اولا أحمد الله حمدا كثيرا طيبا على تيسيره اموري وتسهيل ولادتي ورزقني بولد معافى تام الخلقة
واسأل الله العلي القدير انه يرزق كل محرومه ويسهل ولادة كل حامل
والحين بخبركن قصة ولادتي اللي كانت في 29 رمضان 8-9-2017
والمستشفى عطوني تاريخ 20-9….ودكتورتي عطتني 19
المهم من بداية الثامن طلع عندي سكري الحمل واتبعت حمية غذائيه واتضبط السكر
بس الدكتوره نصحتني ما اتحرك وايد عشان البيبي نازل في الحوض
وكنت ايام اصوم وايام افطر…وفي يوم الولاده كنت صايمه وحسيت بالويع وانا راقده
نشيت الظهر وتميت احاتي كيف بخبر ريلي انه فيني الويع وهو متحلف لي ما اربي في رمضان…كأنه الشور عندي..وماخلاني اتجهز للولاده من حيث المشي وشرب الحلبه والزعتر والرطب
قلت له فيني ويع…شويه بس…ماسوى لي سالفه وسار يصلي الظهر ….في هالوقت نزلت عليي علامة الولاده…نقطة دم…فجهزت 7 تمرات من عجوة المدينه وكلتهن…ويوم رجع من الصلاه كنت جاهزه ولابسه عباتي…وصلنا المستشفى وعقب الكشف طلع فاتح 4 سم….قمت شربت ماي زمزم وزعفران وماي ورد…وكنت قاريه فيه آيات تسهيل الولاده..كانت الساعه 2ونص الظهر…عقب ودوني غرفة الولاده وطلبت من ريلي يترياني خارج قسم الولاده(لأول مره لانه كان وياي كل ولاداتي) ويوم ربيت كانت الساعه 4الا ربع…زقروه الممرضات .
صح ان الولاده متعبه وتحسين انج متتي وحييتي…بس يوم تشوفين البيبي تنسين كل ألم حسيتي به.
فالشكر لله وحده على عظيم كرمه وفضله عليي.
ومبروك ما يااااج
ما شاء الله انولد في الشهر الفضيل عساه من الذرية الصالحة 