خواتي وايد شفنا مواضيع عن تجهيزات البيبي و التوزيعات وتجهيزات المستشفى لكن ما شفنا مواضيع عن تجهيزات الأم للولادة و النفاس،،،، فـ ياليت خواتي كل وحدة تدخل تكتب لنا شو تجهيزاتها لنفسها للولادة وللنفاس من الألف إلى الياء،، لأني حامل بأول بيبي وموول ماعندي فكرة عن شي فياليت لو تساعدوني
وربي ييسر عليكم ويرزقكم بالذرية الصالحة ان شاء الله
الله يسهل علينا اجمعين ياااااارب ونفرح بالكتاكيت ويرزق كل محرومة يااااااااااارب
اذا تقصدين حبوبة تجهيزات الام والبيبي للمستشفى فهاي القائمة الخاصة فيني احتمال اشياء تتوفر من قبل المستشفى وتكون مذكورة فاللستة واحتمال اشياء اتكون ناقصة ..
اولا : الشنطة الخاصة فيني:
فوط صحية
ملابس داخلية قطنية
حمالات صدرية تنفع للرضاعة
كمادات قطنية للصدر
كريم بالمرز لتشققات
عدد 3 جلابيات + شيلهم لاستقبال الضيوف
عطر خفيف + ملطف + معطر الجسم
شنطة صغيرة للميك اب ( جلوس خفيف + بودرة + كريم + كحل + مسكرة +بلشر / فرشاة)
مناديل ازاله الميك اب
شبشب عدد 1 للغرفة وواحد للحمام
فوطة كبيرة للجسم
مشط + توك خفيفه للشعر
سيشوار
عدد 2 شلح خفيفه
ملابس نوم مريحة قطنية عدد 3
فرشاة اسنان + معجون
شامبو + شاور جل + اسفنجه
كلينكس ديتول
فازلين صغير او كريم مرطب
عدد 3 شيل منزلية
غسول حق الوجه
قطن مال الاذن
عبايه للخروج
شاحن الموبايل
كاميرا
مفرش السرير الخاص بالمستشفى
نسخة من الجواز وعقد الزواج
ثانيا: اغراض البيبي :
اندروير ابيض عدد 4 من عمر 0-3
بيجاما عدد 2
بامبرز حجم 3-6 كيلو
كريم الطفح الرمادي
بودرة بيبي جونسون
كريم ملطف الوردي
فوط صغير خاصة بالرضاعة
لبس الخروج من المستشفى + قماط نفس اللون + قحفيه للراس
لبس لاستقبال الضيوف ويفضل يكون خفيف
مناديل للحفاظة
قماط
قطن لتنظيف الاذن
مدس البيبي ( شنطة البيبي)
مرضعه صغيرة احتياط
بالنسبة أنا بديت تجهيزات من الشهر السابع والحمدلله تقريباً خلصت كل شي بس باقي الاشياء بسيطة بس بصراحة أنا وااااااااااااااااااااااايد خسرت حق الجلابيات والفساتين بس يالله بخليهم حق بعدين… وباقي الأشياء البسيطة إن شاءالله ناوية اخذهم يوم بدخل الشهر التاسع لانه الحين دكتورة مانعتني من المشي لازم الراحة التامة……
تجهيزات للولادة:
بما اني بربي في الشهر رمضان إن شاءالله فجهزت كل شي حق النفاس أو بالأصح (بعد الاربعين) وحق العيد مرة وحدة……
1. خذت جلابيات جاهزة + فصلت جلابيات دانتيل + وفصلت بعد جلابيات مع شيلهن. (حق الولادة + حق النفاس + ما بعد الأربعين)
2. فصلت فساتين حق (العيد + ما بعد الأربعين + العزيمة).
3. خذت الملابس الداخلية من ماركس سبنسر (ستيانات + هافات + شلح) (العيد + ما بعد الأربعين).
4. أما العبي حق العيد ما بفصلهم الحين لاني ان شاءالله بربي في رمضان فما بلحق البس حق العيد بكون في الأربعين فبفصلهم حق بعدين حق (الدوام + الطلعات).
5. باقي لي أجهز شنطة الياهل وشنطتي بعد لانه اتريا جلابيات من الخياط اول ما يخلصهم بجهز شنطتي حق المستشفى.
