طفلتي يا احلى العرايس
أقبلي و أمشي الهوينا
في سحابة شوق مرّي
وعطرها ينسّم علينا !
السلام عليكم ورحمة الله وبركاته
شحالكن يا عرايس و حريم و صبايا ؟ 
انا من فتره كنت مشغولة بالتجهيز حق عرس بنت عمي فدييتها الله يسعدها و يوفقها ^.^
و حطيت مواضيع في المدونة بخصوص الميكب والتسريحة والفستان .. الخ
و الحمدلله كان العرس قبل 3 ايام بالتحديد يوم الخميس تاريخ 10/02/2017
المهم كل شي كان اوكي و مرتب ما شاء الله و العروس قمر و انا طلعت حلوة و كاشخة لوول
بس وايد بنات طرشولي رسايل يسألوني عن الميكب و التجهيز و هالسوالف
عشان جيه قلت بسوي تقرير خفيف عن يومي الحلو في عرس بنت عمي بالصور ^_*
و بعد لأن صديقتي روح سلطان فدييتها شجعتني احط التقرير
و طبعاً هي كانت معزومه ويا .حرم سموه. الغالية بس ما قدرت تحضر صارت عندهم ظروف على آخر لحظه ..
السمووحة خواتي ماقدر احط صور العرس لأنه مب عرسنا و انا استحيت اطلب منهم
عشان جيه بحط مقتطفات من يومي الحلو في بوظبي والتجهيز للعرس والكشخة ^^
احم قبل ما ابدأ حبيت اخبركم ان الموضوع سوالف و فرفشه
يعني مابا فلسفة و شو الأهداف و الدوافع و هالرمسه الفاضيه 
اللي عايبنها الموضوع حياها الله و على العين و الراس و اتشرف بوجودها
و اللي مب عايبنها بكل بساطة تضغط Ctrl + W لني ماحب حد يخرب مواضيعي !
و الحين بعد هالمقدمة بخليكم مع الصور و التقرير ..
دعواتكم للمعاريس (اللهم بارك لهما و بارك عليهما واجمع بينها على خير) و عقبالنا نحن البنوتات
تابعوني بعد شوي يا حلوات ^_*
يا عساآه يكون فارس
والحلم يصبح يقينا
و الفرح ربي يبارك
عرسكم و السامعينا
من يوم يمشي لين شافته الأعيـان
أهلاً هلا عدّ السحاب المطيـري
واعداد ما سالت من المزن وديان
هلا خواتي يا مرحباكم و منورين الموضوع ^.^
شكراً حق كل وحده شجعتني و تفاعلت ويا الموضوع ..
و انا آسفة على التأخير لني كنت مشغوولة في الجامعة !
العرس كان في فندق انتركونتيننتال بوظبي
يوم الخميس تاريخ 10 / 02 / 2024 نشينا الصبح من غبشه و اتجهزنا و حطينا اغراضنا و اتوكلنا على الله ..
و كنا حاجزين غرفة ليلة وحده في الانتر انا وخواتي .. و حجزنا وحده مواطنه تمكيجنا في الفندق ويا الكوافيره مالت الشعر ^_*
هنيه اول ما وصلنا الفندق الظهر و سوينا الشيك ان و استلمنا غرفتنا
لفتت انتباهي الثريات الكرستال وايد راقية و مسويه جو في المكان
هذي غرفتنا انا وخواتي الثنتين في الدور الـ 16 كان الفيوو حلو على العاصمة فدييتها
مثل ما تشوفون المناظر وايد حلوة من فوق .. اعش بوظبي و من سكنها>> .حرم سموه. لا تصدقين عمرج خخخ
هذا الحمام – الله يعزكم – اللي اتمكيجنا فيه و عفسنااه لوول
و اتلعوزنا وقت الميكب لان الاضاءة ضعييفه و خافته في الغرفة اونه اجواء رومانسية
:
:
بعد ما وصلنا الفندق و حطينا اغراضنا اتصلت في بنت عمتي و نزلت عندنا الغرفة (هل الشارجة محتلين الفندق هاليوم لول)
و كنا ميتين من اليوع نتشااور وين نتغدا ؟؟ و طبعاً ما عندنا سيارة لازم نطلب من برع
و كل ما نتصل مكان ما يوصلون الفندق وانا عصافير بطني متوحشه مسويه حشرره خخخخ
و آخر شي استقرينا على بيتزا هات طلبنا حق قبيلة انواع البيتزا والباستا و سرنا اتغدينا كلنا رباعه في غرفة من غرف الأهل و استانسنا مع بعض ^^
و بعد الغدا خليتهم و نزلت صالون الفندق ابغي اسوي شغلها كنت ناسيه اسويها @@
و حطيت ماسك كنت ماخذتنه من صالون الحنا في عيمان خبرتني عنه روح سلطان الدبة
المهم انه خررطي ما يسوي شي اونه ماسك الذهب ههههههه
احم لا تكفخيني رووحوه يمكن انتي يناسبج بس انا بشرتي تعبانه ما يناسبها كل شي اهيئ اهيء
و بعدين على الساعة 5 وصلت الماكيره المواطنة ويا اختها و بعدهم دخلت مالت الشعر السورية
و كانت الماكيره طيبه و حبوبه استانسنا وياها و ما قصرت ويانا الصراحة ^_^
و حتى اختها عسوله ساعدتني في لبس الفستان و حطتلي نيل بولش لني ماعرف احط حق عمري لوول
اول شي بدأت اتمكيج اختي الصغيره في الغرفة بس كان الوقت قبل المغرب يعني نهار
و بعدين ع المغرب صارت الغرفة ظلام و الاضاءة خافته و ما تساعد اتلعوزنا ! عشان جيه انتقلنا الحمام الله يعزكم و عفسنااه خخخ
صوّرت اغراضها و هي تمكيج اختي و انا يالسه اطالع ماشي شغل ^^
كل وحده فينا طلعت بـ ستايل غيير لأن هي فنانه ما شاء الله و مبدعه في رسمات العين و الدمج
بس احس مكياج خواتي عيبني اكثر عن مكياجي –> يمكن لأن انا وايد اتشرط و خواتي ساكتات قالولها أي شي على ذوقج لوول
الصراحة مكياجها حلو و راقي و نظيف و الالوان قويه و بارزه
بس ستايلها يميل للخليجي اكثر عن اللبناني و تبدع في المكياج الثقيل اكثر عن السمبل
و اللي ما عيبني الفاونديشن ما ناسبني لان بشرتي دهنية و تمت تلامع في العرس و هذا أكررره شي عندي !
