..
ياتني طلقة طويلة .. وهدت .. وعقبها طلقة أطور ووراها صوت مثل النقعة .. شيء نقع سمعته باذني .. أثريه كيس الماي 
بسرعة نطيت ألبس احتياطات .. وتميت الف في الغرفة وأقول شو اسوي شو أسوي ..
عقب قلت حزة صلاة بوعي أمي ,,
نزلت من على الدرج وأنا أحس بالطلقات اتي وتروح ..
وعيت الوالدة وقلت لها الماي تبطل .. قالت يالله الدختر
….
اتصلنا باختيه فديتها ويات ورحنا بموتر البيت .. وطرشت لريلي مسج ..
…
وصلنا الدختر ويات الدكتورة (طبعا برجيل) ..
شيكت قالت لي المفاجأة .. الكيس متبطل بس الرحم مفتوح 1 سم 
كل هالدراما وو 1 سم !!!
……
قالوا قعدي .. قلت بقعد ..
يابوا لي ريوق ولبسوني لبس الدختر وتميت أمشي في الغرفة وأحوس وأسولف ويا أمي وأمي تقول ما فيج ويع لو فيج ما بترومين .. والجهاز يقول فيني ويع !
مر الوقت ويابوا الغدا ..
وطبعا أختكم تغدت
واختفى الوجع !!!!!!!!!!!!!!!!!!!!!!!!
…….
يات الدكتورة الساعة 1 الظهر تكشف
قالت بعده 1 
قالت تبون طلق مساعد ( اللي في المغذي) .. قلت لها حطي وقالت أمي حطي <<< ما كذبنا خبر 
…..
حطوا الطلق ومن الساعة 3 بديت أتلوى ..
الساعة 4 طلبت الكمام والابرة مال الفخذ ..
صوتي اختفى الحمد لله كنت حريصة ما أصرخ ولا صرخة والحمد لله أتحيس على الفراش وانا استغفر وأذكر الله وأدعي لاهلي وريلي وامي ..
…..
الساعة 5 ونص يوم يشوفون ..
قالوا 8 سم !! ..
قلت رفعوا الكمام ما أباه ..
…
وتميت أدعي وريلي ماسك ايدي .. ويسقيني ماي زمزم مقري
………..
الساعة 6 طلعوا اهلي وقالوا ولادة ..
….
بوووش !! بوووش !!
ما أقدر .. ما أحس بوجع ., ,
الكمام خدرني ..
والالم موب قادرة أركز عليه ..
..
قالوا العبارة الشهيرة .. الراس طالع وهي موب رايمة تسوي بوش !!! <<< عبارة مضللة .. كانت الدكتورة تشوف الراس قريب وتحاول تشجعني، بس اللي يسمع الجملة يتحرى راس البيبي برا وجسمه داخل ,,
.,.,,
أختي وأمي وريلي برا ..
ريلي ما قدر يتحمل دخل وتميت اترجاه يوقف ورا الستارة .. وتم ورا الستارة يقرى لي دعاء تتسهيل الولادة
أختي تتصل بأختي الثانية تصيح .. تقول لها البيبي بيموت !!
أختي الثانية كانت تكوي ثياب ريلها بيسافر .. عقتهم ع الخدامة لبست عباتها وغشوتها وطارت من شارع خليفة ( بيتها) للدختر ..
دشت أختي الغرفة علي .. لا ما دشت ( اقتحمت) !!
وتزعج علي شوفيج ما تدفعين .. سوووي بوووش!!
تهاوش السيسترات
وتصرخ عطوني ماي ..
أنا صحصحت على الهزبة 
تسقيني ماي وتقرى على راسي الزلزلة بصوت عالي وانا اردد وياها ..
هوووب بووووش ونزل البيبي ..
……
احساس ماي دافي ينصب على جسمي ..
احساس اللي كان يركض ويندبغ ع الارض ..
اللهم لك الحمد حمدا كثيرا طيبا مباركا فيه ..
….
انولدت البنية على الساعة 6 ونص
شفتها قريب 9 ..
….
موقف أثر فيني .. ريلي الله يحفظه ساندني بكل معنى الكلمة الله لا يغير علي .. أمي ودعواتها .. خالتي أم ريلي اللي ما عندها دريول وتدور حد اييبها عندي .. أختي اللي هدت دوامها وكليتها وجابلتني .. أختي الثانية اللي طنشت ريلها وياتني تعطيني دعم معنوي .. وبنتي حبيبة روحي اللي يات وغيرت حياتي ..
وأخوي الصغير اللي مجمع من مصروفه ومشتري هدية لبنتي ..
…
أي أسئلة يا خواتي أنا بالشوفة ..
ودعواتكم لبنتي ولأسرتي الصغيرة بالبركة والصحة والعافية وطول العمر
والحمد لله على سلامتج وسلامه البنوته الحلووووة
ويجعلها من الصالحات ..
شو سميتيها ؟؟
دعواتج ربي يرزقني ببنوته …
خذتي طلق صناعي يعني؟
انا بعد حامل في البجر و خوافه وايد
من الحين احاتي الولادة و قررت أخذ ابرة الظهر أن شاء الله
الله يسهل علينا يارب
الحمدلله ع سلآمتج يآختي قصتج اثرت فيني
يعني برجيل مايستعيلؤن عليج ويحولونج عملية ؟
الله يعين كل بجرية خآصه ب الولآده صدق شعؤر يخوف 
وربي يجعلهآ من الصآلحات ويرزقج برهآ ..
وفعلا قصتج وايد ماثره
عسى الله يسهل عليج في تربيتها البنوته
الف الحمدلله على سلامتج مره ثانيه
مبروك اختي الله يجعلها من الذريه الصالحه
ويعطيج الصحه والعافيه
دمعت عيوني مع كل موقف
الله يخليلج اهلج و ريلج ولا يغير عليكم
أنا بعد حامل وعندي بنوته يبتها قيصري
يعني اعتبر بكر و وأيد متروعه من الولادة الطبيعية
الله يسهل علي و على كل حامل ان شاء الله