* شنطة المستشفى أهم الأغراض الأساسية لازم تكون (كم من جلابيات مع شيلهن (وقبل ما تحطين في الشنطة دخنيهم يعني دخني كل الملابس جلابياتج والملابس الداخلية وملابس الياهل بعد وعقب حطيهم فالشنطة)+ الملابس الداخلية + فوطة للجسم+ شباشب في الغرفة + وحق الحمام عزج الله+ أهم شي مشط الشعر خخخخ لانه في بجري نسيت اخذ المشط وطلعت الفضيحة هههههههههههه + فرشاة ومعجون + صابون للجسم + شامبو + شباصة او توكه للشعر + عطر يوم بييون الضيوف + ديودرنت أو ملطف الجسم + فوط الصحية + مرطب أو كريم للويه + مرطب للشفايف + بودرة للويه+ جراجة تلفون او بطارية + اما باقي الاغراض المكياج انا اشوف ما يحتاي مثل الجلوس او الروج او بلاشر……لانه تعرفين الناس كيف بيرمسون وبيقول هاي مربية وحاطة مكياج فول في المستشفى ما فينا بعد يصيبون فينا العين والحسد … فأنا اشوف هالاشياء اللي ذكرتهم بس تكفي..
* توزيعات المعازيم لين الحين ما سويت شي يالسه أدور أدري اني تاخرت بس اذا ما حصلت شي باخذ من محلات برع + والأكلات حق المعازيم في المستشفى بعد بطلب من عند الحرمة تسوي اكلات فالبيت قبل ما اسير المستشفى بتصل وبطلب منها الاكلات .
* مخططاتي قبل الولادة يعني قبل ما أسير المستشفى وهالمرة ناوية اكشخ شوي جدام الضيوف خخخخخخخخخخ لانه في بجري كنت متبهدله يعني عمري متبهدلة شوي..
1. ناوية أن شاءالله أسوي حلاوة
2. بسوي مناكير وبديكير أو بصبغ أضافري.
3. بسوي استشوار او فير غاز عسب الكشة ما تطلع جدام الناس خخخخخخخخخخخخخخ
* فترة النفاس (راحة تامة لين الاربعين يوم ) + مع اهتمام خلطات طبيعية للويه.
تجهيزاتي بعد النفاس أو عقب ما اطلع من الأربعين:
1. ناوية أن شاءالله أسوي حمام المغربي + الحلاوة + بقص شعري وبصبغه + منكير وبديكير + حمام زيت لشعري+ فيشيال أو (العلاج)للويه على الاقل مرة في شهر لانه في الحمل اسمريت وااااايد + اذا سويت العزيمة الاربعين بتحنى بعد + مع خلطات طبيعية فالبيت حق ويهي.
2. ناوية بعد أسوي رجيم خفيف عسب اضعف شوي.
3. بلبس كل الجلابيات اللي فصلتهم اليداد وبفر جلابياتي الجديمة كلها.
4. بفصل العبي
5.ما ادام بكون في إجازة الوضع بستغل الفرصة وببتدي في تجهيزاتي بيتي لاننا ان شاءالله بنتحول بيتي اليديد عن قريب.
حالياً بس أفكر أسوي هالاشياء…..
وربي يسهل كل ولاده يارب.
اول شي اختي خليج على طول مهتمه في نفسج يعني على طول شيلي الشعر وعلى طول مانيكير وباديكير لأنج مو عارفة في لحظة تولدين ومو حلوة الناس تزورج في المستشفى ويدج او ويهج فيه شعر او اظافرج مو مرتبة
تجهيزاتج لشنطة المستشفى ضروري يكون من وقت يعني من السابع صحيح انج تقريبا بتقعدين في المستشفى يومين ثلاث لكن ضروري من وقت،، وقت تحسين بالولادة مابتفكرين في شي الا انج توصلين المستشفى
انا جهزت شنطة متوسطة من الاسبوع 25 لأن كام عندي احتمال ولادة مبكرة
والحين الحمدلله بعد ماعديت 31 اسبوع وبإذن الله اوصل التاسع جبت لي شنطة اللي تنسحب حجم وسط على كبير للمستشفى
4 جلابيات مع فتحة للرضاعة ولو قت النهار والزيارات مع شيل
2 قميص نوم مع فتحة للرضاعة
4 حمالات صدر قطن مخصص للرضاعة خذتهم من ماركس اند سبنسر
( مايعجبني اللي من مذركير احسه وايد قوي على الظهر وضيق ويسبب لي آلام وقت الرضاعة صوب الاكتاف)
دوائر قطنية استخدام مرة وحدة للصدر ( عشان الحليب مايوسخ الملابس)