بس خواتي ناسبهن الفاونديشن لان بشراتهن عادية و كان ثابت و حلو لين آخر العرس ^.^
و انا كنت آخر وحده بعد ما خلصت من الميكب يا دور التسريحة اللي تعقدني كل مره ما اكون راضيه عنها !
بس مالت الشعر هالمره كانت فنانه و راويتها شعري طويل و غلييظ ما شاء الله
و قالت بسويلج تسريحة ويفي كامله مرفوعه و بحط فيها حبات اللولو منثوره لأن ستايل فستاني لؤلؤ ^_*
و فعلاً طلعت التسريحة وايد راقية و اليجنت و ملكية و اتغير شكلي وايد سألوني عنها في العرس
و اخيراً لازم اراويكم كيف كان ستايلي و النتيجة النهائية لول
هذا فستاني ما كنت وايد مقتنعه فيه لأني كنت حاطه في بالي شي ثاني بس ع اللبس احلى
و اللي يسألوني عن الفستان القطعة ماخذتنها من الكويت و مفصلتنها عندها مصمم عادي فالشارجة ..
و هنيه كشخة العرس بعد ما خلصنا و نزلنا القاعة
و اخييراً سرنا العرس و استانسنا ويا الأهل
و العروس بنت عمي كانت طالعه قمر فديتها ما شاء الله عليها ^^
الحمدلله كل شي كان حلو و مرتب و عدّى اليوم على خيير
الله يسعدهم و يوفقهم و يرزقهم بالذرية الصالحة يااارب
و عقبالنا نحن الصبايا الحلوات لول
:
:
ردينا الغرف الساعة 2 فليل و كنا هلكانين ع الأخر
و اتلعوزنا لين ما مسحنا المكياج و فججنا كشيشنا الجميلة خخخخ
و رقدنا الفير احلى نومه بعد هالتعب كله لول
بس انا كنت متحمسه نشيت الساعة 10 الصبح فيني حواطه ههههه
اتغسلت و اتلبست و سويت لي نسكافيه و نزلت بروحي استكشف الفندق
هذي المطاعم اللي على المارينا (مرسى اليخوت) حلوة يلساتها
و هذا المارينا مال الفندق >> كان فخاطريه اطلع رحلة باليخت هههه
هنيه الممشى على المارينا .. شفت شياب اجانب يتمشون ويا عيايزهم
صورة ثانيه للمارينا من جهة مختلفه و طالع فيها الفندق
اتمشيت لين ما وصلت عند شاطيء البحر
انسدحت على واحد من هالكراسي و تأملت في البحر ريلاكس ههههه
و انا منسدحه على الكرسي صورتلكم الحنا
موول ما عيبتني لني ما كنت متفيجه هاليوم و انا طلبت منها نقش منثّر بس ما فهمتني !
اممم روحووه تقول حلوة الحنا عيبتنها مادريبها يمكن تجاملني ويا راسها لوول
:
:
و بعدين رجعت الغرفة الساعة 11 شفت خواتي واعيات
حطينا اغراضنا و اتلبسنا و اتكشخنا حق عزيمة الغدا في بيت عمي ^^
نزلنا اللوبي الساعة 12 الظهر سوينا جيك آوت و اتصلنا في الدريول ياخذنا من الفندق
و سرنا بيت عمي فديتهم اتغدينا عندهم كانت عزيمة عائلية و استاسنا ويا الأهل واللمة الحلوة
و جيه يكون انتهى يومي الحلوو في بوظبي
و ان شاء الله تكونون استمتعوا بالتقرير المتواضع ^.^
دعواتكم لي ان شاء الله احطلكم تقرير عرسي هالسنه ^_^
و اخييراً هدية مني حق الحلوات اللي منورين موضوعي
كاكاوات و حلويات واصلتني قبل شوي من المانيا لول
من عند ماماتي فدييتها مطرشتلي الله يردها بالسلامة و الله يشفي ابويه ويعافيه ..
كلمة حلوة منكم خواتي تكفيني لأني تعبت على الموضوع
دمتـم بود
و تسلمين عالتقرير الحلو
كمليييي نترياج
وينج زماااااااان ماشفناج
انتظر البقية ^_^
ومبروووووووووووووووووووك الف مبرووك
نتريا التكمله