اليوم يايينا ضيوف على الغدا،،، و سويت لهم دزيرت عبارة عن (أم علي) – (سلطة فواكة) – (شوكلت موس).
و حبيت أعطيكم أسهل طريقة للشوكلت موس… طعمه أكثر من رائع… شرات شوكلت موس مال Galler
تابعوا الموضوع…
150 جرام مارشميلو
250 جرام دارك شوكلت + 50 جرام ميلك شوكلت
50 جرام زبدة
284 كريمة قابلة للخفق
ملعقة شاي فانيلا
اشوية ماي
و للتزيين وايت شوكلت + فارولة
على نار هادئة نحط الجوكلت + المارشميلو + الزبدة + اشوية ماي عشان لا يحترق المارشميلو
و بعدين انييب الكريمة و نخلطها مع الفانيلا لين ما تتكثف.
و اذا حسيتي انها ما اتكثفت ممكن اتزيدين اشوية دريم ويب باورد و بتكثف اشوي.
و بعدين انييب خليط الجوكلت و انصبه على الكريمة.
و نحطها في الثلاجة لين ما تبرد اشوي
و بعدين انظهرها و انزينها بالوايت شوكلت و الفارولة
ملاحظة: الطعم يعتمد وايد على نوعية الشوكلت الي تستخدمينه… أنا اهني استخدمت شوكلت lindt الدارك و آرو.
و بالعافية
تسلم يديد ع الوصفــــــــــــــه..
الغـــــــــــــاليـــــــــة لو ماعليج أمر
ممكن تحطين طريقة ام علي وسلطة الفواكه ^^
بس بسالج امممم كيف نسوي الكريمه^ ^؟
المشاركة الأصلية كتبت بواسطة عيناوية وبس 
الغـــــــــــــاليـــــــــة لو ماعليج أمر
ممكن تحطين طريقة ام علي وسلطة الفواكه ^^
هلا الغالية..
مشكورة على المرور..
سلطة الفواكة عبارة عن حبة أناناس + حبة فيفاي + علبة فراولة + نص كاس عصير برتقال و بس…
ما حب أزيد عليهم فواكه أكثر عن جي ،، لان خليط الفواكة ممكن يسبب حموضة…
و أم علي سويتها بالكرواسون السادة…
انقطع أربع حبات من الكرواسون السادة ،، و عقب انحط 4 أكواب حليب فرش + كوب سكر + زعفران على النار لين ما يطبخ اشوي.
و انصب الحليب على الكرواسون و اندخله الفرن لين ما يحمر اشوي و عقب انزينة بمكسرات (يوز، كازو).
و بس ….
المشاركة الأصلية كتبت بواسطة ااام زايد بس بسالج امممم كيف نسوي الكريمه^ ^؟
هلا اختي…
الكريمة الي اتسخدمتها عبارة عن كريمة سائلة قابلة للخفق… انحطها في الخلاط لين ما تحسين انها صارت whipping أو اتكثفت… و اذا حسيتها انها سائلة وايد ممكن اتزيدين عليها اشوي دريم ويب بودرة…