دكتوره انا حامل واتييني الدوره! تفضلي حبيبتي ^_^ لسلامتك

مثل ما الكل صار يعرف انا طبيبه عائله في هيئه الصحه في دبي.. واداوم في وحده من عيادات الهيئه.. و داايما تلاقون اجوبتي الطبيه ع استفسارات العضوات في مختلف الاقسام .. هذا لاني اعتبر العلم البسيط اللي عندي امانه ولااازم افيد الناس منه ^_^

المهم..

اللي خلاني انزل هالموضوع اليوم.. أنه فيه عضوه نزلت موضوع تقول انها حامل وينزل عليها دم.. وواضح جدااا انها يالسه تجهض.. بس تفاجات بعضوات الله يذكرهن بالخير كاتبين ردود" عادي حبيبتي هذه دوره.. فيه حريم تنزل عليهم الدوره وهي حامل"! "واعرف فلانه وعلانه حملوا ونزلت عليهم الدوره 4 شهور او 9 شهور!!"

انا اول ما قريت هالردود انصدمت!! كيف حامل واتييها الدوره! هذا يخالف المنطق والعقل.. فقلت لو شرحت الموضوع كرد في موضوع العضوه ممكن يضيع.. فبنزل له موضوع مستقل ^__^

قبل لا ابتدي احب اقولكم انه اللي بكتبه هني هو بعد بحث في مواقع طبيه موثوقه+ سؤال اطباء نساء وولاده في عيادتي.. يعني ما اعتمدت ع العلم البسيط اللي عندي.. لانه الانسان ما يملك كل العلم.. ورحم الله عرف قدر نفسه.. قلت يمكن يستوي وانا مادري فسالت ذوي الخبره ودورت..

حبيباتي اول شي لازم نعرف كيف تستوي الدوره الشهريه..

ببساطه كل شهر الهرمونات الانثويه الي في جسمج تحفز نمو البويضه في المبايض.. ولما تنضج البويضه تطلع من المبيض وترتحل باتجاه الرحم..في نفس الوقت الرحم يبني بطانته عشان يتجهز اذا صار فيه حمل.. فيكون فيه بطانه ثجيله تقدر تمسك البويضه المخصبه..

في حاله ما فيه حمل فالهرمونات اللي خلت بطانه الرحم تكبر توقف فجاه فتنفصل بطانه الرحم هذه و تنزل كدوره..وطبعا عشان ينزل الدم لاازم يكون عنق الرحم مفتوح والا كيف بينزل الدم؟؟

انيي لحاله الحمل.. بعد ما تلحقت البويضه و انغرست في الرحم .. الهرمونات اللي سببت التبويض توقف فجاه مثل حاله الدوره الشهريه.. بس الفرق انه فيه هرمونات ثانيه تفرز ع طول عشان ينمو الحمل ويغرس نفسه في بطانه الرحم اكثر عشان ما يستوي الاجهاض..

وطبعا يكون عنق الرحم مسكر عشان ما يطيح البيبي.. والا لو انفتح بيتسبب في الاجهاض..

انزين فانيي الحين للخوات اللي يقولون دوره + حمل..

اولا.. ما فيه تبويض اصلا في الحمل.. فمن وين بتيي الدوره؟؟ لانه مثل ما قلنا الهرمونات اللي تسبب التبويض توقف.. ولو ما كانت توقف كانت بتستوي لخبطه في الجسم.. تبويض وحمل ..وهالبويضه وين بتروح؟؟ معناها الحرمه ممكن تحمل ع حملها.. يعني هي حامل و ترد تحمل مره ثانيه لانه فيه بويضه.. وبعدين كيف بتربي؟؟؟ بيكون فيه اكثر عن حمل في نفس الوقت وكل واحد له عمر مختلف..

ثانيا.. وين بطانه الرحم اللي تنفصل عشان ينزل دم الدوره؟؟؟ اذا الجنين مغروس في البطانه عشان يتغذى و يثبت الحمل.. عيل الدم من وين بيي؟؟؟ اذا بينزل دم الدوره معناها البطانه انفصلت ومعناها الجنين طاح!!

ثالثا.. اذا افترضنا فيه دم ودوره .. المفروض عنق الرحم مسكر عشان ما يطيح الحمل.. فمن وين يالس ينزل الدم!!

فيه حاله وحده فقططططط ممكن الحرمه تكون حامل وينزل عليها دم الدوره.. وهي اصلا حاله نااادره والحمل معاها اصلا صعب جداا.. الا وهي " الرحم الثنائي القرن".. اسمحولي الترجمه مالتي تعبانه.. يعني الحرمه يكون عندها رحم مقصوص نصين.. ففي واحد يستوي حمل وفي الثاني تستوي التغييرات الشهريه .. فتنزل عليها الدوره.. بس ارد واكرر هالشي واايد نادر..

خواتي.. فيه اشياء نفكر فيها بالعقل والمنطق.. قبل لا ناخذ ع رمسه العيايز الله يحفظهم و رمسه فلانه وعلانه. واللي بتقولي هذا اسمه " دم غزلاني".. حبيبتي ما فيه شي اسمه دم غزلاني.. هذه خرافه تناقلوها العيايز.. واللي بتقولي فلانه ينزل عليها دم طوول الحمل.. اقولج اولا الحريم وااايد يبالغون وهذا من تجربتي كحرمه اولا و كطبيبه ثانيا.. الموضوع يكون بسيط والحرمه تهووول الموضوع وااايد.. هالحرمه اللي تقولج نزل عليه دم دوره طول الحمل.. اولا بيكون عباره عن نقط دم واللي نسميه " اجهاض مهدد" يعني الحمل مالها مب ثابت وايد فتنزل عليها هالقطرات.. ثانيا واايد حريم تنزل عليها هالقطرات والبيبي الحمد الله ما فيه شي.. لانه البيبي يثبت عمره في الرحم عدل وممكن يتسبب في هالقطرات.. بس انه يكون كدم الدوره يعني نزيف! لااااااااااااااا اسمحولي.. وانا واثقه من كلامي 100 بالميه.. واللي صج تعرف وحده حامل و ينزل عليها دم الدوره دخييلكم تطرشها عليه.. ابي اشوف بعيني.. لانه وااايد سمعت اشياء يشيب لها الراس من الحريم.. ولما شفت بعيني ما ايي ربع اللي وصفوه..

فخواتي اتمنى تكون وضحت النقطه.. رجااء فكروا بالعقل والمنطق مره ثانيه.. كلنا دارسات وفاهمات.. ومب لازم نكون طبيبات عشان نعرف شي بالمنطق.. درسنا ايام المدرسه كيف تستوي الدوري .. فبحسبه بسيطه نعرف انه الدوره والحمل مستحيييل..

والله الموفق..

ومشكووووووووووووووووووره ع التوضيح