انا مربيه من شهر ونص تقريبا
وحاليا عندي ضروف صعبه خلتني اقرر اني احمل بعد 3 سنين تقريبا
*الذرية نعمة من الله احمد ربي عليها واتمنى يرزق الكل*
لكن انا مجبورة اقرر هالشي !
والمشكلة الكل يقول ان حبوب منع الحمل مش مضمونه 
وهالشي الله يشهد انه مخلني مهمومه من كثر ما افكر في الحل 
الله يريح بالكن ريحني .. انا سالت دكتورتيه وصفتلي على دوا Cerazette
في حد اسخدم هالنوع او نوع ثاني وما حملت كمن سنة ؟
او في طريقة ثانية ؟!!!
وشكرا
هذه الحبوب زينه ،، بس فترة الرضاعه ،،، بعد الرضاعه ما تنفع
استخدمتها سنه تقريبا
بعدين حطيت اللولب العادي ، وناسبني الحمدلله،، بس كان يطول فترة الدوره عندي
انا طبيبه عايله و بجاوبج ^__^
فديتج اول شي لازم تعرفين ما فيه اي طريقه لمنع الحمل مضمونه 100 بالميه.. كل طريقه منع فيها نسبه بسيطه للخطا..
ثانيا.. حبوب منع الحمل حبيبتي اللي تقولج خذتها و حملت عليها يكون لانها نست تاخذ حبه او حبتين.. او انه المده بين كل حبه والثانيه غير.. يعني اليوم خذتها الصبح.. باجر خذتها بالليل وهكذا.. ووظيفه حبوب منع الحمل هي انها تعطيج كميه من الهرمونات اللي تحسس الجسم كانج في حاله حمل.. فيوقف التبويض..
انزين فشو يستوي لما تاخذين حبه الصبح و ثاني يوم تاخذينها بالليل؟ مستوى الهرمون يكون عالي في الصبح بس يبتدي يقل و ثاني يوم الصبح يكون تقريبا صفر.. ويستوي التبويض و الجماع .. فلين تاخذ الحبه بالليل خلاص ما فيه فايده.. البويضه طلعت من المبيض..
فهمتي كيف الطريقه الحين؟ بس للاسف معظم الدكاتره ما يشرحون للمريضه عشان جيه يحملون عليها..
اذا بغيتي تاخذين حبوب منع الحمل اخذيه النوع اللي بس يكون بروجسترون في فتره الرضاعه.. لانه ما يقلل الحليب.. بعد ما تدخلين اكل للبيبي اخذي الحبوب اللي فيها نوعين هرمونات مثل ياسمين. بس اهم شي مثل ما خبرتج تاخذينها كل يوم نفس الوقت.. عشان يظل مستوى الهرمون ثابت وما يستوي التبويض.. و مهم وايد لو بغى اي طبيب يوصف لج اي دوا تخبرينه انج تاخذين حبوب منع الحمل.. لانه فيه ادويه تتعارض مع هالحبوب و تخفف من مفعولها..
وحياج الله ^__^
ماقصرت دكتورتنا درب الوله
وكلامها عين الصواب وانا بعد في حملي الثاني استشرت دكتورتي واوصتني ع حبوب سيزرات وهاي زينه ماشاء الله ومثل ماقالت درب الوله خليلج كل يوم وقت معين تاخذينها فيه وحطيلج منبه فالفون عشان ماتنسين وهي زينه لين يكمل البيبي ست شهور وماتنشف حليب الام دام اترضعين ومن يخلص شريط الحبوب تتريين لين اتيج الدوره وبعد ما اتييج تاخذينها في خامس يوم من الدوره وتستمرين عليها لين الدوره اليايه ونفس الشي
اما بعد الست شهور فبيبدأ الياهل الله يحفظه ياكل فماتنفع لانها خفيفه وانا بعد الست الشهور رمست الدكتوره وقالت لي ع حبوب مارفلون وهاي من نفس شركة حبوب سيزرات بس نسبتها اقوى والحمد لله خذتها لين سنه ونص وماشفت عليها اي آثار سلبيه والحين ودرتها صارلي ست شهور والحمد لله
أختي استخدمت الحبوب بس ما ادري نفس اللي ذكرتيه أو لا…بس المهم ضعفتها وايد وثاني شيء صارت عصبية وايد مع انها لها بارض واااايد..
مثل ماتقولي يلعب بالهرمونات وسبحان الله لازم لهن تأثير سلبي وفيه حريم مايأثر فيهن يعني يتمن طبيعيات وكل جسم وطبيعته…
والمباعدة مطلوبة تريحين جسمج والبيبي يأخذ حقه في الرضاعة والاهتمام والحنان.
..والله يقدم لج الخير حبيبتي
وأفضل طريقة الطبيعية سواء كان العزل أو الواقي ..