هذا شكله للأخوات الي ما يعرفونة . وسعره مش غالي وايد وصناعة المملكة المتحدة.
طبعا ما صورت خطوات العجينة ولا شكلها النهائي لاني إنصدمت لما بدأت أضيف الماء وأعجن لون الخليط صار مايل لللون الغامقة أو الرمادي الغامق فقلت خليني أستمر في العجن يمكن لاني الماء ما إندمج زين في العجينة بس بعد ما أضفت باقي مقدار الماء وبعدين الزيت وإستمريت في العجن لاحظت إني العجينة لونها مثل ما هي ما تغير أبدا . وقوام الطحين ردئ جدا جدا جدا عزيزاتي يعني حتى طحين رقم 2 أحلى وأروع منه ب100% حتى حسيت انه طحين نخالة كامل مش لجميع الاستعمالات مثل ما هو كاتبين على العلبة من برى. وطبعا علشان ما أظلم طحين ال home bread سويت معاه عجينة ثانية بس بالطحين الفاخر علشان نقارن زين وما نظلم حد أبدا.
عزيزاتي هذي شكل الصينية وفيها فطاير بطحين الhome bread بعد ما شكلناها وخمرناها مدة ساعة إلى ربع طبعا هذي النتيجة بعد أكثر من نصف ساعة عجن . لاحظوا كأنه تونا مشكلينه ما انتفخ وايد يادوب شوي .
هني عجينة بالطحين الفاخر وبنفس المقادير ومدة العجن ومدة التخمير ولاحظوا النتيجة كيف مذهلة.
لاحظوا حبيباتي كيف شكل فطاير ال home bread من جريب كأنها ممزقة وتفتقد لليونه المتعارف عليا . ونحس لو قطعنا نصين بتنكسر ما بتتمدد.
بالمقابل شوفوا شكل فطاير الطحين الفاخر كيف متماسكة القوام وتتمتع بالليونة يعني لو شديناها بنلاقيها تمط .
اللون والي هو شي مهم جدا جدا جدا في الفطاير طلع الفرق شاسع جدا بين طحين الhome breadوالطحين الفاخر لاحظوا بنفسكم عزيزاتي شوفوا وقارنوا بين هذيلا الحبتين من حيث اللون بتحسون اني الي على جهة اليسار كأنها مستوية بطحين نخالة كامل. بس الي على اليمين صدق مسواية بطحين فاخر .
وهذلا الصينتين دققوا ولاحظوا الفرق
مرحلة بعد الخبز . هذي فطاير ال home bread بعد الخبز لاحظوا القوام كيف عزيزاتي تحسونة مش طبيعي وغير محبب انج تاكلين منه بالإضافة إلى أنه اللون مائل جدا للغامق. ولاحظوا بعد توزيع الحرارة على سطح الفطاير لاحظوا حبيباتي النقط الصغيرة المحمر اكثر من الباقي هذي يعني انها تأتي في أسفل أنواع الطحين أي بعد الطحين رقم واحد.
لكن بالمقابل شوفوا فطاير الطحين الفاخر كيف بيضة وفاتحة وقوامها رائع ويشهي الي يشوفة .
وهذيلا القطعتين جنب بعض دققوا ولاحظوا هل كلامي الي قلته فوق صحيح أم غير صحيح؟
وهذي من زاوية أخرى
هني في هذي الصورة عزيزاتي أبغيكم تلاحظون شي مهم ألا وهو اني فطاير الhome bread الي على اليمين تحسينها كأنها بسكوت أو بقسم ولو حبيت تقسمينها نصين راح تدردر يعني جنج تاكلين بسكوت مش فطاير . لكن لاحظوا الفطيرة الي على اليسار والي هي بالطحين الفاخر كيف القوام متماسك وهش جدا ولو حبينا نقسمة نصين راح تنقسم بسهولة من كثر الهشاشة والطرارة.
وهذي صورة من بعديد شوي لمجموعتين من الفطاير لاحظوا الي على اليمين كيف الي يشوفها يحس انها ثقيلة ومليانة زيت وأقرب لكعك العيد المصري من الفطاير.
عزيزاتي بعد ما طلعت فطاير الhome bread من الفرن وخليتها ترتاح مدة نصف ساعة صارت ناشفة ويابسة وحاولت اقسم وحدة لنصين حسيتها مثل البقسمات اللين يعني القوام معدوم جدا .
هذي صورة جماعية توضح الفروق .
عزيزاتي هذا مجهود وإستنتاج شخصي . الي اكتشفته أنا في طحين Home Bread انه سيء لكن هذا الشي ما يمنع إنه في ناس تحب تشتريه ويظبط معاها والدليل انتشارة في الأسواق. وبالنسبة لي وما راح أستخدمه غير للرقاق لان الرقاق محتاج طحين أقرب للغامق منه للفاتح يعني نحن في البيت نشتري حق الرقاق طحين رقم 3 فإستنتجت اني الhome bread ممكن يحل محل الطحين رقم 3 حبيت أوفر عليكم التعب وأجربة علشان محد يشترية ويتوهق.
وهذي أخر تطبيقاتي لعجينة ال10 دقائق
وهي صورة أقرب
إنتظروني في جديد القادم
مع محبتي
موضوع متعووب عليه
مشكووووووووورة اختي
يعطيج العافية
والله انج مبدعة وانا ماااااااحب استخدم غير الطحين رقم 1
^___*
يعطيج العافيه عيوني