ما رديتو عليه في موضوع اقتصادي 1 بس بعد بحط موضوعي الثاني للفايدة
جام المشمش
أنا بصراحة ما آكل المشمش ،،، بس البارحة سويته جام عشان ما يخرب و يظل فالثلاجة للصغاريه و للمناسبات و الفطور …
المهم الطريقة… لا أول المقادير :
1/2 كيلو مشمش
1/2 كيلو سكر
1/4 كوب ماء
عصير ليمونه وحدة (ليمون أصفر كبير) يطلع نص ربع الكوب إذا انتي تستخدمين أكواب القياسات
ألحين الطريقة:
1. اقطعي المشمش نصفين و شيلي البذرة منه … لما تخلصين منه حطيه في قدر صغير
2. أضيفي عليه الماء و عصير الليمونة
3. ضعيه على النار لمدة 15 دقيقة ، أولا خلي النار عالية و بعدين خففيها و قلبيه كل شوي بس بسيط لا تهرسينه
4. لما تشوفين المشمش صار ناعم و لين ضيفي عليه السكر و قلبيه لين ما يذوب السكر و ارفعي النار عليه و استمري في التقليب و لكن لا تغطينه و بعدين خلي النار متوسطة عليه لمدة 30 دقيقة
أو لين ما تحسين أنه بدا يصير مثل الجلي
5. إذا عندج برطمان زجاج مال جام أو جبن يفضل أنج تغلين البرطمان و الغطاء عشان التعقيم وبعدين صبي فيه الجام و هو ساخن وغطيه و هو ساخن .
ملاحظة عشان تعرفين إذا الجام استوى صح ضعي القليل منه في صحن و حطيه في الفريزر و بعد دقيقتين شوفيه إذا ضغطتي عليه بتحسينه مثل الجلي ،، يعني جاهز خلاص طفي عنه النار و خليه 5 دقايق و عقب صبيه في البرطمان لا تخلينه لين يبرد .. لازم يكون حار ،،،، بس إذا طلعتي الجام من الثلاجة و كان صلب يعني طبختيه اكثر من اللازم .. أما إذا كان سائل شوي يعني خليه عالنار شوي
شكرا على الوصفه
يا ليت تجربونه و تقولون شو رايكم في الوصفة