طبعا ابغي اعرف كيف كل وحدة تهتم بعمرها
خاصة ها الفترة الوحدة مب متفيجة و فيها كسل
ابغي اعرف كيف تهتمون بنفسكم ؟؟؟؟؟؟؟؟؟؟؟؟؟؟؟؟
يعني عادي ممكن اسوي
فيشل لويهي مثلا بدون او مع بخار الوجه !
و بدي سكراب ف السبا
او بدي راب
او بدي مساج
ممكن اتحنى
او اصبغ شعري
او اسوي ليزر ازالة الشعر لاني متعودة اسوي كل شهر ؟؟؟
ممكن احضر كلاسات يوغا خاصة للحوامل ؟؟
ممكن استخدم كريمات الخطوط و التشققات من الحين
كريمات العناية بالبشرة ماسكات
يعني شو ممكن اسوي ف ها الفترة و شو اللي ابتعد عنه ؟؟؟
و حياكم يا كسولات خبرونا شو تسوووون بالتفصيل
شو تستخدمون من كريمات و سوالف
نبغي اهتماااااااام و عناية حتى ف الحمل ^..^
– عادي اسوي فيشل بالبخار وما فيه اي مشكلة مثلا مرة كل شهرين
بس تأكدي من المنتجات اللي بيحطونها ع ويهج و خبريهم انج حامل و افضل تسوين فيشل بالفواكه او الاشياء الطبيعية جدا
– الحنا و صبغ الشعر تعتبر من الاصباغ و المواد الكيميائية ومن الافضل
تبتبعدين عنها خاصة ف الشهور الاولى لان الجنين بتكون ف ها الفترة
يعني ممكن بعد الخامس تتحنين و تصبغين شعرج و خليها مرة وحدة بس ف فترة حملج
– كريمات الترطيب ما تضر ان شاء الله اختاري من فازلين و بيبي جونسن
– كلاسات اليوغا وايييد رووعه للحوامل بس انصحج بعد السادس و تكون خاصة بالحوامل فقط
– من ناحيية الاكل اكثر من السلطات و الفواكه
لان لها ايجابيات ع الجنين و بعد هي تحلي الحامل و تخليها وردية و حلوة
– ليزر الجسم والله سألت دكتورتي قالت ما في دليل واضح انه يضر الجنين
بس حاولي تبتعدين عنه ف المناطق المباشرة للجنين،
و عن نفسي اسويه لأيدي و ريلي مرة كل 3 شهور عادي عندي
اما المنطقة الحساسة و البطن ابتعدي عنها ف فترة الحمل
– و بالعكس تعدلي و تكشخي و اي شي ف بالج اسألي دكتورتج
أول شي بجاوب على استفساراتج
يعني عادي ممكن اسوي
فيشل لويهي مثلا بدون او مع بخار الوجه !
الفيشل أنواع ممكن تسوين أبسطها لأن البشرة في فترة الحمل تكون رقيقة و حساسة
و تخبرينهم انج حامل لأن بعض المستحضرات ما تناسب الحمل
و ما يكون شهريا, يعني كل 3 اشهر مرة
و بدي سكراب ف السبا
ما أنصحج تسوين سكراب لأن البشرة تكون رقيقة من التمدد و السكراب ممكن يشوه بشرة الجسم و يخلي عليها آثار خطوط
انتي بغنى عنها
او بدي راب
او بدي مساج
مساج الجسم كامل ممنوع على الحامل و بالأخص مساج الظهر
لكن تقدرين بين فترة و الثانية تسوين مساج للقدمين و الكتفين و الرأس
ممكن اتحنى
الحنا حسب الشخص و يفضل ما تتحنين و إذا كنتي مصرة في فترة الحمل تحني مرة وحدة و تكون بعد مرور 4 أشهر على الحمل.
او اصبغ شعري
صبغ الشعر ممنوع و كذلك تشقير الحواجب ممنوع لأن فيهم مواد تؤثر على الأجنة.
او اسوي ليزر ازالة الشعر لاني متعودة اسوي كل شهر ؟؟؟
ليزر ممنوع نهائيا.
ممكن احضر كلاسات يوغا خاصة للحوامل ؟؟
أكيد ممكن و تكون وايد مفيدة و اغلب مستشفيات الولادة فيها هالنوع من الكلاسات
ممكن استخدم كريمات الخطوط و التشققات من الحين
يبيعون بالصيدلية أنواع من هالكريمات و يفضل انج تستخدمينها
كريمات العناية بالبشرة ماسكات
حاولي تقللين, لكن التزمي بالأساسيات كريم الليل و كريم النهار و الواقي الشمسي و كريم العيون
يعني شو ممكن اسوي ف ها الفترة و شو اللي ابتعد عنه ؟؟؟
و حياكم يا كسولات خبرونا شو تسوووون بالتفصيل
شو تستخدمون من كريمات و سوالف
نبغي اهتماااااااام و عناية حتى ف الحمل ^..^
بالنسبة لي في حملي الأول كان وحامي خيار من أول شهر لين ولدت و كان له اثر كبير على بشرتي
و الخيار مفيد جدا للبشرة و نضارتها و الكل كان يستغرب من بشرتي وقتها و لا كأني حامل و بدون تصبغات
و بحملي الثاني كنت أجبر نفسي عليه لأن الظاهر اني عفته بعد ما كنت آكله 9 أشهر
و كنت أروح بين فترة و الثانية أسوي مساج للقدمين و الكتفين و الرأس و تنظيف بشرة و بداكير و مناكير و اكيد مب كلهم بيوم واحد
و كثري من شرب الماي و ابتعدي على الكافيين و المشروبات الغازية و الشبسات
يعني حاولي تلتزمين قدر الامكان بالأكل الصحي و اشربي حليب طازج عشان يقوي عظمج و يزيد الكالسيوم و يحمي أسنانج
و لا تهملين الفيتامينات اللي توصفهم لج الدكتورة
و بس هذا كل اللي في بالي حاليا
و الله يقومج بالسلامة.