تطبيقي لـ البسبوسه بالقشطه .. من الأخت " لازم اسم"…. و بالصوور لاا يفوتكم من مطبخ الامارات

********************************

الحين انا بحط الأدوات اللي استخدمتها

انا حاطه كل شي .. بس ناقص الزيت و السكر ماصورتهم

و خلطتهم مثل ما مطلوب مني … و تميت اخلط و اخلط و اخلط بالخلاط الكهربائي

عقب ثلاث دقايق بالضبط لوول.. حطيت كوب كامل … نصه طحين و نصه سميد

و عقب . .. صفيتهم في صينيه .. مدهونه عشان ماتلصق

مادري بس استصعبت وضع القيمر فوق البسبوسه وهي لاينه .. حسيت شكله بشع …

بس كملت مشواري

و هنا عقب ما طلعتها من الفرن ..

شكلها كان لذييذ

خليتها شوي عـ صوب لين ما اسوي الشراب

ماذكر كم فنيان سكر حطيت … و عصرت ليمونه و خليته يغليييي

و هناا صبييت الشرااب على البسبوسه

و هااي الصوره النهائية للعمل الذي قمت به لوول

و صحتييين و هناا

الحين بخبركم سالفة أبوي..

ابوي الله يسلمكم عيار هههه و كل ما سوينا شي يقول شوو هاا ..

مثلا.. الصالونه لازم يكون فيها بصل و بهارات و هالسوالف عشان يكون فيها طعم …

ابوي يقول لأ مابا هذا و مابا ذاك و لا تحطو هذا و لا تحطو ذاك

و يبا الصالونه … امممم ان صح التعبير تكون ماي ! هههه

بس يوم يسير بيت يدتي .. و تكون مسويه صالونه … تكووون متتتتروووووسه من الاشيا اللي ابوي

ماياكلها في البيت … و اييب بيتنا و ياكل.. و يوم اقوله هاه عيل .. لا تحطو و لا تحطو و مناك تاكل

يقول هااا طباخ امي.. ها غير لوول

الحين على البسبوسه .. قالي امس .. هاي بسبوسه؟؟؟

تم يضحك و يقولي انتي مسكينه و لا تعرفين البسبوسه … انا عادي تعودت ..

قلت له اصلا انته عايبتنك والا مابتاكل منها …بعدين يوم اني ماعرف اطبخ

تعال انته و راويني كيف الطباخ و الطعم الأصيل اللي ترمس عنه

تمينا نسولف وجييه .. لييين مر الوقت عقب صلاة التراويح

ياا ابوي.. قال حق اختي الصغيره تقول لي احط لها فصحن

على اساس انه حقها مب حقه …

يتني تقول .. بابا يقول حطيله بسبوسه في صحن ..

حطيتلها ..و عقب كم دقيقه يت شاله صحن و تقول بابا يبا زياده

حطيت له … و شليت الصحن روحي و سرت له .. قلت هااه عيل .. مانعرف نسوي البسبوسه و لا نعرف نطبخ

تم يضحك و يقول مايخصه اصلا انا يوعان هههه

و وو بس

ان شاء الله ماكون طولت عليكم