حفاظات الكبار( ماكد استخدمتهم لكن القابلة وقت ولادتي الاولى قالت انها تفضلهم للنفاس خاصة الايام الاولى وما يحتاج معاهم اندر وير)
احتياط حطيت فوط صحية واندر وير استخدام مرة وحدة من مذر كير
شبشب للغرفة
شبشب للحمام
2 فوطة كبيرة
2 فوطة صغيرة
ديودورانت من بادي شوب صبار للبشرة الحساسة ( احسه طبيعي وبإذن الله ماله مشاكل لأن منطقة الابط قريبة من الصدر ولازم نختار بعناية شو نحط على هذي المنطقة
( مافكر ابد آخذ عطور المهم النظافة والعطور تأثر على البيبي،، يكفي ان ملابسي اغسلهم بغسول جسم معطر،، كأني معطرة ملابسي، لكن احس انه ظلم للبيبي ترشين عطر في نفس غرفته)
جهاز اقرأ ( MP3) للقرآن،، وايد صغير وعملي وصوته واضح احسه ضروري لي وللبيبي اشغل يقرا القرآن كامل
شنطة صغيرة بلاستيك فيهم فرشاة ومعجون اسنان صغير للسفر، خيط اسنان، اعواد قطن)
شنطة ماكياج صغيرة ( كحل، مرطب شفاه ملون، فرشاة شعر صغيرة، ربطة للشعر، منظرة صغيرة، كريم يد) وتحطينه بعدين في الدرج اللي عدال السرير، ومو حلوة الوحدة تحط ماكياج اكثر من الكحل والمرطب بلون خفيف وهي توها والد احسها مضحكة مو وقته يعني هي مو رايحة عرس والا عزيمة او حق زوجها)
شامبو صغير 2 في 1 خذته من هملايا لانه عشبي وعشان نعومة ولمعان الشعر
صابونة بابايا صغيرة ريحتها حلوة تنظف وتقشر بدون حبيبات تصلح للوجه وللجسم ( ماخذت ليفة لأن ماراح اقدر اتليف وتوني والدة عن تجربة)
ظرف ماسك ورقي للعيون المنفخة فيهم حبتين احتياط ( في ولادتي الاولى خواتي نبهوني ان عيوني تنفخت بعد الولادة
اكيد بطاقة المستشفى والجوازات وعقد الزواج مع صورهم
علبة الحبل السري ( ماسويت حق ولدي الاول لكن هذي المرة سجلت احسها وايد ضروري)
عباه وشيلة ليوم الخروج
وقت تدخلين غرفة الولادة تذكري تاخذين معاج
شيلة قطن كبيرة
لبس للبيبي
حفاظة لج او اندروير وفوطة صحية
لفترة النفاس خذت كمية مغلفات ماسكات للوجه مشكل للتقشير والتنظيف العميق والتفتيح والترطيب والتهدئة من كل نوع تقريبا 3-4
من الحين اشتريت تنانير وقمصان واسعة من جدام او فيهم فتحات عشان الرضاعة واحذية
لأن التسوق وعندج بيبي وايد صعب وبعد ملابس حق العيد ( اثواب مودرن شوي)
بالنسبة للتنانير يمكن تستغربين كيف اعرف القياس اهم شي تاخذين قياس الارداف اما البطن مو مشكلة البس مشد وارصه بالتنانير 
طبعا اشتريت عطور ومكياج وشامبوهات وصابون وفوط صحية وملابس داخلية وكل شي ممكن احتاجه بعد الولادة لمدة ٣-٤ شهور
خذت فرش سرير جديد ومخدات جديدة وحماية للماتريس واطقم فوط الحمام للبيت
خذت علب صغيرة بلاستيك شفاف وعبيت حلبة يانسون حبة حمرا من الحين نقيتهم مافي على الشغل وانا عندي بيبي بكون مرهقة والخدامة ماتنقي مثلي
كريمات شد وكريمات علاج تشققات
مرهم بيبانثين نصحونا فيه المستشفى لانه خالي من الالوان والعطور والكحول والمواد الكيماوية
تقدرين تستخدمينه للحلمات اذا حسيتي فيهم جفاف او تشققات ولمنطقة حفاظ البيبي على بشرة نظيفة بعد كل غيار للحماية
خذت مرهمين كبار متوفر في الصيدليات ولقيته في الكارفور بعد
المشد الاندونيسي عدد 2
فصلي عبي مسكرة وفتحة العقم من جدام تكون طويلة عشان الرضاعة تكون ساترة وعملية
وانا عن نفسي مسوية تطريزات وشغل على الاكمام والشيلة
اللهم تمم حملي على خير وقومني انا وضناي بالسلامة وفرحنا به وقر عيونا به واحفظنا يارب العالمين آمين