الولاده الاولى للصحة

السلام عليكم
شحالكن عساكن الا بخير وسهاله

الي جربت الولاده ياليت تخبرني عن الولاده الاولى كل مااسمع سوالف الحريم عنها اخاف وايد واصيح
واعيش بخوف
كلهم يقولون لي بتشوفين الموت فالولاده الاولى ؟؟

الله يسر لج الولادة

شوفي في حريم كانن يقولن لي ان الولادة مثل العطسة -هذا الشي بالنسبة لهم

وفي حريم يشتكن من الولادة

اهم شي في هالفترة الدعااااااااااااااااااااااء والمداومة ع الاستغفار والصدقة

وشوفي ربي كيف بيسر لج الولادة

ما اقول ما في تعب

الويع موجود والا كيف بيطلع البيبي !!!!!!!!!!!

لازم شوية ويع والا وين الاجر

وممكن تطلبين ابرة الظهر – في بعض المستشفيات متوفر – عن نفسي ما قط جربتها

لاتسمعين لفلانه وعلانة

خلي ايمانج بربج قوي وانه ايسر لج الولادة

^_____________^

حبيبتي لا تخافين ولا شي
واتوكلي على الله وأكثري من الاستغفار وذكر الله
وأدعية الحمل ..

أنا ولادتي الاولى كانت بعملية بسبة ان الراس كان فوق ومانزل
ولادتي الثانيه كانت تعتبر الاولى لاني كنت اول مره اجرب الطلق فيها والحمدلله ربيت طبيعي ..
الغاليه ما فيه ولاده بدون تعب وبدون الم
وصدقيني كلها ساعات وتمر
صح انج بتحسبين فيها الدقايق وبتتمنين تربين وتتخلصين بسرعة من الألم
لكن كم يسوى تشوفين الياهل يدامج بصحة وسلامه ..

وأنا سمعت بعد ان ألم الولاده بعد يكون نفسي
يعني انتي كلما خوفتي نفسج من الولاده وفكرتي انج بتتعبين فيها .. جي بتتعبين
لان عقلج الباطن بيكون مخزن هالافكار
فكري بس ان الله بيسر وبيسهل ان شاء الله ..
والتساهيل من رب العالمين بس انتي اتوكلي على الله ..

انا الحين في حملي الثالث وفي شهري التاسع
مع اني جربت الولاده لكن صدقيني مب خايفة وايد لاني ادري انها ساعات وبتعدي
طبعا أكيد افكر لكن من أحس ان الشيطان بيوسوسلي وبيخوفني اتعوذ منه
وادعي ان الله يسهل الولاده ويطلع البيبي بصحة وسلامه ..

الله يسهل عليج يارب ويقومج بالسلامه ..

الغالية وايد سمعنا هالكلام..

كل وحدة تختلف ولادتها عن الثانية…

كله اجر عند رب العالمين..

الولادة الأولى تكون فترة الويع أطول..

كلها 15 ساعة تقريبا وتفتكين..

عادي إييج رقاد وقت الويع..

وعقب ها كله بتشوفين النونو المنتظر وبتفرحين فيه وبتنسين الويع كله..